ਹਸਪਤਾਲਾਂ ’ਚ ਨਰਸ-ਮਰੀਜ਼ ਅਨੁਪਾਤ ਕਾਨੂੰਨੀ ਤੌਰ ’ਤੇ ਤੈਅ ਕਰੇਗੀ ਐਨ.ਡੀ.ਪੀ.

ਬੀ.ਸੀ. ਐਨ.ਡੀ.ਪੀ. ਲੀਡਰ ਡੇਵਿਡ ਈਬੀ ਨੇ ਅੱਜ ਸਵੇਰ ਵੈਨਕੂਵਰ ਵਿਚ ਕੰਪੇਨ ਦੌਰਾਨ ਐਲਾਨ ਕੀਤਾ ਕਿ ਉਨ੍ਹਾਂ ਦੀ ਪਾਰਟੀ ਹਸਪਤਾਲਾਂ ਵਿਚ ਮਰੀਜ਼ਾਂ ਅਤੇ ਨਰਸਾਂ ਦੇ ratios ਨੂੰ ਕਾਨੂੰਨੀ ਰੂਪ ਦੇਵੇਗੀ, ਯਾਨੀ ਇੱਕ ਨਰਸ ਵਲੋਂ ਕਿੰਨੇ ਮਰੀਜ਼ ਦੇਖੇ ਜਾ ਸਕਦੇ ਹਨ। ਈਬੀ ਨੇ ਕਿਹਾ ਕਿ ਇਸ ਦੀ ਸ਼ੁਰੂਆਤ ਸਭ ਤੋਂ ਪਹਿਲਾਂ ਐਮਰਜੈਂਸੀ ਰੂਮ ਤੋਂ ਹੋਵੇਗੀ।

ਉਨ੍ਹਾਂ ਇਹ ਵੀ ਦਾਅਵਾ ਕੀਤਾ ਕਿ ਬ੍ਰਿਟਿਸ਼ ਕੋਲੰਬੀਆ ਇਸ ਤਰ੍ਹਾਂ ਦੀ ਗਾਰੰਟੀ ਦੇਣ ਵਾਲਾ ਕੈਨੇਡਾ ਦਾ ਪਹਿਲਾ ਸੂਬਾ ਹੈ, ਜਿਸ ਦੀ ਬਦੌਲਤ ਪਹਿਲਾਂ ਹੀ 4,700 ਤੋਂ ਵੱਧ ਨਰਸਾਂ ਨੂੰ ਸਿਸਟਮ ਵਿਚ ਸ਼ਾਮਲ ਕੀਤਾ ਜਾ ਚੁੱਕਾ ਹੈ। ਈਬੀ ਨੇ ਆਪਣੇ ਚੋਣ ਪਲੈਨ ਵਿਚ ਨਰਸਾਂ, ਨਰਸ ਅਭਿਆਸੀ ਅਤੇ ਸਿਹਤ ਕਰਮਚਾਰੀਆਂ ਲਈ 1,000 ਨਵੀਆਂ ਸਿਖਲਾਈ ਸੀਟਾਂ ਜੋੜਨ ਦਾ ਵਾਅਦਾ ਕੀਤਾ ਹੈ।

ਉਨ੍ਹਾਂ ਇਹ ਵੀ ਦੁਹਰਾਇਆ ਕਿ ਟੈਸਟ ਅਤੇ ਸਰਜਰੀ ਦੇ ਵੇਟਿੰਗ ਟਾਈਮ ਨੂੰ ਵੀ ਘਟਾਇਆ ਜਾਵੇਗਾ। ਇਸ ਦੇ ਨਾਲ ਹੀ ਉਨ੍ਹਾਂ ਆਪਣੀ ਮੁੱਖ ਵਿਰੋਧੀ ਧਿਰ 'ਤੇ ਹਮਲਾ ਕਰਦਿਆਂ ਕਿ ਇਸ ਵਾਰ ਚੋਣਾਂ ਵਿਚ ਜਨਤਾ ਸਾਹਮਣੇ ਬਹੁਤ ਹੀ ਸਪੱਸ਼ਟ ਵਿਕਲਪ ਹੈ ਕਿਉਂਕਿ ਬੀ.ਸੀ. ਕੰਜ਼ਰਵੇਟਿਵਜ਼ ਹੈਲਥ ਵਿਚ ਅਰਬਾਂ ਡਾਲਰਾਂ ਦੀ ਕਟੌਤੀ ਕਰਨ ਦੀ ਯੋਜਨਾ ਲੁਕਾ ਰਹੇ ਹਨ।