12.12C Vancouver 12.12C VancouverMay 13, 2020 4:34 PM -
ਜਸਟਿਨ ਟਰੂਡੋ ਮੁਤਾਬਕ ਇਹ ਫਿਲਹਾਲ ਕਹਿਣਾ ਮੁਸ਼ਕਿਲ ਹੈ ਕਿ ਕੈਨੇਡਾ ਅਤੇ ਅਮਰੀਕਾ ਦਾ ਬਾਰਡਰ ਖੋਲ੍ਹਣ ਨਾਲ ਕਿਹੋ ਜਿਹੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
ਪ੍ਰਧਾਨ ਮੰਤਰੀ ਮੁਤਾਬਕ ਬੈਨ ਇੱਕ ਹੋਰ ਹਫ਼ਤਾ ਜਾਰੀ ਰਹੇਗਾ ਅਤੇ ਉਹ ਹਾਲੇ ਇਸ ਨੂੰ ਵਧਾਉਣ ਸਬੰਧੀ ਕੋਈ ਵੀ ਐਲਾਨ ਕਰਨ ਲਈ ਤਿਆਰ ਨਹੀਂ ਹਨ।
ਦੋਵਾਂ ਦੇਸ਼ਾਂ ਵਿਚਕਾਰ ਇਸ ਸਬੰਧ ਵਿੱਚ ਹੋ ਰਹੀ ਗੱਲਬਾਤ ਨਾਲ ਜਾਣੂ ਇੱਕ ਸਰੋਤ ਨੇ ਕਨੇਡੀਅਨ ਪ੍ਰੈੱਸ ਨੂੰ ਇਹ ਜਾਣਕਾਰੀ ਦਿੱਤੀ ਹੈ ਕਿ ਕੈਨੇਡਾ ਨੇ ਗੈਰ ਜ਼ਰੂਰੀ ਯਾਤਰਾ ਉੱਤੇ ਲੱਗੀ ਮੌਜੂਦਾ ਪਾਬੰਦੀ ਨੂੰ ਹੋਰ 30 ਦਿਨਾਂ ਲਈ ਵਧਾਉਣ ਦੀ ਦਰਖਾਸਤ ਕੀਤੀ ਹੈ।
ਸਰੋਤ, ਜਿਸ ਨੂੰ ਇਸ ਸਬੰਧ ਵਿੱਚ ਹੋਰ ਵੇਰਵੇ ਜਨਤਕ ਕਰਣ ਦਾ ਅਧਿਕਾਰ ਨਹੀਂ ਹੈ, ਨੇ ਨਾਲ ਹੀ ਇਹ ਵੀ ਦੱਸਿਆ ਕਿ ਕੈਨੇਡਾ ਵੱਲੋਂ 21 ਜੂਨ ਤੱਕ ਪਾਬੰਦੀ ਨੂੰ ਵਧਾਉਣ ਦੀ ਦਰਖਾਸਤ ਦੇ ਸਬੰਧ ਵਿੱਚ ਫੈਸਲਾ ਦੇਣ ਵਿੱਚ ਅਮਰੀਕਾ ਨੂੰ ਕਈ ਦਿਨ ਲੱਗ ਸਕਦੇ ਹਨ।
ਟਰੂਡੋ ਨੇ ਕਿਹਾ ਹੈ ਕਿ ਜਿੱਦਾਂ ਜਿੱਦਾਂ ਬਾਰਡਰ ਦੇ ਨੇੜੇ ਪੈਂਦੇ ਇਲਾਕਿਆਂ ਵਿੱਚ ਪਾਬੰਦੀਆਂ ਨੂੰ ਢਿੱਲ ਦਿੱਤੀ ਜਾ ਰਹੀ ਹੈ ਅਤੇ ਬਾਰਡਰ ਪਾਰ ਕਰਣ ਵਾਲਿਆਂ ਵਿੱਚ ਵਾਧਾ ਹੁੰਦਾ ਹੈ ਤਾਂ ਇਸ ਨਾਲ ਨਜਿੱਠਣ ਲਈ ਵਧੇਰੇ ਸਾਧਨ ਮੁਹੱਈਆ ਕਰਵਾਉਣੇ ਪੈਣਗੇ।
ਕੈਨੇਡਾ ਦੀ ਚੀਫ ਪਬਲਿਕ ਹੈਲਥ ਅਫਸਰ ਡਾਕਟਰ ਟੈਰਿਸਾ ਟੈਮ ਮੁਤਾਬਕ ਅਮਰੀਕਾ ਵਿੱਚ ਵਾਇਰਸ ਦੇ ਫੈਲਾਅ ਨੂੰ ਦੇਖਦਿਆਂ ਕੈਨੇਡਾ ਨੂੰ ਹਰ ਕਦਮ ਬਹੁਤ ਹੀ ਸਾਵਧਾਨੀ ਨਾਲ ਚੁੱਕਣਾ ਪਵੇਗਾ।
