13.42C Vancouver 13.42C VancouverMar 16, 2020 6:29 PM -
ਕੋਵਿਡ-19 ਦੇ ਕੈਨੇਡਾ 'ਚ ਵਧਦੇ ਖਤਰੇ ਨੂੰ ਲੈਕੇ, ਦੇਸ਼ ਵੱਲੋਂ ਚੁੱਕੇ ਜਾ ਰਹੇ ਕਦਮਾਂ ਦੇ ਵੇਰਵੇ ਅੱਜ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ, ਦੇਸ਼ ਨੂੰ ਸੰਬੋਧਨ ਕਰਦੇ ਹੋਏ ਸਾਂਝੇ ਕੀਤੇ।
ਪ੍ਰਧਾਨ ਮੰਤਰੀ ਨੇ ਐਲਾਨ ਕੀਤਾ ਹੈ ਕਿ, ਜਿਹੜੇ ਲੋਕ ਕਨੇਡੀਅਨ ਨਾਗਰਿਕ ਨਹੀਂ ਹਨ, ਜਾਂ ਦੇਸ਼ ਦੇ ਪੀ.ਆਰ. ਨਹੀਂ ਹਨ, ਅਤੇ ਕਿਸੇ ਨਾਗਰਿਕ ਦੇ ਪਰਿਵਾਰਿਕ ਮੈਂਬਰ ਜਾਂ ਅਮਰੀਕੀ ਨਾਗਰਿਕ ਨਹੀਂ ਹਨ, ਉਨ੍ਹਾਂ ਦਾ ਕੈਨੇਡਾ 'ਚ ਦਾਖਿਲਾ ਬੰਦ ਕੀਤਾ ਜਾ ਰਿਹਾ ਹੈ।
ਇਹ ਨਿਯਮ 18 ਮਾਰਚ, ਯਾਨੀ ਕਿ ਬੁੱਧਵਾਰ ਤੋਂ ਲਾਗੂ ਹੋ ਰਹੇ ਹਨ।
ਇਸਦੇ ਨਾਲ ਹੀ ਏਅਰਲਾਈਨਸ ਨੂੰ ਕਿਹਾ ਗਿਆ ਹੈ ਕਿ, ਹਰ ਸਵਾਰੀ ਦੀ ਬੇਸਿਕ ਅਸੈਸਮੈਂਟ ਕੀਤੀ ਜਾਵੇ, ਅਤੇ ਜੇਕਰ ਕਿਸੇ ਵਿਅਕਤੀ ਨੂੰ ਇਸ ਬਿਮਾਰੀ ਵਾਲੇ ਲੱਛਣ ਮਿਲਦੇ ਹਨ, ਤਾਂ ਉਨ੍ਹਾਂ ਨੂੰ ਫਲਾਈਟ 'ਤੇ ਚੜ੍ਹਨ ਦੀ ਇਜਾਜਤ ਨਹੀਂ ਹੋਵੇਗੀ।
ਬੁੱਧਵਾਰ ਤੋਂ ਸਿਰਫ 4 ਕਨੇਡੀਅਨ ਹਵਾਈ ਅੱਡੇ ਅੰਤਰਰਾਸ਼ਟਰੀ ਹਵਾਈ ਸੇਵਾ ਲਈ ਵਰਤੇ ਜਾਣਗੇ।
ਟੋਰੌਂਟੋ, ਵੈਨਕੂਵਰ, ਕੈਲਗਰੀ ਅਤੇ ਮੌਂਟਰੀਅਲ ਦੇ ਹਵਾਈ ਅੱਡੇ ਇਸ ਵਿੱਚ ਸ਼ਾਮਿਲ ਕੀਤੇ ਗਏ ਹਨ।
ਟਰੂਡੋ ਨੇ ਦੱਸਿਆ ਕਿ ਇਨ੍ਹਾਂ ਫੈਸਲਿਆਂ ਸੰਬੰਧੀ ਜੀ-7 ਦੇਸ਼ਾਂ ਨੂੰ ਵੀ ਜਾਣਕਾਰੀ ਦੇ ਦਿੱਤੀ ਗਈ ਹੈ।
ਟਰੂਡੋ ਨੇ ਦੱਸਿਆ ਕਿ ਪਬਲਿਕ ਅਥਾਰਿਟੀ ਲਗਾਤਾਰ ਵੱਡੀ ਗਿਣਤੀ 'ਚ ਟੈਸਟ ਕੰਡਕਟ ਕਰ ਰਹੀ ਹੈ।
ਹਰ ਰੋਜ ਹੈਲਥ ਕੈਨੇਡਾ ਵੱਲੋਂ ਦੁਪਹਿਰ ਦੇ ਸਮੇਂ ਪ੍ਰੈਸ ਕਾਨਫਰੰਸ ਕਰ ਜਾਣਕਾਰੀਆਂ ਵੀ ਜਾਰੀ ਕੀਤੀਆਂ ਜਾਣਗੀਆਂ।
