ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਚੀਨ ਨਾਲ ਇੱਕ ਟੈਰਿਫ-ਕੋਟਾ ਡੀਲ ਦਾ ਕੀਤਾ ਐਲਾਨ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਚੀਨ ਨਾਲ ਇੱਕ ਟੈਰਿਫ-ਕੋਟਾ ਡੀਲ ਦਾ ਐਲਾਨ ਕੀਤਾ ਹੈ, ਜਿਸ ਵਿਚ ਕੈਨੋਲਾ ਦੇ ਐਕਸਪੋਰਟ ਬਦਲੇ ਚੀਨ ਦੀਆਂ ਇਲੈਕਟ੍ਰਿਕ ਕਾਰਾਂ ਲਈ ਕੈਨੇਡਾ ਦੇ ਰਾਹ ਖੋਲ੍ਹ ਦਿੱਤੇ ਗਏ ਹਨ। ਇਸ ਸਮਝੌਤੇ ਤਹਿਤ ਕੈਨੇਡੀਅਨ ਕਿਸਾਨਾਂ ਨੂੰ ਚੀਨ ਮਾਰਕੀਟ ਵਿਚ ਰਾਹਤ ਦਿਵਾਉਣ ਲਈ ਕੈਨੇਡਾ ਨੇ ਲਗਭਗ 50,000 ਚੀਨ ਦੀਆਂ ਇਲੈਕਟ੍ਰਿਕ ਗੱਡੀਆਂ ਨੂੰ ਘੱਟ ਡਿਊਟੀ 'ਤੇ ਕੈਨੇਡਾ ਆਉਣ ਦੀ ਹਰੀ ਝੰਡੀ ਦਿੱਤੀ ਹੈ। ਇਨ੍ਹਾਂ 'ਤੇ ਸਿਰਫ਼ 6.1 ਫੀਸਦੀ ਟੈਰਿਫ ਲੱਗੇਗਾ, ਜੋ ਕਿ ਪੁਰਾਣੇ 100 ਫੀਸਦੀ ਟੈਰਿਫ ਦੇ ਮੁਕਾਬਲੇ ਵੱਡੀ ਕਟੌਤੀ ਹੈ।

ਇਸ ਦਾ ਮਤਲਬ ਹੈ ਕਿ ਆਉਣ ਵਾਲੇ ਮਹੀਨਿਆਂ ਵਿਚ ਬੀ.ਵਾਈ.ਡੀ. ਅਤੇ Xiaomi ਵਰਗੀਆਂ ਚੀਨੀ ਕੰਪਨੀਆਂ ਦੀਆਂ ਹਜ਼ਾਰਾਂ ਇਲੈਕਟ੍ਰਿਕ ਗੱਡੀਆਂ ਕੈਨੇਡੀਅਨ ਸ਼ੋਅਰੂਮ ਵਿਚ ਨਜ਼ਰ ਆ ਸਕਦੀਆਂ ਹਨ। ਇਸ ਡੀਲ ਦੇ ਬਦਲੇ 1 ਮਾਰਚ, 2026 ਤੱਕ ਬੀਜਿੰਗ ਕੈਨੋਲਾ ਸੀਡ 'ਤੇ ਡਿਊਟੀ ਨੂੰ 84 ਫੀਸਦੀ ਤੋਂ ਘਟਾ ਕੇ 15 ਫੀਸਦੀ ਕਰ ਦੇਵੇਗਾ ਅਤੇ ਘੱਟੋ-ਘੱਟ ਸਾਲ ਦੇ ਅੰਤ ਤੱਕ ਕੈਨੇਡੀਅਨ ਕੈਨੋਲਾ ਮੀਲ, ਝੀਂਗਾ, ਕੇਕੜੇ ਅਤੇ ਮਟਰ 'ਤੇ ਕੋਈ ਟੈਰਿਫ ਨਹੀਂ ਲੱਗੇਗਾ।

ਕਾਰਨੀ ਨੇ ਬੀਜਿੰਗ ਵਿਚ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨਾਲ ਕਈ ਘੰਟੇ ਚੱਲੀ ਮੀਟਿੰਗ ਤੋਂ ਬਾਅਦ ਸ਼ੁੱਕਰਵਾਰ ਨੂੰ ਇਸ ਡੀਲ ਦਾ ਐਲਾਨ ਕੀਤਾ। ਇਹ ਪੀ. ਐੱਮ. ਕਾਰਨੀ ਦਾ ਪਹਿਲਾ ਚੀਨ ਦੌਰਾ ਸੀ। ਪ੍ਰਧਾਨ ਮੰਤਰੀ ਮੁਤਾਬਕ, ਪੰਜ ਸਾਲਾਂ ਵਿਚ ਇਹਨਾਂ ਵਿਚੋਂ 50 ਫੀਸਦੀ ਇਲੈਕਟ੍ਰਿਕ ਕਾਰਾਂ ਦੀ ਇੰਪੋਰਟ ਕੀਮਤ $35,000 ਤੋਂ ਵੀ ਘੱਟ ਹੋਵੇਗੀ, ਜਿਸ ਨਾਲ ਕੈਨੇਡੀਅਨ ਲਈ ਨਵੇਂ ਕਿਫਾਇਤੀ ਵਿਕਲਪ ਪੈਦਾ ਹੋਣਗੇ।