ਬੀ.ਸੀ.ਦੇ ਵਿੱਤ ਮੰਤਰੀ ਨੇ ਔਟਵਾ ਨੂੰ ਜੰਗਲਾਤ ਉਦਯੋਗ ਲਈ ਮਦਦ ਭੇਜਣ ਦੀ ਕੀਤੀ ਅਪੀਲ

ਬੀ.ਸੀ.ਦੀ ਵਿੱਤ ਮੰਤਰੀ ਬ੍ਰੇਂਡਾ ਬੈਲੀ ਨੇ ਫੈਡਰਲ ਬਜਟ ਦਾ ਸਵਾਗਤ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਸੂਬੇ ਦੀਆਂ ਤਰਜੀਹਾਂ ਨਾਲ ਮੇਲ ਖਾਂਦਾ ਹੈ। ਬੈਲੀ ਨੇ ਕਿਹਾ ਕਿ ਬਜਟ ਵਿਚ ਮਹੱਤਵਪੂਰਨ ਖਣਿਜ ਅਤੇ ਹਾਊਸਿੰਗ ਲਈ ਫੈਡਰਲ ਸਰਕਾਰ ਵਲੋਂ ਕੀਤੀਆਂ ਵਚਨਬੱਧਤਾ ਸ਼ਲਾਘਾਯੋਗ ਹਨ ਪਰ ਉਨ੍ਹਾਂ ਕਿਹਾ ਕਿ ਸਾਫਟਵੁੱਡ ਲੰਬਰ ਇੰਡਸਟਰੀ ਨੂੰ ਇਸ ਸਮੇਂ ਖਾਸ ਤੌਰ 'ਤੇ ਮਦਦ ਦੀ ਲੋੜ ਹੈ ਜੋ 45 ਫੀਸਦੀ ਤੋਂ ਵੱਧ ਦੇ ਟੈਰਿਫਸ ਦਾ ਸਾਹਮਣਾ ਕਰ ਰਹੀ ਹੈ।

ਫੈਡਰਲ ਸਰਕਾਰ ਨੇ ਬਜਟ ਵਿਚ ਜੰਗਲਾਤ ਕੰਪਨੀਆਂ ਲਈ $700 ਮਿਲੀਅਨ ਲੋਨ ਗਾਰੰਟੀ ਵਜੋਂ ਖ਼ਰਚ ਕਰਨ ਦੀ ਯੋਜਨਾ ਸ਼ਾਮਲ ਕੀਤੀ ਹੈ,ਜਿਸ ਦਾ ਵੱਡਾ ਹਿੱਸਾ ਬੀ.ਸੀ.ਨਿਰਮਾਤਾ ਨੂੰ ਮਿਲਣ ਦੀ ਉਮੀਦ ਹੈ। ਇਸ ਤੋਂ ਇਲਾਵਾ $500 ਮਿਲੀਅਨ ਜੰਗਲਾਤ ਉਤਪਾਦ ਦੇ ਵਿਕਾਸ ਅਤੇ ਬਾਜ਼ਾਰ ਵਿਭਿੰਨਤਾ ਲਈ ਰੱਖੇ ਗਏ ਹਨ।

ਹਾਲਾਂਕਿ,ਇਸ ਵਿਚ ਕੁਝ ਨਵਾਂ ਨਹੀਂ ਹੈ,ਪ੍ਰਧਾਨ ਮੰਤਰੀ ਨੇ ਅਗਸਤ ਵਿਚ ਇਸ ਸਹਾਇਤਾ ਦਾ ਐਲਾਨ ਕੀਤਾ ਸੀ। ਬੀ.ਸੀ.ਦੀ ਵਿੱਤ ਮੰਤਰੀ ਬ੍ਰੇਂਡਾ ਬੈਲੀ ਨੇ ਕਿਹਾ ਕਿ ਸਾਫਟਵੁੱਡ ਇੰਡਸਟਰੀ ਇਸ ਸਮੇਂ ਜਿਸ ਹਾਲਾਤ ਵਿਚੋਂ ਲੰਘ ਰਹੀ ਹੈ ਉਸ ਨੂੰ ਓਨਟਾਰੀਓ ਦੇ ਆਟੋਮੋਬਾਇਲ ਸੈਕਟਰ ਦੀ ਤਰ੍ਹਾਂ ਸਪੋਰਟ ਮਿਲਣੀ ਚਾਹੀਦੀ ਹੈ। ਉਨ੍ਹਾਂ ਔਟਵਾ ਤੋਂ ਨੌਰਥ ਕੋਸਟ ਟ੍ਰਾਂਸਮਿਸ਼ਨ ਲਾਈਨ ਲਈ ਵੀ ਮਦਦ ਮੰਗੀ।