ਬੀ.ਸੀ. ਦੀ ਵਿਧਾਨ ਸਭਾ ਵਿਚ ਇੱਕ ਇਤਿਹਾਸਕ ਬਿੱਲ 5 ਨੂੰ ਕੀਤਾ ਗਿਆ ਪਾਸ

ਬੀ.ਸੀ. ਦੀ ਵਿਧਾਨ ਸਭਾ ਵਿਚ ਇੱਕ ਇਤਿਹਾਸਕ ਬਿੱਲ 5, ਜਿਸ ਨੂੰ ਟਰੇਡ ਰੈਕੇਗਨੇਸ਼ਨ ਐਕਟ ਵਜੋਂ ਜਾਣਿਆ ਜਾਂਦਾ ਹੈ, ਨੂੰ ਸਾਰੀਆਂ ਪਾਰਟੀਆਂ ਦੀ ਸਹਿਮਤੀ ਨਾਲ ਪਾਸ ਕਰ ਦਿੱਤਾ ਗਿਆ ਹੈ। ਜੌਬਸ ਅਤੇ ਆਰਥਿਕ ਵਿਕਾਸ ਮੰਤਰੀ, ਰਵੀ ਕਾਹਲੋਂ ਨੇ ਇਸ ਨੂੰ ਸੂਬੇ ਅਤੇ ਦੇਸ਼ ਦੀ ਆਰਥਿਕਤਾ ਲਈ ਇੱਕ ਵੱਡੀ ਜਿੱਤ ਦੱਸਿਆ ਹੈ। ​

ਇਸ ਕਾਨੂੰਨ ਦੇ ਲਾਗੂ ਹੋਣ ਨਾਲ ਹੁਣ ਕੈਨੇਡਾ ਦੇ ਕਿਸੇ ਵੀ ਹਿੱਸੇ ਵਿਚ ਕਾਨੂੰਨੀ ਤੌਰ 'ਤੇ ਵਿਕਣ ਵਾਲੀਆਂ ਵਸਤੂਆਂ ਅਤੇ ਸੇਵਾਵਾਂ ਬਿਨਾਂ ਕਿਸੇ ਵਾਧੂ ਸਰਟੀਫਿਕੇਟ ਜਾਂ ਰੁਕਾਵਟ ਦੇ ਬੀ.ਸੀ.ਵਿਚ ਵੇਚੀਆਂ ਜਾ ਸਕਣਗੀਆਂ, ਵਪਾਰੀਆਂ ਨੂੰ ਦੂਜੇ ਸੂਬਿਆਂ ਤੋਂ ਸਮਾਨ ਲਿਆਉਣ ਲਈ ਦੁਬਾਰਾ ਰਜਿਸਟ੍ਰੇਸ਼ਨ ਜਾਂ ਡੁਪਲੀਕੇਟ ਸਰਟੀਫਿਕੇਟ ਲੈਣ ਦੀ ਲੋੜ ਨਹੀਂ ਪਵੇਗੀ। ਇਸ ਨਾਲ ਕਾਰੋਬਾਰਾਂ ਲਈ ਲਾਗਤ ਘਟੇਗੀ ਅਤੇ ਲੋਕਾਂ ਨੂੰ ਵੀ ਵਧੇਰੇ ਵਿਕਲਪ ਮਿਲਣਗੇ।

ਗ੍ਰੇਟਰ ਵੈਨਕੂਵਰ ਬੋਰਡ ਆਫ਼ ਟ੍ਰੇਡ ਦੇ ਅੰਦਾਜ਼ੇ ਮੁਤਾਬਕ, ਇਸ ਨਾਲ ਸੂਬੇ ਦੀ ਜੀ. ਡੀ. ਪੀ. ਵਿਚ $7.6 ਬਿਲੀਅਨ ਦਾ ਵਾਧਾ ਹੋਣ ਅਤੇ ਸਰਕਾਰ ਲਈ $1.7 ਬਿਲੀਅਨ ਦਾ ਰੈਵੇਨਿਊ ਜਨਰੇਟ ਹੋਣ ਦੀ ਉਮੀਦ ਹੈ।

ਕਾਹਲੋਂ ਨੇ ਕਿਹਾ ਕਿ ਬੀ. ਸੀ.ਅੰਤਰ-ਰਾਜੀ ਵਪਾਰਕ ਰੁਕਾਵਟਾਂ ਨੂੰ ਹਟਾਉਣ ਵਿਚ ਦੇਸ਼ ਦੀ ਅਗਵਾਈ ਕਰ ਰਿਹਾ ਹੈ ਅਤੇ ਇਹ ਬਿੱਲ ਨਾ ਸਿਰਫ਼ ਵਪਾਰ ਨੂੰ ਸੌਖਾ ਬਣਾਏਗਾ ਬਲਕਿ ਕੈਨੇਡਾ ਦੇ ਅੰਦਰੂਨੀ ਬਾਜ਼ਾਰ ਨੂੰ ਮਜ਼ਬੂਤ ਕਰੇਗਾ। ਮੰਤਰੀ ਨੇ ਕਿਹਾ ਕਿ ਇਹ ਸਾਡੀ ਇਤਿਹਾਸਕ ਲੁੱਕਵੈਸਟ ਆਰਥਿਕ ਰਣਨੀਤੀ ਦਾ ਹਿੱਸਾ ਹੈ।