ਬਰਨਬੀ ਆਰ.ਸੀ.ਐਮ.ਪੀ. ਨੇ ਗਹਿਣਿਆਂ ਦੀਆਂ ਚੋਰੀਆਂ ਬਾਰੇ ਜਾਰੀ ਕੀਤੀ ਚਿਤਾਵਨੀ

ਬਰਨਬੀ ਵਿਚ ਧਿਆਨ ਭਟਕਾ ਕੇ ਹੋ ਰਹੀਆਂ ਚੋਰੀਆਂ ਬਾਰੇ ਤਾਜ਼ਾ ਚਿਤਾਵਨੀ ਜਾਰੀ ਕੀਤੀ ਗਈ ਹੈ, ਇਸ ਤਰ੍ਹਾਂ ਦੇ ਮਾਮਲੇ ਬੀ. ਸੀ. ਭਰ ਦੇ ਸ਼ਹਿਰਾਂ ਵਿਚ ਆ ਰਹੇ ਹਨ। ਅਧਿਕਾਰੀਆਂ ਅਨੁਸਾਰ, 13 ਨਵੰਬਰ ਤੋਂ ਲੈ ਕੇ ਹੁਣ ਤੱਕ ਬਰਨਬੀ ਵਿਚ ਅਜਿਹੀਆਂ ਕੁੱਲ 10 ਘਟਨਾਵਾਂ ਦਰਜ ਕੀਤੀਆਂ ਜਾ ਚੁੱਕੀਆਂ ਹਨ।

ਇਨ੍ਹਾਂ ਮਾਮਲਿਆਂ ਦੀ ਜਾਂਚ ਦੀ ਬਰਨਬੀ ਆਰ.ਸੀ.ਐਮ.ਪੀ. ਦੀ ਕਮਿਊਨਿਟੀ ਰਿਸਪਾਂਸ ਟੀਮ ਕਰ ਰਹੀ ਹੈ ਅਤੇ ਲੋਕਾਂ ਨੂੰ ਚੌਕਸ ਰਹਿਣ ਲਈ ਜ਼ੋਰ ਦੇ ਰਹੀ ਹੈ। ਕਾਂਸਟੇਬਲ ਡਵਾਈਟ ਮਾਰਟਿਨ ਨੇ ਕਿਹਾ ਕਿ ਪੀੜਤਾਂ ਨੇ ਨਾ ਸਿਰਫ਼ ਆਪਣੇ ਗਹਿਣੇ ਜਾਂ ਹੋਰ ਕੀਮਤੀ ਚੀਜ਼ ਨੂੰ ਗੁਆਇਆ, ਬਲਕਿ ਪਰਿਵਾਰਕ ਵਿਰਾਸਤ ਵਿਚ ਮਿਲੀਆਂ ਚੀਜ਼ਾਂ ਵੀ ਗੁਆਈਆਂ ਹਨ ਜਿਨ੍ਹਾਂ ਨਾਲ ਉਹਨਾਂ ਦੀਆਂ ਯਾਦਾਂ ਜੁੜੀਆਂ ਹੋਈਆਂ ਸਨ।

ਜ਼ਿਆਦਾਤਰ ਮਾਮਲਿਆਂ ਵਿਚ ਇੱਕ ਸ਼ੱਕੀ ਮਰਦ ਅਤੇ ਦੋ ਔਰਤਾਂ ਸ਼ਾਮਲ ਸਨ। ਦੋ ਪੀੜਤਾਂ ਮੁਤਾਬਕ, ਇੱਕ ਮਹਿਲਾ ਸ਼ੱਕੀ ਨੇ ਮੈਡੀਕਲ ਐਮਰਜੈਂਸੀ ਦਾ ਹਵਾਲਾ ਦਿੰਦੇ ਹੋਏ ਹਸਪਤਾਲ ਦਾ ਰਸਤਾ ਪੁੱਛਣ ਨਾਲ ਗੱਲਬਾਤ ਸ਼ੁਰੂ ਕੀਤੀ। ਪੁਲਿਸ ਮੁਤਾਬਕ, ਗੱਲਬਾਤ ਵਿਚ ਉਲਝਾ ਕੇ ਗਹਿਣਿਆਂ 'ਤੇ ਹੱਥ ਸਾਫ ਕਰਨ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ। ਆਰ.ਸੀ.ਐਮ.ਪੀ. ਨੇ ਕਿਹਾ ਕਿ ਹਰ ਸਮੇਂ ਚੌਕਸ ਰਹਿਣ ਦੀ ਲੋੜ ਹੈ ਭਾਵੇਂ ਤੁਸੀਂ ਸਿਰਫ਼ ਸੈਰ ਲਈ ਜਾ ਰਹੇ ਹੋਵੋ।