14.38C Vancouver 14.38C VancouverSep 11, 2020 9:15 PM -
ਬੀ.ਸੀ. 'ਚ ਐਨ.ਡੀ.ਪੀ. ਸਰਕਾਰ ਦਾ ਕਹਿਣਾ ਹੈ ਕਿ, ਸੂਬੇ 'ਚ ਬੈਂਕੁਇਟ ਹਾਲਸ ਅਤੇ ਨਾਈਟ ਕਲੱਬਜ਼ ਨੂੰ ਬੰਦ ਕਰਨ ਦਾ ਫੈਸਲਾ, ਬੀ.ਸੀ. ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਵੱਲੋਂ ਲਿਆ ਗਿਆ ਹੈ।
ਮਾਮਲੇ ਸੰਬੰਧੀ ਬੈਂਕੁਇਟ ਹਾਲਸ ਵੱਲੋਂ ਫੈਸਲੇ 'ਤੇ ਉਠਾਏ ਗਏ ਸਵਾਲਾਂ ਤੋਂ ਬਾਅਦ, ਸਿਹਤ ਮੰਤਰਾਲੇ ਨੇ ਸਪਸ਼ਟੀਕਰਨ ਦਿੰਦੇ ਹੋਏ ਦੱਸਿਆ ਹੈ ਕਿ ਡਾ. ਹੈਨਰੀ ਨੇ ਇਹ ਫੈਸਲਾ ਕੋਵਿਡ-19 ਦੇ ਸੰਕ੍ਰਮਣ ਨਾਲ ਸੰਬੰਧਤ ਖਤਰੇ ਕਾਰਨ ਲਿਆ ਹੈ।
ਇਹ ਵੀ ਦੱਸਿਆ ਗਿਆ ਕਿ ਫੈਸਲਾ ਸਿਰਫ਼ ਬੈਂਕੁਇਟ ਹਾਲਸ ਤੱਕ ਹੀ ਸੀਮਤ ਨਹੀਂ ਹੈ, ਬਲਕਿ ਇਸ ਨਾਲ ਨਾਈਟ ਕਲੱਬਜ਼ ਅਤੇ ਬਾਰਜ਼ ਅਤੇ ਇਸ ਤੋਂ ਇਲਾਵਾ ਸ਼ਰਾਬ ਦੀ ਵਿਕਰੀ ਵੀ ਪ੍ਰਭਾਵਿਤ ਹੋਈ ਹੈ। ਦੱਸਿਆ ਗਿਆ ਕਿ ਸਿਹਤ ਅਧਿਕਾਰੀਆਂ ਨੇ ਇਹ ਫੈਸਲਾ, ਬੈਂਕੁਇਟ ਹਾਲਸ, ਬਾਰਜ਼ ਅਤੇ ਰੈਸਟੂਰੈਂਟਾਂ 'ਚ ਲਗਾਤਾਰ ਵਾਪਰਦੇ ਸੰਕ੍ਰਮਣ ਦੇ ਮਾਮਲਿਆਂ ਕਾਰਨ ਲਿਆ ਹੈ।
ਅੱਜ ਦਾ ਡਾ. ਬੌਨੀ ਹੈਨਰੀ ਦਾ ਇੱਕ ਬਿਆਨ ਵੀ ਜਾਰੀ ਕੀਤਾ ਗਿਆ ਹੈ, ਜਿਸ 'ਚ ਉਨ੍ਹਾਂ ਕਿਹਾ ਹੈ ਕਿ, "ਅਜਿਹਾ ਫੈਸਲਾ ਹੋਟਲਾਂ 'ਚ ਹੋ ਰਹੀਆਂ ਛੋਟੀਆਂ ਪਾਰਟੀਆਂ ਲਈ ਨਹੀਂ ਲਿਆ ਗਿਆ ਹੈ, ਜਿੱਥੇ ਨਿਰਦੇਸ਼ਾਂ ਦੀ ਪਾਲਣਾ ਹੁੰਦੀ ਜਾਪ ਰਹੀ ਹੈ। ਇਹ ਫੈਸਲਾ ਛੋਟੇ ਪੱਬਜ਼ ਲਈ ਨਹੀਂ ਹੈ, ਜਿੱਥੇ ਕੁਝ ਬੈਂਕੁਇਟ ਰੂਮ ਹਨ। ਇਹ ਫੈਸਲਾ ਉਨ੍ਹਾਂ ਥਾਵਾਂ 'ਤੇ ਧਿਆਨ ਕੇਂਦਰਿਤ ਕਰਨ ਲਈ ਹੈ, ਜਿੱਥੇ ਸਾਨੂੰ ਮੁਸੀਬਤ ਵਿਖਾਈ ਦੇ ਰਹੀ ਹੈ। ਸਾਨੂੰ ਪਤਾ ਹੈ ਕਿ ਉੱਥੇ ਟ੍ਰਾਂਸਮਿਸ਼ਨ ਹੋ ਰਹੀ ਹੈ।"
