20.99C Vancouver 20.99C VancouverMar 18, 2026 2:05 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਦੇ ਸੈਂਟਰਲ ਬੈਂਕ ਨੇ ਅੱਜ ਆਪਣੀ ਅਹਿਮ ਮੀਟਿੰਗ ਵਿਚ ਵਿਆਜ ਦਰਾਂ ਨੂੰ 2.25 ਫੀਸਦੀ 'ਤੇ ਸਥਿਰ ਰੱਖਣ ਦਾ ਫੈਸਲਾ ਕੀਤਾ ਹੈ। ਇਹ ਲਗਾਤਾਰ ਤੀਜੀ ਵਾਰ ਹੈ ਜਦੋਂ ਬੈਂਕ ਔਫ ਕੈਨੇਡਾ ਨੇ ਪੌਲਿਸੀ ਰੇਟ ਵਿਚ ਕੋਈ ਪਰਿਵਰਤਨ ਨਹੀਂ ਕੀਤਾ ਹੈ। ਗਵਰਨਰ ਟਿਫ ਮੈਕਲੇਮ ਨੇ ਗਲੋਬਲ ਆਰਥਿਕ ਹਾਲਾਤ ਅਤੇ ਖਾਸ ਕਰ ਮਿਡਲ ਈਸਟ ਦੀ ਜੰਗ ਕਾਰਨ ਪੈਦਾ ਹੋਈ ਅਨਿਸ਼ਚਿਤਤਾ ਨੂੰ ਇਸ ਦਾ ਮੁੱਖ ਕਾਰਨ ਦੱਸਿਆ ਹੈ।
ਮੈਕਲੇਮ ਅਨੁਸਾਰ, ਅਮਰੀਕਾ, ਇਜ਼ਰਾਈਲ-ਅਤੇ ਈਰਾਨ ਸੰਘਰਸ਼ ਕਾਰਨ ਤੇਲ ਅਤੇ ਕੁਦਰਤੀ ਗੈਸ ਦੀਆਂ ਕੀਮਤਾਂ ਵਿਚ ਉਛਾਲ ਆਇਆ ਹੈ। ਸਟਰੇਟ ਔਫ ਹੋਰਮੁਜ਼ ਦੇ ਪ੍ਰਭਾਵਿਤ ਹੋਣ ਨਾਲ ਖਾਦ ਅਤੇ ਹੋਰ ਵਸਤਾਂ ਦੀ ਸਪਲਾਈ ਵਿਚ ਰੁਕਾਵਟ ਆ ਸਕਦੀ ਹੈ, ਜੋ ਮਹਿੰਗਾਈ ਨੂੰ ਹੋਰ ਵਧਾਏਗੀ। ਦੂਜਾ, ਸੀ.ਯੂ.ਐਸ.ਐਮ.ਏ. ਦੇ ਰਿਵਿਊ ਨੂੰ ਲੈ ਕੇ ਅਤੇ ਟੈਰਿਫਸ ਕਾਰਨ ਵਪਾਰਕ ਅਨਿਸ਼ਚਿਤਤਾ ਪਹਿਲਾਂ ਹੀ ਬਣੀ ਹੋਈ ਹੈ।
ਉਨ੍ਹਾਂ ਚਿਤਾਵਨੀ ਦਿੱਤੀ ਹੈ ਕਿ ਅਮਰੀਕੀ ਟੈਰਿਫ ਅਤੇ ਵਪਾਰਕ ਨੀਤੀਆਂ ਦੀ ਅਨਿਸ਼ਚਿਤਤਾ ਕਾਰਨ ਕੈਨੇਡਾ ਦੀ ਆਰਥਿਕ ਵਿਕਾਸ ਦਰ ਉਮੀਦ ਨਾਲੋਂ ਕਮਜ਼ੋਰ ਰਹਿ ਸਕਦੀ ਹੈ। ਬੈਂਕ ਦੇ ਤਾਜ਼ਾ ਫੈਸਲੇ ਮਗਰੋਂ ਜਿਨ੍ਹਾਂ ਲੋਕਾਂ ਦੇ ਲੋਨ ਵੈਰੀਏਬਲ ਰੇਟ ਮੌਰਗੇਜ 'ਤੇ ਹਨ, ਉਨ੍ਹਾਂ ਦੀਆਂ ਕਿਸ਼ਤਾਂ ਵਿਚ ਫਿਲਹਾਲ ਕੋਈ ਬਦਲਾਅ ਨਹੀਂ ਆਵੇਗਾ। ਹੋਰ ਲੋਨ ਦੀਆਂ ਦਰਾਂ ਵੀ ਸਥਿਰ ਰਹਿਣ ਦੀ ਸੰਭਾਵਨਾ ਹੈ। ਉਥੇ ਹੀ, ਜਮ੍ਹਾਂ ਦਰ 2.20 'ਤੇ ਬਰਕਰਾਰ ਹੈ।
