17.31C Vancouver 17.31C VancouverDec 10, 2025 3:16 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਦੇ ਸੈਂਟਰਲ ਬੈਂਕ ਨੇ ਸਾਲ ਦੀ ਅੱਜ ਆਪਣੀ ਆਖਰੀ ਮੁਦਰਾ ਨੀਤੀ ਵਿਚ ਪ੍ਰਮੁੱਖ ਵਿਆਜ ਦਰ ਨੂੰ ਮੌਜੂਦਾ 2.25 ਫੀਸਦੀ ਦੇ ਪੱਧਰ 'ਤੇ ਬਰਕਰਾਰ ਰੱਖਣ ਦਾ ਫੈਸਲਾ ਕੀਤਾ ਹੈ। ਗਵਰਨਰ ਟਿਫ ਮੈਕਲੇਮ ਨੇ ਕਿਹਾ ਕਿ ਦੁਨੀਆ ਦੀਆਂ ਵੱਡੀਆਂ ਅਰਥਵਿਵਸਥਾਵਾਂ ਅਮਰੀਕਾ ਦੇ ਵਪਾਰ ਸੁਰੱਖਿਆਵਾਦ ਦੇ ਬਾਵਜੂਦ ਉਭਾਰ ਦਿਖਾ ਰਹੀਆਂ ਹਨ, ਹਾਲਾਂਕਿ ਅਨਿਸ਼ਚਿਤਤਾ ਅਜੇ ਵੀ ਹਾਈ ਹੈ।
ਮੈਕਲੇਮ ਨੇ ਕਿਹਾ ਕਿ ਮੁਦਰਾਸਫੀਤੀ ਨੂੰ ਦੋ ਫੀਸਦੀ ਦੇ ਆਸਪਾਸ ਬਣਾਈ ਰੱਖਣ ਲਈ ਪਾਲਿਸੀ ਰੇਟ ਇਸ ਸਮੇਂ ਲਗਭਗ ਸਹੀ ਲੈਵਲ 'ਤੇ ਹੈ,ਜਿਸ ਦਾ ਮਤਲਬ ਹੈ ਕਿ ਬੈਂਕ ਮੰਨਦਾ ਹੈ ਕਿ ਵਿਆਜ ਦਰਾਂ ਨੂੰ ਇਸ ਸਮੇਂ ਨਾ ਤਾਂ ਵਧਾਉਣ ਦੀ ਜ਼ਰੂਰਤ ਹੈ ਅਤੇ ਨਾ ਹੀ ਘਟਾਉਣ ਦੀ ਕਿਉਂਕਿ ਇਹ ਅਰਥਵਿਵਸਥਾ ਨੂੰ ਸਥਿਰਤਾ ਦੇ ਰਹੀ ਹੈ।
ਇਸ ਦੇ ਨਾਲ ਹੀ ਮੈਕਲੇਮ ਨੇ ਕਿਹਾ ਕਿ ਬੈਂਕ ਔਫ ਕੈਨੇਡਾ ਹੁਣ ਦਰਾਂ ਘਟਾਉਣ ਦੀ ਤਿਆਰੀ ਉਦੋਂ ਹੀ ਕਰੇਗਾ ਜਦੋਂ ਕੋਈ ਵੱਡੀ ਆਰਥਿਕ ਮੁਸ਼ਕਲ ਆਉਂਦੀ ਹੈ ਜਾਂ ਜਦੋਂ ਅੰਕੜੇ ਇਹ ਸੰਕੇਤ ਦਿੰਦੇ ਹਨ ਕਿ ਕੈਨੇਡਾ ਦੀ ਅਰਥਵਿਵਸਥਾ ਕਮਜ਼ੋਰ ਹੋ ਰਹੀ ਹੈ। ਬੈਂਕ ਨੂੰ ਉਮੀਦ ਹੈ ਕਿ ਚੌਥੀ ਤਿਮਾਹੀ ਵਿਚ ਘਰੇਲੂ ਮੰਗ ਵਧੇਗੀ ਪਰ ਨੈਟ ਐਕਸਪੋਰਟ ਵਿਚ ਗਿਰਾਵਟ ਦੀ ਸੰਭਾਵਨਾ ਕਾਰਨ ਜੀ.ਡੀ.ਪੀ.ਕਮਜ਼ੋਰ ਰਹਿ ਸਕਦੀ ਹੈ।
