18.42C Vancouver 18.42C VancouverDec 9, 2025 6:03 PM - Connect Newsroom - Ramandeep Kaur
ਬੀ. ਸੀ. ਦੀ ਹਾਊਸਿੰਗ ਮਿਨਿਸਟਰ ਕ੍ਰਿਸਟੀਨ ਬੋਇਲ ਨੇ ਸੂਬੇ ਵਿਚ ਕਿਰਾਏ ਦੀਆਂ ਕੀਮਤਾਂ ਵਿਚ ਲਗਾਤਾਰ ਗਿਰਾਵਟ ਆਉਣ ਅਤੇ ਵਕੈਂਸੀ ਰੇਟ ਵਧਣ 'ਤੇ ਆਪਣੀ ਸਰਕਾਰ ਦੀ ਪਿੱਠ ਥੱਪਥਪਾਈ ਹੈ।
ਬੋਇਲ ਨੇ Rentals.ca ਦੀ ਤਾਜ਼ਾ ਰਿਪੋਰਟ 'ਤੇ ਟਿੱਪਣੀ ਕਰਦੇ ਕਿਹਾ ਕਿ ਸੂਬੇ ਵਿਚ ਪਿਛਲੇ ਦੋ ਸਾਲਾਂ ਵਿਚ ਕਿਰਾਏ ਦੀਆਂ ਕੀਮਤਾਂ ਵਿਚ 8.5 ਫੀਸਦੀ ਦੀ ਕਮੀ ਆਈ ਹੈ। ਸਰੀ ਵਿਚ ਦੇਖਿਆ ਜਾਵੇ ਤਾਂ ਇੱਕ ਬੈੱਡਰੂਮ ਵਾਲੇ ਕਿਰਾਏ ਦੇ ਘਰਾਂ ਦੇ ਆਸਕਿੰਗ ਪ੍ਰਾਈਜ਼ ਪਿਛਲੇ ਸਾਲ ਤੋਂ 9.3 ਫੀਸਦੀ ਘੱਟ ਗਏ ਹਨ।
ਮੰਤਰੀ ਨੇ ਬਿਆਨ ਵਿਚ ਕਿਹਾ ਕਿ ਬ੍ਰਿਟਿਸ਼ ਕੋਲੰਬੀਆ ਵਾਸੀਆਂ ਲਈ ਮਕਾਨਾਂ ਨੂੰ ਕਿਫਾਇਤੀ ਬਣਾਉਣਾ ਸਾਡੀ ਸਰਕਾਰ ਦੀ ਮੁੱਖ ਤਰਜੀਹ ਰਹੀ ਹੈ,ਅਸੀਂ ਕਿਰਾਏ ਦੀ ਸਪਲਾਈ ਵਧਾਉਣ, ਕਿਰਾਏਦਾਰਾਂ ਲਈ ਸੁਰੱਖਿਆ ਮਜ਼ਬੂਤ ਕਰਨ ਅਤੇ ਹਾਊਸਿੰਗ ਮਾਰਕੀਟ ਵਿਚ ਕਿਆਸਅਰਾਈਆਂ 'ਤੇ ਨਕੇਲ ਕੱਸਣ ਲਈ ਕਦਮ ਚੁੱਕੇ ਹਨ ਤੇ ਇਹ ਨਤੀਜੇ ਦੱਸਦੇ ਹਨ ਕਿ ਸਾਡੀਆਂ ਕੋਸ਼ਿਸ਼ਾਂ ਰੰਗ ਲਿਆ ਰਹੀਆਂ ਹਨ।
ਬੋਇਲ ਨੇ ਕਿਹਾ ਕਿ ਪਿਛਲੇ ਮਹੀਨੇ ਦੇ ਅੰਕੜਿਆਂ ਮੁਤਾਬਕ, ਬੀ. ਸੀ. ਵਿਚ ਰਜਿਸਟਰਡ ਪਰਪਸ-ਬਿਲਟ ਰੈਂਟਲ ਘਰਾਂ ਵਿਚ ਬੀਤੇ ਸਾਲ ਦੀ ਇਸੇ ਮਿਆਦ ਦੇ ਮੁਕਾਬਲੇ 55.1 ਫੀਸਦੀ ਦਾ ਵਾਧਾ ਹੋਇਆ ਹੈ ਅਤੇ ਸਰਕਾਰ ਇਸ ਗਤੀ ਨੂੰ ਬਰਕਰਾਰ ਰੱਖਣਾ ਚਾਹੁੰਦੀ ਹੈ, ਜਿਸ ਲਈ ਹੋਰ ਕੰਮ ਕੀਤੇ ਜਾ ਰਹੇ ਹਨ।
