11.1C Vancouver 11.1C VancouverOct 29, 2025 4:09 PM - Connect Newsroom
ਬੀ. ਸੀ. ਨਾਲ ਸਬੰਧਤ ਇੱਕ ਵਿਅਕਤੀ ਨੂੰ ਲਗਭਗ ਤਿੰਨ ਦਹਾਕੇ ਪਹਿਲਾਂ ਓਨਟਾਰੀਓ ਵਿਚ ਨਾਬਾਲਗਾਂ ਨਾਲ ਹੋਈਆਂ ਹਿੰਸਕ ਜਿਨਸੀ ਹਮਲਿਆਂ ਦੀਆਂ ਘਟਨਾਵਾਂ ਦੇ ਸਿਲਸਿਲੇ ਵਿਚ ਗ੍ਰਿਫਤਾਰ ਅਤੇ ਚਾਰਜ ਕੀਤਾ ਗਿਆ ਹੈ। ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਨੇ ਬੁੱਧਵਾਰ ਨੂੰ ਕਿਹਾ ਕਿ ਮੁਲਜ਼ਮ ਬੀ. ਸੀ. ਦੇ ਕੈਂਪਬੈਲ ਰਿਵਰ ਦਾ ਰਹਿਣ ਵਾਲਾ 52 ਸਾਲਾ ਜੇਸਨ ਟਿਮੋਥੀ ਡੇਵਿਡਸਨ ਹੈ, ਜੋ ਹੁਣ 15 ਦੋਸ਼ਾਂ ਦਾ ਸਾਹਮਣਾ ਕਰ ਰਿਹਾ ਹੈ, ਜਿਸ ਵਿਚ ਜਿਨਸੀ ਹਮਲੇ, ਕਿਡਨੈਪਿੰਗ, ਜ਼ਬਰਦਸਤੀ ਬੰਧਕ ਬਣਾਉਣਾ ਅਤੇ ਧਮਕੀਆਂ ਦੇਣ ਦੇ ਦੋਸ਼ ਸ਼ਾਮਲ ਹਨ।
ਪੁਲਿਸ ਨੇ ਕਿਹਾ ਕਿ 1997 ਵਿਚ ਮਾਰਚ ਅਤੇ ਅਗਸਤ ਵਿਚਕਾਰ ਦੱਖਣ-ਪੱਛਮੀ ਓਨਟਾਰੀਓ ਤੋਂ ਲੈਂਬਟਨ ਕਾਉਂਟੀ, ਕੈਂਟ ਕਾਉਂਟੀ ਅਤੇ ਸਾਰਨੀਆ ਸ਼ਹਿਰ ਵਿਚ ਚਾਰ ਵੱਖ-ਵੱਖ ਜਿਨਸੀ ਹਮਲੇ ਹੋਏ ਸਨ। ਉਸ ਸਮੇਂ ਚਾਰ ਪੀੜਤਾਂ ਵਿਚੋਂ ਤਿੰਨ ਨਾਬਾਲਗ ਸਨ। ਓ.ਪੀ.ਪੀ. ਦੇ ਡਿਪਟੀ ਕਮਿਸ਼ਨਰ ਮਾਰਟੀ ਕੇਅਰਨਜ਼ ਨੇ ਦੱਸਿਆ ਕਿ ਡੀ.ਐਨ.ਏ. ਸਬੂਤਾਂ ਨੇ ਹਮਲਿਆਂ ਨੂੰ ਇੱਕ ਸ਼ੱਕੀ ਨਾਲ ਜੋੜਿਆ ਪਰ ਸਾਲਾਂ ਤੱਕ ਉਸ ਦੀ ਪਛਾਣ ਨਹੀਂ ਹੋ ਸਕੀ।
2024 ਵਿਚ ਨਵੀਆਂ ਫੋਰੈਂਸਿਕ ਤਕਨੀਕਾਂ ਨੇ ਸ਼ੱਕੀ ਦੀ ਪਛਾਣ ਕਰਨ ਵਿਚ ਮਦਦ ਕੀਤੀ ਅਤੇ ਡੇਵਿਡਸਨ ਨੂੰ ਐਤਵਾਰ ਨੂੰ ਕੈਂਪਬੈਲ ਰਿਵਰ ਤੋਂ ਆਰ.ਸੀ.ਐਮ.ਪੀ.ਤੇ ਵੈਨਕੂਵਰ ਪੁਲਿਸ ਦੀ ਮਦਦ ਨਾਲ ਗ੍ਰਿਫਤਾਰ ਕੀਤਾ ਗਿਆ ਅਤੇ ਓਨਟਾਰੀਓ ਲਿਜਾਇਆ ਗਿਆ। ਪੁਲਿਸ ਨੇ ਕਿਹਾ ਕਿ ਡੇਵਿਡਸਨ ਹਿਰਾਸਤ ਵਿਚ ਹੈ ਅਤੇ ਉਸ ਦੀ ਕੋਰਟ ਵਿਚ ਪੇਸ਼ੀ ਅੱਜ ਹੋਵੇਗੀ।
