ਕੈਨੇਡਾ ਪੋਸਟ ਯੂਨੀਅਨ ਵੱਲੋਂ ਓਵਰਟਾਈਮ ਕੰਮ ਕਰਨਾ ਬੰਦ

ਕੈਨੇਡਾ ਪੋਸਟ ਦੇ ਲਗਭਗ 55,000 ਡਾਕ ਕਰਮਚਾਰੀਆਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਨੇ ਕੰਪਨੀ ਵਲੋਂ ਮਿਲੀ ਨਵੀਨਤਮ ਪੇਸ਼ਕਸ਼ 'ਤੇ ਵਿਚਾਰ ਕਰਨ ਦੌਰਾਨ ਪੂਰਨ ਹੜਤਾਲ ਦੀ ਬਜਾਏ ਦੇਸ਼ ਭਰ ਵਿਚ ਓਵਰਟਾਈਮ ਕੰਮ ਕਰਨਾ ਰੋਕ ਦਿੱਤਾ ਹੈ। ਪੋਸਟਲ ਵਰਕਰਜ਼ ਯੂਨੀਅਨ ਵਲੋਂ ਵੀਰਵਾਰ ਦੇਰ ਰਾਤ ਮੈਂਬਰ ਨੂੰ ਕੀਤੀ ਗਈ ਹਦਾਇਤ ਮੁਤਾਬਕ, ਉਹ ਦਿਨ ਵਿਚ ਅੱਠ ਘੰਟੇ ਅਤੇ ਹਫ਼ਤੇ ਵਿਚ 40 ਘੰਟਿਆਂ ਤੋਂ ਵੱਧ ਕੰਮ ਨਹੀਂ ਕਰਨਗੇ। ਕੈਨੇਡਾ ਪੋਸਟ ਨੇ ਯੂਨੀਅਨ ਦੇ ਓਵਰਟਾਈਮ ਪਾਬੰਦੀ ਦੇ ਜਵਾਬ ਵਿਚ ਸ਼ੁੱਕਰਵਾਰ ਸਵੇਰ ਜਾਰੀ ਬਿਆਨ ਵਿਚ ਡਾਕ ਸੇਵਾਵਾਂ ਵਿਚ ਸੰਭਾਵਿਤ ਦੇਰੀ ਦੀ ਚਿਤਾਵਨੀ ਦਿੱਤੀ ਹੈ।

ਗੌਰਤਲਬ ਹੈ ਕਿ ਕੈਨੇਡਾ ਪੋਸਟ ਨੇ ਆਪਣੇ ਤਾਜ਼ਾ ਪ੍ਰਸਤਾਵ ਵਿਚ ਡਾਕ ਕਰਮਚਾਰੀਆਂ ਲਈ ਤਨਖਾਹਾਂ ਵਿਚ 4 ਸਾਲਾਂ ਦੌਰਾਨ ਕੁੱਲ ਮਿਲਾ ਕੇ 13.59 ਫੀਸਦੀ ਵਾਧੇ ਦੀ ਪੇਸ਼ਕਸ਼ ਦਿੱਤੀ ਹੈ, ਜਦੋਂ ਕਿ ਯੂਨੀਅਨ ਵਲੋਂ 19 ਫੀਸਦੀ ਦੀ ਮੰਗ ਕੀਤੀ ਗਈ ਸੀ। ਦੋਵਾਂ ਧਿਰਾਂ ਵਿਚਕਾਰ ਵੀਕੈਂਡ ਡਿਲੀਵਰੀ ਨੂੰ ਲੈ ਕੇ ਮਤਭੇਦ ਬਣਿਆ ਹੋਇਆ ਹੈ, ਕੈਨੇਡਾ ਪੋਸਟ ਵੀਕੈਂਡ ਡਿਲੀਵਰੀ ਨੂੰ ਹੈਂਡਲ ਕਰਨ ਲਈਪਾਰਟ-ਟਾਈਮ ਕਾਮੇ ਰੱਖਣ ਦੇ ਪੱਖ ਵਿਚ ਹੈ ਜਦੋਂ ਕਿ ਯੂਨੀਅਨ -ਫੁੱਲ-ਟਾਈਮ ਕਰਮਚਾਰੀ ਲਈ ਜ਼ੋਰ ਪਾ ਰਹੀ ਹੈ। ਯੂਨੀਅਨ ਦਾ ਇਲਜ਼ਾਮ ਹੈ ਕਿ ਕੰਪਨੀ ਗਿਗ-ਸਟਾਈਲ ਮਾਡਲ ਲਾਗੂ ਕਰਨਾ ਚਾਹੁੰਦੀ ਹੈ।