8C Vancouver 8C VancouverDec 30, 2025 1:35 PM - Connect Newsroom - Ramandeep Kaur
ਬੀ. ਸੀ. ਦੇ ਜੰਗਲਾਤ ਮੰਤਰਾਲਾ ਨੇ ਸਾਲ 2025 ਦੇ ਜੰਗਲੀ ਅੱਗ ਦੇ ਸੀਜ਼ਨ ਸਬੰਧੀ ਤਾਜ਼ਾ ਅੰਕੜੇ ਜਾਰੀ ਕੀਤੇ ਹਨ। ਰਿਪੋਰਟ ਮੁਤਾਬਕ, ਇਸ ਸਾਲ ਦਾ ਵਾਈਲਡ ਫਾਇਰ ਸੀਜ਼ਨ 2023 ਦੇ ਰਿਕਾਰਡ ਤੋੜ ਵਿਨਾਸ਼ਕਾਰੀ ਸੀਜ਼ਨ ਦੇ ਮੁਕਾਬਲੇ ਲਗਭਗ ਇੱਕ ਤਿਹਾਈ ਘੱਟ ਨੁਕਸਾਨਦੇਹ ਰਿਹਾ। ਜੰਗਲਾਤ ਮੰਤਰਾਲੇ ਦਾ ਕਹਿਣਾ ਹੈ ਕਿ 1 ਅਪ੍ਰੈਲ ਤੋਂ ਹੁਣ ਤੱਕ ਸੂਬੇ ਵਿਚ 1,350 ਤੋਂ ਵੱਧ ਅੱਗ ਦੀਆਂ ਘਟਨਾਵਾਂ ਵਾਪਰੀਆਂ, ਜਿਨ੍ਹਾਂ ਵਿਚ ਲਗਭਗ 8,864 ਵਰਗ ਕਿਲੋਮੀਟਰ ਜ਼ਮੀਨ ਨੂੰ ਨੁਕਸਾਨ ਹੋਇਆ। ਇਹ ਅੰਕੜਾ 2024 ਵਿਚ ਹੋਏ 10,811 ਵਰਗ ਕਿਲੋਮੀਟਰ ਦੇ ਨੁਕਸਾਨ ਨਾਲੋਂ ਘੱਟ ਹੈ।
ਸਭ ਤੋਂ ਵੱਧ ਨੁਕਸਾਨ 2023 ਵਿਚ ਹੋਇਆ ਸੀ, ਜਦੋਂ 28,400 ਵਰਗ ਕਿਲੋਮੀਟਰ ਤੋਂ ਵੱਧ ਜੰਗਲੀ ਰਕਬਾ ਅੱਗ ਦੀ ਭੇਟ ਚੜ੍ਹ ਗਿਆ ਸੀ। ਸੂਬਾ ਸਰਕਾਰ ਮੁਤਾਬਕ, ਇਸ ਸਾਲ ਵਾਈਲਡ ਫਾਇਰ ਨਾਲ ਪ੍ਰਭਾਵਿਤ ਹੋਇਆ ਰਕਬਾ ਪਿਛਲੇ 10 ਸਾਲਾਂ ਦੀ ਔਸਤਨ 8,500 ਵਰਗ ਕਿਲੋਮੀਟਰ ਦੇ ਲਗਭਗ ਬਰਾਬਰ ਹੀ ਰਿਹਾ। ਇਸ ਸਾਲ ਲਗਭਗ 2,600 ਪ੍ਰੋਪਰਟੀ ਨੂੰ ਪ੍ਰਭਾਵਿਤ ਕਰਨ ਵਾਲੇ 42 ਨਿਕਾਸੀ ਦੇ ਹੁਕਮ ਜਾਰੀ ਹੋਏ, ਜੋ 2024 ਦੇ 51 ਅਤੇ 2023 ਦੇ ਰਿਕਾਰਡ ਤੋੜ 208 ਨਿਕਾਸੀ ਦੇ ਹੁਕਮ ਦੇ ਮੁਕਾਬਲੇ ਘੱਟ ਹਨ।
ਜੰਗਲਾਤ ਮੰਤਰੀ ਰਵੀ ਪਰਮਾਰ ਨੇ ਕਿਹਾ ਕਿ ਤਕਨਾਲੋਜੀ, ਸਾਜ਼ੋ-ਸਾਮਾਨ ਅਤੇ ਸਿਖਲਾਈ ਦੇ ਮਾਮਲੇ ਵਿਚ ਬੀ.ਸੀ. ਵਾਈਲਡਫਾਇਰ ਸਰਵਿਸ ਨੇ ਖ਼ੁਦ ਨੂੰ ਵਿਸ਼ਵ ਪੱਧਰ 'ਤੇ ਮੋਹਰੀ ਸਾਬਤ ਕੀਤਾ ਹੈ। ਉਨ੍ਹਾਂ ਭਰੋਸਾ ਦਿੱਤਾ ਕਿ ਸਰਕਾਰ ਹਰ ਸਾਲ ਦੇ ਤਜ਼ਰਬੇ ਤੋਂ ਸਿਖ ਕੇ ਸੁਰੱਖਿਆ ਦੇ ਮਿਆਰ ਹੋਰ ਵੀ ਬਿਹਤਰ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ।
