9.91C Vancouver 9.91C VancouverDec 4, 2023 7:07 PM - Connect News
ਕੈਨੇਡੀਅਨਜ਼ ਲਈ ਬੈਂਕ ਆਫ ਕੈਨੇਡਾ ਦੀ ਇਸ ਹਫ਼ਤੇ ਹੋਣ ਵਾਲੀ ਵਿਆਜ ਦਰ ਦੀ ਘੋਸ਼ਣਾ ਕਾਫ਼ੀ ਮਹੱਤਵਪੂਰਨ ਰਹਿਣ ਵਾਲੀ ਹੈ। ਇਹ ਸਾਲ ਦੀ ਆਖਰੀ ਘੋਸ਼ਣਾ ਹੋਵੇਗੀ। ਅਰਥ ਸ਼ਾਸਤਰੀਆਂ ਦਾ ਮੰਨਣਾ ਹੈ ਕਿ ਸੈਂਟਰਲ ਬੈਂਕ 6 ਦਸੰਬਰ ਨੂੰ ਵਿਆਜ ਦਰ 5 ਫੀਸਦੀ 'ਤੇ ਹੀ ਬਰਕਰਾਰ ਰੱਖਦੇ ਹੋਏ ਸਾਲ ਦੀ ਸਮਾਪਤੀ ਕਰ ਸਕਦਾ ਹੈ ਜੋ ਜੁਲਾਈ ਤੋਂ ਇਸੇ ਪੱਧਰ 'ਤੇ ਹੈ।
ਗਵਰਨਰ ਟਿਫ ਮੈਕਲਮ ਨੇ ਕਿਹਾ ਸੀ ਕਿ ਮਹਿੰਗਾਈ ਘੱਟ ਨਾ ਹੋਣ ਦੀ ਸੂਰਤ ਵਿੱਚ ਵਿਆਜ ਦਰ ਵਿੱਚ ਵਾਧਾ ਕੀਤਾ ਜਾ ਸਕਦਾ ਹੈ ਪਰ ਆਰਥਿਕਤਾ ਅਤੇ ਲੇਬਰ ਮਾਰਕੀਟ ਦੇ ਹਾਲ ਹੀ ਦੇ ਅੰਕੜੇ ਇਸ ਗੱਲ ਦਾ ਸੰਕੇਤ ਦਿੰਦੇ ਹਨ ਕਿ ਵਿਆਜ ਦਰਾਂ ਵਿੱਚ ਹੋਰ ਵਾਧਾ ਹੋਣ ਦੇ ਆਸਾਰ ਨਹੀਂ ਹਨ।
ਕੈਨੇਡੀਅਨ ਆਰਥਿਕਤਾ ਨੇ ਸਾਲ ਦੇ ਤੀਜੀ ਤਿਮਾਹੀ ਵਿੱਚ ਸਾਲਾਨਾ ਆਧਾਰ 'ਤੇ 1.1 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਹੈ। ਉੱਥੇ ਹੀ ਬੇਰੁਜ਼ਗਾਰੀ ਦੀ ਦਰ ਵੱਧ ਕੇ 5.8 ਫੀਸਦੀ 'ਤੇ ਪਹੁੰਚ ਚੁੱਕੀ ਹੈ। ਇਸ ਸਭ ਦਾ ਮਤਲਬ ਹੈ ਕਿ ਸੈਂਟਰਲ ਬੈਂਕ ਦੀ ਉਮੀਦ ਮੁਤਾਬਕ, ਕੈਨੇਡੀਅਨ ਆਰਥਿਕਤਾ ਸੁਸਤ ਰਫ਼ਤਾਰ ਵੱਲ ਵਧ ਰਹੀ ਹੈ। ਹਾਲਾਂਕਿ ਘੰਟੇ ਦੀ ਤਨਖਾਹ ਅਜੇ ਵੀ ਸੈਂਟਰਲ ਬੈਂਕ ਦੀਆਂ ਉਮੀਦਾਂ ਨਾਲੋਂ ਉੱਚ ਪੱਧਰ 'ਤੇ ਹਨ।
ਰਾਇਲ ਬੈਂਕ ਆਫ ਕੈਨੇਡਾ ਦਾ ਮੰਨਣਾ ਹੈ ਕਿ ਵਿਆਜ ਦਰ ਵਿੱਚ 2024 ਦੀ ਤੀਜੀ ਤਿਮਾਹੀ ਵਿੱਚ ਪਹਿਲੀ ਕਟੌਤੀ ਹੋ ਸਕਦੀ ਹੈ।
