13.55C Vancouver 13.55C VancouverFeb 26, 2026 5:39 PM - Connect Newsroom - Ramandeep Kaur
ਬੀ. ਸੀ. ਦੀ ਪਬਲਿਕ ਸੇਫਟੀ ਮਿਨਿਸਟਰ ਨੀਨਾ ਕ੍ਰੀਗਰ ਨੇ ਫੈਡਰਲ ਸਰਕਾਰ ਅਤੇ ਸੈਨੇਟ ਕਮੇਟੀ ਨੂੰ ਪੱਤਰ ਲਿਖ ਕੇ ਬਿੱਲ ਸੀ-12 ਨੂੰ ਤੇਜ਼ੀ ਨਾਲ ਪਾਸ ਕਰਨ ਦੀ ਅਪੀਲ ਕੀਤੀ ਹੈ ਤਾਂ ਜੋ ਇਮੀਗ੍ਰੇਸ਼ਨ ਦੀਆਂ ਉਨ੍ਹਾਂ ਕਮੀਆਂ ਨੂੰ ਬੰਦ ਕੀਤਾ ਜਾ ਸਕੇ ਜਿਨ੍ਹਾਂ ਦਾ ਫਾਇਦਾ ਐਕਸਟੋਸ਼ਨ ਅਤੇ ਓਰਗਨਾਈਜ਼ਡ ਕ੍ਰਾਈਮ ਵਿਚ ਸ਼ਾਮਲ ਮੁਲਜ਼ਮ ਡਿਪੋਰਟ ਹੋਣ ਤੋਂ ਬਚਣ ਲਈ ਉਠਾ ਰਹੇ ਹਨ।
ਕ੍ਰੀਗਰ ਨੇ ਇਸ ਸਬੰਧੀ ਫੈਡਰਲ ਪਬਲਿਕ ਸੇਫਟੀ ਮਨਿਸਟਰ ਗੈਰੀ ਆਨੰਦਸੰਗਰੀ ਅਤੇ ਸੈਨੇਟ ਦੀ ਸਟੈਂਡਿੰਗ ਕਮੇਟੀ ਨੂੰ ਪੱਤਰ ਲਿਖ ਕੇ ਤੁਰੰਤ ਕਾਰਵਾਈ ਦੀ ਮੰਗ ਕੀਤੀ ਹੈ। ਕ੍ਰੀਗਰ ਨੇ ਕਿਹਾ ਕਿ ਕੁਝ ਅਪਰਾਧੀ ਕੈਨੇਡਾ ਵਿਚ ਰਹਿਣ ਅਤੇ ਸਜ਼ਾ ਤੋਂ ਬਚਣ ਲਈ ਇਮੀਗ੍ਰੇਸ਼ਨ ਨਿਯਮਾਂ ਅਤੇ ਰਫਿਊਜੀ ਸਟੇਟਸ ਦੀ ਗਲਤ ਵਰਤੋਂ ਕਰ ਰਹੇ ਹਨ ਅਤੇ ਬਿੱਲ ਸੀ-12 ਦੇ ਜਲਦ ਕਾਨੂੰਨ ਬਣਨ ਨਾਲ ਇਸ 'ਤੇ ਰੋਕ ਲੱਗੇਗੀ।
ਮਿਨਿਸਟਰ ਨੇ ਕਿਹਾ ਕਿ ਬੀ.ਸੀ. ਪੁਲਿਸ ਨੇ ਅਜਿਹੇ ਕਈ ਮਾਮਲੇ ਦੇਖੇ ਹਨ ਜਿੱਥੇ ਐਕਸਟੋਸ਼ਨ ਵਿਚ ਸ਼ਾਮਲ ਵਿਅਕਤੀਆਂ ਕੋਲ ਜਾਂ ਤਾਂ ਐਕਸਪਾਇਰ ਹੋ ਚੁੱਕੇ ਵੀਜ਼ਾ ਸਨ ਜਾਂ ਉਹ non-compliant ਸਟੂਡੈਂਟ ਵੀਜ਼ੇ 'ਤੇ ਕੈਨੇਡਾ ਵਿਚ ਸਨ।
ਉਨ੍ਹਾਂ ਕਿਹਾ ਕਿ ਐਕਸਟੋਸ਼ਨ ਘਟਨਾਵਾਂ ਨੂੰ ਲੈ ਕੇ ਬੀ. ਸੀ. ਦੇ ਪਰਿਵਾਰਾਂ ਅਤੇ ਕਾਰੋਬਾਰਾਂ ਵਿਚ ਡਰ ਅਸਲ ਹੈ, ਇਸ ਲਈ ਇਹ ਸੁਧਾਰ ਓਰਗਨਾਈਜ਼ਡ ਕ੍ਰਾਈਮ ਦੇ ਨੈੱਟਵਰਕਸ ਨੂੰ ਤੋੜਨ ਅਤੇ ਬੀ. ਸੀ. ਦੇ ਲੋਕਾਂ ਨੂੰ ਸੁਰੱਖਿਅਤ ਮਹਿਸੂਸ ਕਰਨ ਲਈ ਬੇਹੱਧ ਜ਼ਰੂਰੀ ਹਨ।
