14.37C Vancouver 14.37C VancouverJul 16, 2020 7:43 PM -
ਬ੍ਰਿਟਿਸ਼ ਕੋਲੰਬੀਆ ਦੇ ਵਿੱਚ ਓਵਰਡੋਜ਼ ਸੰਬੰਧੀ ਮੌਤਾਂ ਦੀ ਗਿਣਤੀ ਇੱਕ ਵਾਰ ਫਿਰ ਤੋਂ ਰਿਕਾਰਡ ਤੋੜ ਗਈ ਹੈ।
ਬੀ.ਸੀ. ਕੋਰੋਨਰਜ਼ ਸਰਵਿਸ ਦਾ ਕਹਿਣਾ ਹੈ ਕਿ ਜੂਨ ਦੇ ਮਹੀਨੇ 'ਚ ਦਰਜ ਹੋਈਆਂ ਓਵਰਡੋਜ਼ ਸੰਬੰਧੀ ਮੌਤਾਂ ਦੀ ਗਿਣਤੀ 175 ਰਹੀ।
ਇਹ ਮਈ ਦੇ ਮਹੀਨੇ 'ਚ ਦਰਜ ਕੀਤੇ ਗਏ 171 ਮੌਤਾਂ ਦੇ ਰਿਕਾਰਡ ਅੰਕੜੇ ਨੂੰ ਵੀ ਟੱਪ ਗਈ ਹੈ।
ਸੂਬੇ ਦੇ ਇਤਿਹਾਸ 'ਚ ਇੱਕੋ ਮਹੀਨੇ 'ਚ ਓਵਰਡੋਜ਼ ਸੰਬੰਧੀ ਮੌਤਾਂ ਦੀ ਇੰਨੀ ਵੱਡੀ ਗਿਣਤੀ ਪਹਿਲਾਂ ਕਦੀ ਦਰਜ ਨਹੀਂ ਕੀਤੀ ਗਈ। ਚੀਫ਼ ਕੋਰੋਨਰ ਲੀਜ਼ਾ ਲਾਪਾਇੰਟ ਦਾ ਕਹਿਣਾ ਹੈ ਕਿ ਪੈਂਡੇਮਿਕ ਕਾਰਨ ਲੋਕਾਂ ਤੱਕ ਨਸ਼ਿਆਂ ਸੰਬੰਧੀ ਨੁਕਸਾਨ ਦੇ ਘਾਟੇ ਵਾਲੀਆਂ ਕਈ ਸੇਵਾਵਾਂ ਸੀਮਤ ਹੋ ਗਈਆਂ ਹਨ, ਪਰ ਇਸ ਦਾ ਇਹ ਮਤਲਬ ਨਹੀਂ ਹੈ ਕਿ ਲੋਕਾਂ ਵੱਲੋਂ ਅਸੁਰੱਖਿਅਤ ਤਰੀਕੇ ਨਾਲ ਨਸ਼ਿਆਂ ਦਾ ਸੇਵਨ ਕੀਤਾ ਜਾਵੇ।
ਉਨ੍ਹਾਂ ਕਿਹਾ ਕਿ ਨਸ਼ਿਆਂ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਕਿਸੇ ਦੀ ਮੌਜੂਦਗੀ 'ਚ ਹੀ ਅਜਿਹਾ ਕਰਨਾ ਚਾਹੀਦਾ ਹੈ, ਜਾਂ ਕਿਸੇ ਅਜਿਹੀ ਜਗ੍ਹਾ ਤੱਕ ਪਹੁੰਚ ਕਰਨੀ ਚਾਹੀਦੀ ਹੈ, ਜਿੱਥੇ ਉਹ ਨਿਗਰਾਨੀ ਹੇਠ ਇਸ ਦਾ ਸੇਵਨ ਕਰਨ।
ਲਾਪਾਇੰਟ ਨੇ ਦੱਸਿਆ ਕਿ ਕੋਕੇਨ, ਮੈਥਮਫਿਟਾਮੀਨ ਅਤੇ ਐਮਫਿਟਾਮੀਨ ਅਜਿਹੇ ਨਸ਼ੇ ਹਨ, ਜਿੰਨਾ ਦਾ ਇਨ੍ਹਾਂ ਓਵਰਡੋਜ਼ ਸੰਬੰਧੀ ਮੌਤਾਂ ਦੇ ਵਧੇਰੇ ਮਾਮਲਿਆਂ 'ਚ ਸੇਵਨ ਕੀਤਾ ਗਿਆ ਸੀ।
ਉਨ੍ਹਾਂ ਕਿਹਾ ਕਿ ਫੈਂਟਾਨੀਲ ਦਾ ਗੈਰਕਨੂੰਨੀ ਨਸ਼ਾ ਇਨ੍ਹਾਂ ਮੌਤਾਂ 'ਚ ਸਭ ਤੋਂ ਵੱਡਾ ਕਾਰਨ ਵਿਖਾਈ ਦੇ ਰਿਹਾ ਹੈ।
