ਬਰਨਬੀ ਆਰ.ਸੀ.ਐਮ.ਪੀ. ਨੇ ਚੋਰੀ ਕਰਨ ਵਾਲੇ ਗਿਰੋਹ ਦੀ ਪਛਾਣ ਕਰਨ ਲਈ ਜਨਤਾ ਤੋਂ ਮੰਗੀ ਮਦਦ

ਬਰਨਬੀ ਆਰ.ਸੀ.ਐਮ.ਪੀ. ਨੇ ਕ੍ਰਿਸਮਸ ਦੇ ਤਿਉਹਾਰੀ ਸੀਜ਼ਨ ਦੌਰਾਨ ਪੈਕੇਜ ਚੋਰੀ ਕਰਨ ਵਾਲੇ ਗਿਰੋਹਾਂ ਤੋਂ ਲੋਕਾਂ ਨੂੰ ਸੁਚੇਤ ਕਰਦਿਆਂ ਇੱਕ ਹਾਲ ਹੀ ਦੀ ਘਟਨਾ ਦੀ ਵੀਡੀਓ ਜਾਰੀ ਕਰ ਦੋ ਮਹਿਲਾਵਾਂ ਸਮੇਤ ਤਿੰਨ ਸ਼ੱਕੀਆਂ ਦੀ ਪਛਾਣ ਲਈ ਜਨਤਾ ਤੋਂ ਮਦਦ ਮੰਗੀ ਹੈ।

ਇਹ ਘਟਨਾ 1 ਦਸੰਬਰ ਨੂੰ ਸਾਊਥ ਬਰਨਬੀ ਦੇ ਇੱਕ ਘਰ ਵਿਚ ਵਾਪਰੀ, ਜਿੱਥੇ ਇੱਕ ਡਾਰਕ ਰੰਗ ਦੀ ਐਸ.ਯੂ.ਵੀ. ਵਿਚ ਆਏ ਤਿੰਨ ਸਵਾਰਾਂ ਨੇ ਬੜੀ ਚਲਾਕੀ ਨਾਲ ਘਰ ਦੇ ਬਾਹਰ ਪਏ ਪੈਕੇਜ ਚੋਰੀ ਕਰ ਲਏ। ਸੀ.ਸੀ.ਟੀ.ਵੀ. ਫੁਟੇਜ ਅਨੁਸਾਰ, ਐਸ.ਯੂ.ਵੀ. ਘਰ ਦੇ ਬਾਹਰ ਆ ਕੇ ਰੁਕਦੀ ਹੈ। ਡਰਾਈਵਰ ਗੱਡੀ ਦੀ ਡਿੱਗੀ ਖੋਲ੍ਹਦਾ ਹੈ।

ਇਸ ਤੋਂ ਬਾਅਦ ਦੋ ਮਹਿਲਾਵਾਂ ਗੱਡੀ ਵਿਚੋਂ ਉਤਰਦੀਆਂ ਹਨ ਅਤੇ ਦਿਨ-ਦਿਹਾੜੇ ਘਰ ਦੇ ਬਰਾਂਡੇ ਤੋਂ ਭਾਰੀ ਪੈਕੇਜ ਚੁੱਕ ਕੇ ਗੱਡੀ ਵਿਚ ਰੱਖ ਕੇ ਫ਼ਰਾਰ ਹੋ ਜਾਂਦੀਆਂ ਹਨ। ਇਹਨਾਂ ਵਿਚੋਂ ਇੱਕ ਦੀ ਪਛਾਣ ਵੱਖਰੀ ਸੀ, ਉਸ ਦੇ ਵਾਲ ਚਮਕਦਾਰ ਗੁਲਾਬੀ ਸਨ। ਉਸ ਨੇ ਚਿੱਟੀਆਂ ਬਾਹਾਂ ਵਾਲੀ ਕਾਲੀ ਜੈਕਟ,ਬਲੈਕ ਹੁੱਡੀ ਅਤੇ ਬਲੈਕ ਪੈਂਟ ਪਾਈ ਹੋਈ ਸੀ।

ਬਰਨਬੀ ਆਰ.ਸੀ.ਐਮ.ਪੀ. ਦੇ ਕਾਰਪੋਰੇਸ਼ਨਲ ਮਾਈਕ ਕਲਾਂਜ ਨੇ ਕਿਹਾ ਕਿ ਇਹ ਅਪਰਾਧ ਸਾਲ ਦੇ ਇਸ ਸਮੇਂ ਵਧੇਰੇ ਆਮ ਹੁੰਦੇ ਹਨ ਕਿਉਂਕਿ ਗਿਫਟ ਔਰਡਰ ਅਤੇ ਡਿਲੀਵਰ ਕੀਤੇ ਜਾਂਦੇ ਹਨ।