ਫੌਲ ਦੌਰਾਨ ਬੀ.ਸੀ. ਦੀ ਪੈਨਡੇਮਿਕ ਨਾਲ ਨਜਿੱਠਣ ਬਾਰੇ ਯੋਜਨਾ ਸੂਬੇ ਵੱਲੋਂ ਕੀਤੀ ਗਈ ਸਾਂਝੀ

ਬੀ.ਸੀ. ਦੇ ਪ੍ਰੀਮੀਅਰ ਜੌਨ ਹੌਰਗਨ ਨੇ ਕਿਹਾ ਹੈ ਕਿ ਫੌਲ ਅਤੇ ਸਰਦੀਆਂ ਵਿੱਚ ਕੋਵਿਡ-19 ਨਾਲ ਨਜਿੱਠਣ ਲਈ ਸਰਕਾਰ ਵੱਲੋਂ ਸਿਹਤ ਪ੍ਰਣਾਲੀ 'ਤੇ 1.6 ਬਿਲੀਅਨ ਡੌਲਰ ਖਰਚੇ ਜਾ ਰਹੇ ਹਨ।

ਇਸ ਦੇ ਜ਼ਰੀਏ ਸਿਹਤ ਦੇਖਭਾਲ ਸਹਾਇਤਾ ਕਰਮਚਾਰੀਆਂ ਲਈ 7,000 ਨੌਕਰੀਆਂ ਅਤੇ ਸੂਬੇ ਦੀ ਫਲੂ ਟੀਕਾਕਰਨ ਯੋਜਨਾ ਵਿੱਚ ਵਿਸਥਾਰ ਦੇ ਨਾਲ ਹੀ ਇੱਕ ਨਵਾਂ 'ਹੌਸਪੀਟਲ ਐਟ ਹੋਮ' ਪ੍ਰੋਗਰਾਮ ਸ਼ੁਰੂ ਕੀਤਾ ਜਾ ਰਿਹਾ ਹੈ।

ਬੀ.ਸੀ. ਦੀ ਫੌਲ ਵਿੱਚ ਕੋਵਿਡ-19 ਨਾਲ ਨਜਿੱਠਣ ਲਈ ਤਿਆਰੀ ਬਾਰੇ ਗੱਲ ਕਰਦਿਆਂ ਪ੍ਰੀਮੀਅਰ ਹੌਰਗਨ ਨੇ ਦੱਸਿਆ ਕਿ ਸਰਕਾਰ ਨੇ ਫਲੂ ਵੈਕਸੀਨ ਦੀਆਂ 4.5 ਲੱਖ ਹੋਰ ਡੋਜ਼ਿਜ਼ ਹਾਸਲ ਕਰ ਲਈਆਂ ਹਨ।

ਪ੍ਰੀਮੀਅਰ ਹੌਰਗਨ ਨੇ ਦੱਸਿਆ ਕਿ 'ਹੌਸਪੀਟਲ ਐਟ ਹੋਮ' ਪ੍ਰੋਗਰਾਮ ਦੇ ਜ਼ਰੀਏ , ਯੋਗ ਮਰੀਜਾਂ ਨੂੰ ਸਿਹਤ ਦੇਖਭਾਲ ਸੇਵਾਵਾਂ ਐਕਿਊਟ ਕੇਅਰ ਸਹੂਲਤਾਂ ਤੋਂ ਬਾਹਰ , ਉਨ੍ਹਾਂ ਦੇ ਆਪਣੇ ਘਰ ਵਿੱਚ ਹੀ ਦਿੱਤੀਆਂ ਜਾ ਸਕਣਗੀਆਂ।

ਪ੍ਰੀਮੀਅਰ ਹੌਰਗਨ ਨੇ ਦੱਸਿਆ ਕਿ ਇਸ ਪ੍ਰੋਗਰਾਮ ਦਾ ਅਹਿਮ ਹਿੱਸਾ , ਸਿਹਤ ਦੇਖਭਾਲ ਦਾ ਤਜਰਬਾ ਨਾ ਰੱਖਣ ਵਾਲੇ ਲੋਕਾਂ ਨੂੰ ਔਨ-ਜੌਬ ਟ੍ਰੇਨਿੰਗ ਦੇਣਾ ਹੈ।

ਇਸ ਮੌਕੇ 'ਤੇ ਪ੍ਰੀਮੀਅਰ ਹੌਰਗਨ ਨਾਲ ਹੈਲਥ ਮਿਨਿਸਟਰ ਐਡਰੀਅਨ ਡਿਕਸ ਅਤੇ ਸੂਬਾਈ ਸਿਹਤ ਅਫਸਰ ਡਾ. ਬੌਨੀ ਹੈਨਰੀ ਵੀ ਮੌਜੂਦ ਸਨ।

ਸਿਹਤ ਅਧਿਕਾਰੀਆਂ ਨੇ ਫੌਲ ਵਿੱਚ ਕੋਵਿਡ-19 ਨਾਲ ਨਜਿੱਠਣ ਲਈ ਤਿਆਰੀ ਬਾਰੇ ਵੇਰਵੇ ਸਾਂਝੇ ਕਰਦਿਆਂ ਦੱਸਿਆ ਕਿ ਹਸਪਤਾਲਾਂ ਵਿੱਚ ਬੈੱਡਜ਼ ਦੀ ਉਪਲਬਧਤਾ ਲਈ, ਮਾਰਚ ਵਿੱਚ ਸਾਰੀ ਸਿਹਤ ਪ੍ਰਣਾਲੀ ਵਿੱਚ ਬੈੱਡ ਓਕਿਊਪੈਂਸੀ ਘਟਾਉਣ ਦੇ ਉਲਟ, ਹਰ ਖੇਤਰ ਦੀ ਜ਼ਰੂਰਤ ਮੁਤਾਬਕ ਇੱਕ ਪੜ੍ਹਾਆ-ਵਾਰ ਪ੍ਰਕਿਰਿਆ ਅਪਣਾਈ ਜਾਵੇਗੀ।