ਕੈਨੇਡਾ ਪੋਸਟ ਸਰਕਾਰ ਡੋਰ-ਟੂ-ਡੋਰ ਮੇਲ ਡਿਲਿਵਰੀ ਖਤਮ ਕਰਨ ਦੀ ਯੋਜਨਾ ਵੱਲ ਵਧ ਰਹੀ ਅੱਗੇ

ਕੈਨੇਡਾ ਪੋਸਟ ਸਰਕਾਰ ਵੱਲੋਂ ਪਿਛਲੇ ਫਾਲ ਵਿਚ ਦਿੱਤੇ ਗਏ ਨਿਰਦੇਸ਼ਾਂ ਅਨੁਸਾਰ, ਆਪਣੇ ਪੁਨਰਗਠਨ ਯੋਜਨਾ ਨੂੰ ਜਲਦ ਲਾਗੂ ਕਰਨ ਲਈ ਕਦਮ ਉਠਾ ਸਕਦੀ ਹੈ। ਇਸ ਬਦਲਾਅ ਤਹਿਤ ਰਵਾਇਤੀ ਤੌਰ 'ਤੇ ਚੱਲੀ ਆ ਰਹੀ ਡੋਰ-ਟੂ-ਡੋਰ ਮੇਲ ਡਿਲਿਵਰੀ ਪੱਕੇ ਤੌਰ 'ਤੇ ਖਤਮ ਹੋ ਸਕਦੀ ਹੈ। ਸੋਮਵਾਰ ਨੂੰ ਇੱਕ ਬਿਆਨ ਵਿਚ ਕਾਰਪੋਰੇਸ਼ਨ ਨੇ ਕਿਹਾ ਕਿ ਬਿਜ਼ਨਸ ਮਾਡਲ ਵਿਚ ਤਬਦੀਲੀ ਦਾ ਇਹ ਕਦਮ ਟੈਕਸਦਾਤਾ 'ਤੇ ਵਾਰ-ਵਾਰ ਪੈਣ ਵਾਲੇ ਵਿੱਤੀ ਬੋਝ ਨੂੰ ਘਟਾਏਗਾ।

Public Works and Procurement ਮੰਤਰੀ ਜੋਏਲ ਲਾਈਟਬਾਉਂਡ ਨੇ ਪਿਛਲੇ ਸਾਲ ਚਿਤਾਵਨੀ ਦਿੱਤੀ ਸੀ ਕਿ 2018 ਤੋਂ ਹੁਣ ਤੱਕ ਅਰਬਾਂ ਡਾਲਰਾਂ ਦੇ ਨੁਕਸਾਨ ਕਾਰਨ ਕੈਨੇਡਾ ਪੋਸਟ ਦੀਵਾਲੀਆ ਹੋਣ ਦੀ ਹਾਲਤ ਵਿਚ ਹੈ। ਨਵੇਂ ਪੁਨਰਗਠਨ ਪਲੈਨ ਤਹਿਤ ਡੋਰ-ਟੂ-ਡੋਰ ਮੇਲ ਡਿਲਿਵਰੀ ਨੂੰ ਕਮਿਊਨਿਟੀ ਮੇਲਬਾਕਸ ਵਿਚ ਤਬਦੀਲ ਕੀਤਾ ਜਾਣਾ ਹੈ ਯਾਨੀ ਜਿੱਥੇ ਲੋਕਾਂ ਨੂੰ ਖੁਦ ਜਾ ਕੇ ਆਪਣੀ ਡਾਕ ਲੈਣੀ ਪਵੇਗੀ।

ਕੈਨੇਡਾ ਪੋਸਟ ਨੇ ਪੁਸ਼ਟੀ ਕੀਤੀ ਹੈ ਕਿ ਉਹ ਇਨ੍ਹਾਂ ਤਬਦੀਲੀਆਂ ਬਾਰੇ ਕਰਮਚਾਰੀ ਯੂਨੀਅਨਾਂ ਨਾਲ ਸਲਾਹ-ਮਸ਼ਵਰਾ ਕਰ ਰਹੀ ਹੈ। ਇਸ ਯੋਜਨਾ ਨੂੰ ਪੂਰੀ ਤਰ੍ਹਾਂ ਲਾਗੂ ਕਰਨ ਲਈ ਕਾਰਪੋਰੇਸ਼ਨ ਦੇ ਚਾਰਟਰ ਵਿਚ ਵੀ ਸੋਧ ਕਰਨੀ ਪਵੇਗੀ, ਜਿਸ ਬਾਰੇ ਫੈਡਰਲ ਸਰਕਾਰ ਨਾਲ ਗੱਲਬਾਤ ਚੱਲ ਰਹੀ ਹੈ।