ਇਸ ਤੋਂ ਪਹਿਲਾਂ ਮੰਗਲਵਾਰ ਦੀ ਕੋਵਿਡ-19 ਸੰਬੰਧੀ ਪ੍ਰੈਸ ਬ੍ਰੀਫਿੰਗ ਦੌਰਾਨ, ਡਾ. ਬੌਨੀ ਹੈਨਰੀ ਨੇ ਨਾਈਟ ਕਲੱਬਜ਼ ਅਤੇ ਬੈਂਕੁਇਟ ਹਾਲਸ ਅਤੇ ਸ਼ਰਾਬ ਦੀ ਵਿਕਰੀ ਸੰਬੰਧੀ ਪਬੰਦੀਆਂ ਦੇ ਨਿਰਦੇਸ਼ ਜਾਰੀ ਕੀਤੇ ਸਨ।
ਹੋਟਲਾਂ ਅਤੇ ਬੈਂਕੁਇਟ ਹਾਲਸ ਦਾ ਫਰਕ ਦੱਸਦੇ ਹੋਏ, ਜਾਣਕਾਰੀ ਦਿੱਤੀ ਗਈ ਕਿ ਹੋਟਲਾਂ ਦੇ ਬੈਂਕੁਇਟ ਹਮਰੇ ਛੋਟੇ ਹੁੰਦੇ ਹਨ, ਅਤੇ ਉੱਥੇ ਦਾ ਸਟਾਫ਼ ਆਮ ਤੌਰ 'ਤੇ ਵਧੇਰੇ ਹੁੰਦਾ ਹੈ, ਅਤੇ ਮਾਹੌਲ ਵਧੇਰੇ ਨਿਯੰਤਰਣ ਵਾਲਾ ਹੁੰਦਾ ਹੈ।
ਇਸ ਦੇ ਨਾਲ ਇਕੱਠ ਨੂੰ ਸੰਭਾਲਣਾ ਅਤੇ ਲੋਕ ਸਿਹਤ ਨਿਰਦੇਸ਼ਾਂ ਦੀ ਪਾਲਣਾ ਕਰਨਾ ਆਸਾਨ ਹੋ ਜਾਂਦਾ ਹੈ।
ਇਹ ਵੀ ਦੱਸਿਆ ਗਿਆ ਕਿ 20 ਅਗਸਤ ਨੂੰ ਬੀ.ਸੀ. ਬੈਂਕੁਇਟ ਹਾਲਸ ਐਸੋਸੀਏਅਸ਼ਨ ਨੇ ਸੂਬਾ ਸਰਕਾਰ ਨਾਲ ਸੰਪਰਕ ਬਣਾਇਆ ਸੀ, ਅਤੇ ਇਨ੍ਹਾਂ ਹਾਲਸ ਨੂੰ ਬੰਦ ਕਰਨ ਦੀ ਮੰਗ ਕੀਤੀ ਸੀ, ਅਤੇ ਇਸ ਦਾ ਕਾਰਨ ਦੱਸਿਆ ਗਿਆ ਸੀ ਕਿ ਕਈ ਮੈਂਬਰਾਂ ਲਈ ਲੋਕ ਸਿਹਤ ਨਿਰਦੇਸ਼ਾਂ ਦੀ ਪਾਲਣਾ ਕਰਨਾ ਮੁਸ਼ਕਿਲ ਸਾਬਿਤ ਹੋ ਰਿਹਾ ਹੈ ਅਤੇ ਇਸ ਦੇ ਸੰਬੰਧੀ ਕਸਟਮਰਜ਼ ਵੱਲੋਂ ਬਣਾਇਆ ਜਾ ਰਿਹਾ ਦਬਾਅ ਕਾਰਨ ਦੱਸਿਆ ਗਿਆ ਸੀ।
ਸਰਕਾਰ ਦਾ ਕਹਿਣਾ ਹੈ ਕਿ ਅਜਿਹੀ ਸ਼ਿਕਾਇਤ ਹੋਰ ਕਿਸੇ ਵੈਨਿਊਜ਼ ਤੋਂ ਨਹੀਂ ਮਿਲੇ ਹਨ।
ਇਨ੍ਹਾਂ ਜਾਣਕਾਰੀਆਂ 'ਚ ਇਹ ਵੀ ਸ਼ਾਮਿਲ ਕੀਤਾ ਗਿਆ ਹੈ ਕਿ ਬੈਂਕੁਇਟ ਹਾਲਸ ਅਤੇ ਨਾਈਟ ਕਲੱਬਜ਼ 'ਚ ਸੰਕ੍ਰਮਣ ਦੇ ਖਤਰੇ ਦਾ ਸਾਹਮਣਾ ਕਰ ਰਹੇ ਲੋਕਾਂ ਤੱਕ ਪਹੁੰਚ ਕਰਨਾ ਵੀ ਮੁਸ਼ਕਿਲ ਹੋ ਰਿਹਾ ਹੈ, ਅਤੇ ਆਉਣ-ਜਾਣ ਵਾਲਿਆਂ ਦੀ ਪੂਰੀ ਜਾਣਕਾਰੀ ਨਹੀਂ ਮਿਲ ਰਹੀ ਹੈ।
ਯਾਦ ਰਹੇ ਇਹ ਸਪਸ਼ਟੀਕਰਨ ਉਸ ਵੇਲੇ ਆਇਆ ਹੈ, ਜਦ ਵੀਰਵਾਰ ਨੂੰ ਬੀ.ਸੀ. ਬੈਂਕੁਇਟ ਹਾਲਸ ਐਸੋਸੀਏਅਸ਼ਨ ਨੇ, ਬੈਂਕੁਇਟ ਹਾਲਸ ਬੰਦ ਕੀਤੇ ਜਾਣ ਦੇ ਫੈਸਲੇ 'ਤੇ ਸਰਕਾਰ ਦੀ ਆਲੋਚਨਾ ਕਰਦੇ ਹੋਏ ਸਵਾਲ ਚੁੱਕੇ ਸਨ।
