ਕੈਨੇਡਾ ਨੇ ਤੀਜੀ ਤਿਮਾਹੀ ਵਿੱਚ ਉਮੀਦ ਤੋਂ ਵੱਧ ਮਜ਼ਬੂਤ ​​ਆਰਥਿਕ ਵਿਕਾਸ ਦਰ ਕੀਤੀ ਦਰਜ

ਕੈਨੇਡੀਅਨ ਅਰਥਵਿਵਸਥਾ ਤੀਜੀ ਤਿਮਾਹੀ ਦੌਰਾਨ ਮੰਦੀ ਦੇ ਖਤਰੇ ਤੋਂ ਬਚ ਗਈ ਹੈ। ਸਟੈਟਿਸਟਿਕਸ ਕੈਨੇਡਾ ਵਲੋਂ ਸ਼ੁੱਕਰਵਾਰ ਨੂੰ ਜਾਰੀ ਅੰਕੜਿਆਂ ਮੁਤਾਬਕ,ਜੁਲਾਈ ਤੋਂ ਸਤੰਬਰ ਤੱਕ ਦੇ ਤੀਜੀ ਤਿਮਾਹੀ ਵਿਚ ਕੈਨੇਡਾ ਦੀ ਜੀ.ਡੀ ਪੀ.ਵਿਚ 0.6 ਫੀਸਦੀ ਦਾ ਵਾਧਾ ਹੋਇਆ ਹੈ ਅਤੇ ਸਾਲਾਨਾ ਆਧਾਰ 'ਤੇ ਇਹ 2.6 ਫੀਸਦੀ ਦਾ ਵਾਧਾ ਹੈ। ਇਸ ਅੰਕੜੇ ਨੇ ਬੈਂਕ ਔਫ ਕੈਨੇਡਾ ਅਤੇ ਅਰਥਸ਼ਾਸਤਰੀਆਂ ਦੀਆਂ ਉਮੀਦਾਂ ਨੂੰ ਪਛਾੜਿਆ ਹੈ।

ਸਟੈਟਿਸਟਿਕਸ ਏਜੰਸੀ ਮੁਤਾਬਕ,ਤੀਜੇ ਤਿਮਾਹੀ ਦੌਰਾਨ ਬਿਹਤਰ ਵਪਾਰ ਸੰਤੁਲਨ ਅਤੇ ਖਾਸ ਤੌਰ 'ਤੇ ਸਰਕਾਰੀ ਪੂੰਜੀ ਖਰਚ ਜੀ.ਡੀ.ਪੀ. ਵਧਣ ਦੇ ਮੁੱਖ ਕਾਰਨਾਂ ਵਿਚੋਂ ਇੱਕ ਸਨ। ਹਾਲਾਂਕਿ,ਐਡਵਾਂਸ ਐਸਟੀਮੇਟ ਦੱਸਦੇ ਹਨ ਕਿ ਅਕਤੂਬਰ ਵਿਚ ਆਰਥਿਕਤਾ ਵਿਚ 0.3 ਫੀਸਦੀ ਦੀ ਗਿਰਾਵਟ ਆ ਸਕਦੀ ਹੈ, ਜੋ ਕਿ ਚੌਥੇ ਤਿਮਾਹੀ ਦੀ ਨੈਗੇਟਿਵ ਸ਼ੁਰੂਆਤ ਦਾ ਸੰਕੇਤ ਹੈ।

ਸਟੈਟਿਸਟਿਕਸ ਕੈਨੇਡਾ ਨੇ ਦੱਸਿਆ ਕਿ ਪਿਛਲੀ ਤਿਮਾਹੀ ਵਿਚ ਹਾਊਸ ਹੋਲਡ ਸਪੈਂਡਿੰਗ ਵਿਚ ਗਿਰਾਵਟ ਵਿਕਾਸ ਦਰ ਵਿਚ ਰੁਕਾਵਟ ਦਾ ਮੁੱਖ ਕਾਰਨ ਸੀ। ਗੌਰਤਲਬ ਹੈ ਕਿ ਬੈਂਕ ਔਫ ਕੈਨੇਡਾ ਦੇ 10 ਦਸੰਬਰ ਨੂੰ ਇਸ ਸਾਲ ਦੇ ਆਖਰੀ ਵਿਆਜ ਦਰ ਫੈਸਲੇ ਤੋਂ ਪਹਿਲਾਂ ਇਹ ਅੰਤਿਮ ਜੀ.ਡੀ.ਪੀ.ਰਿਪੋਰਟ ਹੈ।