18.6C Vancouver 18.6C VancouverJul 27, 2020 11:35 PM -
ਐਬਟਸਫੋਰਡ ਵਿੱਚ ਕੋਵਿਡ-19 ਦੇ 15 ਨਵੇਂ ਮਾਮਲੇ ਰਿਪੋਰਟ ਹੋਏ ਹਨ।
ਇਹ ਮਾਮਲੇ ਇੱਕ ਬੈਰੀ ਪੈਕਿੰਗ ਪਲਾਂਟ 'ਤੇ ਉਜਾਗਰ ਹੋਈ ਆਊਟਬ੍ਰੇਕ ਨਾਲ ਸੰਬੰਧਤ ਦੱਸੇ ਗਏ ਹਨ।
ਬੀ.ਸੀ. ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਨੇ ਦੱਸਿਆ ਕਿ ਸਿਹਤ ਅਧਿਕਾਰੀਆਂ ਨੇ ਵੀਰਵਾਰ ਨੂੰ ਇਸ ਮਾਮਲੇ 'ਚ ਜਾਂਚ ਸ਼ੁਰੂ ਕੀਤੀ ਸੀ ਅਤੇ ਹੋਰ ਲੋਕਾਂ ਦੀ ਭਾਲ ਕੀਤੀ ਜਾ ਰਹੀ ਹੈ, ਜੋ ਕਿ ਸੰਕ੍ਰਮਿਤ ਹੋਏ ਹੋ ਸਕਦੇ ਹਨ।
ਉਨ੍ਹਾਂ ਦੱਸਿਆ ਕਿ ਸੂਬੇ ਦੇ 1,010 ਲੋਕਾਂ ਨੂੰ ਹੁਣ ਤੱਕ ਖੁਦ ਨੂੰ ਇਕੱਲੇ 'ਚ ਰੱਖਣ ਲਈ ਕਹਿ ਦਿੱਤਾ ਗਿਆ ਹੈ।
ਅਜਿਹਾ ਇਸਲਈ ਕੀਤਾ ਗਿਆ ਹੈ ਕਿ ਇਹ ਲੋਕ ਉਨ੍ਹਾਂ ਲੋਕਾਂ ਦੇ ਸੰਪਰਕ 'ਚ ਆਏ ਸਨ, ਜੋ ਕਿ ਕੋਰੋਨਾ ਵਾਇਰਸ ਤੋਂ ਪੀੜਤ ਪਾਏ ਗਏ ਹਨ।
ਇਕੱਠ ਸੰਬੰਧੀ ਕੀਤੇ ਜਾ ਰਹੇ ਬਦਲਾਅ 'ਚ ਵਕੇਸ਼ਨ ਰੈਂਟਲ ਸੰਬੰਧੀ ਬਦਲਾਅ ਸ਼ਾਮਿਲ ਹਨ, ਜਿਸ ਤਹਿਤ ਹੋਟਲ ਦੇ ਕਮਰਿਆਂ, ਹਾਊਸ ਬੋਟਸ ਜਾਂ ਫੇਰ ਹੋਰ ਕਿਰਾਏ 'ਤੇ ਲੈਣ ਵਾਲੀ ਰਿਹਾਇਸ਼ 'ਚ ਯੂਨਿਟ ਦੀ ਕਪੈਸਟੀ ਦੇ ਅਨੁਸਾਰ ਹੀ ਲੋਕ ਰੁਕ ਸਕਣਗੇ, ਜਾਂ ਇਸ ਵਿੱਚ 5 ਲੋਕਾਂ ਤੱਕ ਦਾ ਹੀ ਵਾਧਾ ਕੀਤਾ ਜਾ ਸਕੇਗਾ।
ਸੋਮਵਾਰ ਨੂੰ ਬੀ.ਸੀ. 'ਚ ਕੋਰੋਨਾ ਵਾਇਰਸ ਦੇ 81 ਹੋਰ ਮਾਮਲੇ ਸਾਹਮਣੇ ਆਉਣ ਦੀ ਜਾਣਕਾਰੀ ਦਿੱਤੀ ਗਈ ਹੈ।
ਇਹ ਅੰਕੜਾ ਬੀਤੇ 72 ਘੰਟਿਆਂ ਦਾ ਅੰਕੜਾ ਦਰਸ਼ਾਉਂਦਾ ਹੈ, ਜਿਸ ਦੇ ਵਿੱਚ ਸ਼ੁੱਕਰਵਾਰ ਦੇ 35 ਮਾਮਲੇ, ਸ਼ਨੀਵਾਰ ਦੇ 27 ਮਾਮਲੇ ਅਤੇ ਐਤਵਾਰ ਦੇ 24 ਮਾਮਲੇ ਸ਼ਾਮਿਲ ਹਨ।
ਹਾਲਾਂਕਿ ਦੋ ਹੋਰ ਵਾਇਰਸ ਪੀੜਤਾਂ ਦੇ ਦਮ ਤੋੜਨ ਬਾਰੇ ਜਾਣਕਾਰੀ ਦਿੱਤੀ ਗਈ ਹੈ, ਜੋ ਕਿ ਦੁੱਖ ਦੀ ਖਬਰ ਹੈ।
ਹੁਣ ਬੀ.ਸੀ. 'ਚ ਕੋਵਿਡ-19 ਦੇ ਕੁੱਲ ਮਾਮਲਿਆਂ ਦੀ ਗਿਣਤੀ 3,500 ਹੋ ਗਈ ਹੈ।
ਬੀ.ਸੀ. ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਅਤੇ ਸਿਹਤ ਮੰਤਰੀ ਐਡਰੀਅਨ ਡਿਕਸ ਨੇ ਇੱਕ ਪ੍ਰੈਸ ਬ੍ਰੀਫਿੰਗ ਜ਼ਰੀਏ ਅੱਜ ਦੇ ਅੰਕੜੇ ਸਾਂਝੇ ਕੀਤੇ।
ਸੂਬੇ 'ਚ ਵਾਇਰਸ ਸੰਬੰਧੀ ਮੌਤਾਂ ਦੀ ਗਿਣਤੀ 193 ਹੈ।
ਹਾਈਡਾ ਗਵਾਈ ਇਲਾਕੇ 'ਚ ਕਮਿਊਨਿਟੀ ਆਊਟਬ੍ਰੇਕ ਦਾ ਮਾਮਲਾ ਦਰਜ ਹੋਣ ਤੋਂ ਬਾਅਦ, ਅੱਜ ਇੱਕ ਹੋਰ ਮਾਮਲੇ ਦੇ ਵਾਧੇ ਦੀ ਜਾਣਕਾਰੀ ਦਿੱਤੀ ਗਈ ਹੈ।
ਇਸ ਇਲਾਕੇ 'ਚ ਵਾਇਰਸ ਦੇ 14 ਮਾਮਲੇ ਉਜਾਗਰ ਹੋਏ ਹਨ।
