9.25C Vancouver 9.25C VancouverApr 1, 2026 3:12 PM - Connect Newsroom - Ramandeep Kaur with files from The Canadian Press
ਬ੍ਰਿਟਿਸ਼ ਕੋਲੰਬੀਆ ਦੇ ਟੰਬਲਰ ਰਿਜ ਵਿਚ ਹੋਈ ਸਮੂਹਿਕ ਗੋਲੀਬਾਰੀ ਦੀ ਪੀੜਤ 12 ਸਾਲਾ ਮਾਇਆ ਗੇਬਾਲਾ ਆਈ. ਸੀ. ਯੂ. ਤੋਂ ਬਾਹਰ ਆ ਗਈ ਹੈ, ਬੱਚੀ ਦੇ ਪਿਤਾ ਡੇਵਿਡ ਗੇਬਾਲਾ ਮੁਤਾਬਕ, ਉਨ੍ਹਾਂ ਦੀ ਧੀ ਨੂੰ ਹੁਣ ਰਿਕਵਰੀ ਅਤੇ ਰਿਹੈਬਿਲੀਟੇਸ਼ਨ ਯੂਨਿਟ ਵਿਚ ਰੱਖਿਆ ਗਿਆ ਹੈ। ਡੇਵਿਡ ਨੇ ਮੰਗਲਵਾਰ ਨੂੰ ਇੱਕ ਫੇਸਬੁੱਕ ਪੋਸਟ ਰਾਹੀਂ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਹੁਣ ਮਾਇਆ ਨੂੰ ਪਹਿਲਾਂ ਜਿੰਨਾ ਦਰਦ ਮਹਿਸੂਸ ਨਹੀਂ ਹੋ ਰਿਹਾ।
ਉਨ੍ਹਾਂ ਕਿਹਾ ਕਿ ਮਾਇਆ ਹੁਣ ਜ਼ਿਆਦਾ ਊਰਜਾਵਾਨ ਨਜ਼ਰ ਆ ਰਹੀ ਹੈ ਅਤੇ ਉਸ ਦੇ ਚਿਹਰੇ ਦੀ ਰੰਗਤ ਵੀ ਵਾਪਸ ਆ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਆਈ.ਸੀ.ਯੂ. ਵਿਚ ਬਿਤਾਇਆ ਗਿਆ ਸਮਾਂ ਉਤਾਰ-ਚੜ੍ਹਾਅ ਨਾਲ ਭਰੇ ਤੂਫਾਨ ਵਰਗਾ ਸੀ। ਡੇਵਿਡ ਗੇਬਾਲਾ ਨੇ ਦੱਸਿਆ ਕਿ ਜਦੋਂ ਹਸਪਤਾਲ ਦੇ ਥੈਰੇਪਿਸਟ ਦੀ ਮਦਦ ਨਾਲ ਮਾਇਆ ਪਹਿਲੀ ਵਾਰ ਉੱਠ ਕੇ ਬੈਠੀ ਤਾਂ ਉਹ ਬਹੁਤ ਭਾਵੁਕ ਹੋ ਗਏ ਸਨ।
ਉਨ੍ਹਾਂ ਕਿਹਾ ਮੈਂ ਆਖ਼ਰਕਾਰ ਆਪਣੀ ਧੀ ਨੂੰ ਆਪਣੀਆਂ ਬਾਹਾਂ ਵਿਚ ਲੈਣ ਦੇ ਕਾਬਲ ਹੋ ਗਿਆ ਅਤੇ ਮੈਂ ਸ਼ਬਦਾਂ ਵਿਚ ਬਿਆਨ ਨਹੀਂ ਕਰ ਸਕਦਾ ਕਿ ਉਸ ਵੇਲੇ ਮੈਨੂੰ ਕਿਵੇਂ ਮਹਿਸੂਸ ਹੋਇਆ, ਮੇਰਾ ਜੀਅ ਕਰਦਾ ਸੀ ਕਿ ਉਸ ਨੂੰ ਚੁੱਕ ਕੇ ਆਪਣੇ ਸੀਨੇ ਨਾਲ ਲਗਾ ਲਵਾਂ ਅਤੇ ਕਦੇ ਵੀ ਨਾ ਛੱਡਾਂ। ਗੌਰਤਲਬ ਹੈ ਕਿ ਮਾਇਆ ਦਾ ਇਲਾਜ ਵੈਨਕੂਵਰ ਦੇ ਬੀ.ਸੀ.ਚਿਲਡਰਨ ਹਸਪਤਾਲ ਵਿਚ ਚੱਲ ਰਿਹਾ ਹੈ।
