ਬੀ.ਸੀ.ਨੇ ਨਿਵੇਸ਼ ਵਧਾਉਣ ਲਈ ਨਵਾਂ ਆਰਥਿਕ ਰੋਡਮੇਪ ਕੀਤਾ ਜਾਰੀ

ਪ੍ਰੀਮੀਅਰ ਡੇਵਿਡ ਈਬੀ ਅਤੇ ਬੀ.ਸੀ.ਦੇ ਜੌਬਸ ਅਤੇ ਆਰਥਿਕ ਵਿਕਾਸ ਮੰਤਰੀ ਰਵੀ ਕਾਹਲੋਂ ਨੇ ਇੱਕ ਮਹੱਤਵਪੂਰਨ 10-ਸਾਲਾ ਆਰਥਿਕ ਰਣਨੀਤੀ ਦਾ ਐਲਾਨ ਕੀਤਾ ਹੈ,ਜਿਸ ਨੂੰ 'ਲੁੱਕ ਵੈਸਟ'ਯੋਜਨਾ ਦਾ ਨਾਂ ਦਿੱਤਾ ਗਿਆ ਹੈ। ਇਸ ਦਾ ਉਦੇਸ਼ 2035 ਤੱਕ ਪ੍ਰਾਈਵੇਟ ਸੈਕਟਰ ਤੋਂ $200 ਬਿਲੀਅਨ ਦਾ ਨਿਵੇਸ਼ ਆਕਰਸ਼ਿਤ ਕਰਨਾ ਅਤੇ ਸੂਬੇ ਨੂੰ ਕੈਨੇਡਾ ਦਾ ਆਰਥਿਕ ਇੰਜਣ ਬਣਾਉਣਾ ਹੈ।

ਈਬੀ ਨੇ ਕਿਹਾ ਕਿ ਬੀ.ਸੀ.ਕਈ ਅਜਿਹੇ ਪ੍ਰੋਜੈਕਟਸ ਦਾ ਘਰ ਹੈ,ਜਿਨ੍ਹਾਂ ਦੀ ਸਫਲਤਾ ਸਮੁੱਚੇ ਦੇਸ਼ ਦੀ ਖੁਸ਼ਹਾਲੀ ਲਈ ਮਹੱਤਵਪੂਰਨ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਇਹ ਰਣਨੀਤੀ ਬੀ.ਸੀ.ਨੂੰ ਅਮਰੀਕਾ ਨਾਲ ਵਪਾਰ ਜੰਗ ਅਤੇ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਟੈਰਿਫਸ ਹਮਲਿਆਂ ਵਿਚਕਾਰ ਆਰਥਿਕ ਅਨਿਸ਼ਚਿਤਤਾ ਦਾ ਸਾਹਮਣਾ ਕਰਨ ਵਿਚ ਮਦਦ ਕਰੇਗੀ।

ਇਸ ਯੋਜਨਾ ਦੀ ਪ੍ਰਮੁੱਖ ਤਰਜੀਹ ਵਿਚ ਨੌਰਥ ਕੋਸਟ ਟਰਾਂਸਮਿਸ਼ਨ ਲਾਈਨ ਵਰਗੇ ਵੱਡੇ ਪ੍ਰੋਜੈਕਟਸ ਨੂੰ ਫੈਡਰਲ ਸਰਕਾਰ ਨਾਲ ਮਿਲ ਕੇ ਫਾਸਟ ਟਰੈਕ ਕਰਨਾ,ਸਕਿਲਡ ਵਰਕਫੋਰਸ ਨੂੰ ਵਧਾਉਣਾ ਅਤੇ ਮਰੀਨ ਐਰੋਸਪੇਸ ਤੇ ਆਰਟੀਫੀਸ਼ੀਅਲ-ਇੰਟੈਲੀਜੈਂਸ ਸੈਕਟਰ ਨੂੰ ਤਰਜੀਹ ਦੇਣਾ ਹੈ,ਇਹ ਸਾਰੇ ਖੇਤਰ ਅਮਰੀਕਾ ਤੋਂ ਟਰੇਡ ਨੂੰ ਨਵੇਂ ਬਜ਼ਾਰਾਂ ਤੱਕ ਲਿਜਾਣ ਦਾ ਜ਼ਰੀਆ ਹਨ। ਕਾਹਲੋਂ ਨੇ ਕਿਹਾ ਕਿ ਔਟਵਾ ਵਪਾਰ ਨੂੰ ਏਸ਼ੀਆ ਵੱਲ ਸ਼ਿਫਟ ਕਰ ਰਿਹਾ ਹੈ,ਜੋ ਸਾਡੇ ਪੋਰਟਸ ਤੋਂ ਹੋ ਕੇ ਲੰਘੇਗਾ,ਇਸ ਲਈ ਇਨਫਰਾਸਟਕਚਰ ਦਾ ਵਿਸਥਾਰ ਕਰਨ ਦੇ ਤਰੀਕੇ ਮਿਲ ਕੇ ਤਲਾਸ਼ੇ ਜਾਣਗੇ।