ਕੈਨੇਡਾ ਨੇ ਤੇਲ ਤੇ ਗੈਸ ਸੈਕਟਰ ਨੂੰ ਮੀਥੇਨ ਨਿਕਾਸ ਤੋਂ ਮੁਕਤ ਕਰਨ ਲਈ ਪ੍ਰਸਤਾਵ ਕੀਤਾ ਪੇਸ਼

ਕੈਨੇਡਾ ਨੇ ਤੇਲ ਅਤੇ ਗੈਸ ਸੈਕਟਰ ਨੂੰ ਮੀਥੇਨ ਨਿਕਾਸ ਤੋਂ ਮੁਕਤ ਕਰਨ ਲਈ ਨਵਾਂ ਡਰਾਫਟ ਪਲਾਨ ਪੇਸ਼ ਕੀਤਾ ਹੈ। ਵਾਤਾਵਰਣ ਮੰਤਰੀ ਸਟੀਵਨ ਗਿਲਬੌਲਟ ਨੇ ਦੁਬਈ ਵਿੱਚ ਹੋ ਰਹੀ ਸਾਲਾਨਾ ਗਲੋਬਲ ਜਲਵਾਯੂ ਵਾਰਤਾ ਵਿੱਚ ਕਿਹਾ ਕਿ ਕੈਨੇਡਾ 2030 ਤੱਕ ਤੇਲ ਅਤੇ ਗੈਸ ਸੈਕਟਰ ਤੋਂ ਪੈਦਾ ਹੋਣ ਵਾਲੇ ਮੀਥੇਨ ਨਿਕਾਸ ਵਿੱਚ ਘੱਟੋ-ਘੱਟ 75 ਫੀਸਦੀ ਕਟੌਤੀ ਕਰੇਗਾ।

ਮੀਥੇਨ ਕਾਰਬਨ ਡਾਈਆਕਸਾਈਡ ਦੀ ਤਰ੍ਹਾਂ ਵਾਯੂਮੰਡਲ ਵਿੱਚ ਲੰਮਾ ਸਮਾਂ ਨਹੀਂ ਰਹਿੰਦੀ ਪਰ ਇਹ ਗਰਮੀ ਨੂੰ ਵਧਾ ਸਕਦੀ ਹੈ। ਇਸ ਲਈ ਮੀਥੇਨ ਦੇ ਨਿਕਾਸ ਨੂੰ ਘਟਾਉਣਾ ਗਲੋਬਲ ਵਾਰਮਿੰਗ ਨੂੰ ਘਟਾਉਣ ਦੇ ਸਭ ਤੋਂ ਪ੍ਰਭਾਵਸ਼ਾਲੀ ਤਰੀਕਿਆਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ।

2021 ਵਿੱਚ ਕੈਨੇਡਾ ਦੇ ਕੁੱਲ ਨਿਕਾਸ ਵਿੱਚ ਮੀਥੇਨ ਦਾ ਯੋਗਦਾਨ ਸਿਰਫ 14 ਫੀਸਦੀ ਸੀ, ਜਦੋਂ ਕਿ ਇਸ ਵਿੱਚ ਤੇਲ ਅਤੇ ਗੈਸ ਉਦਯੋਗ ਦਾ ਯੋਗਦਾਨ 40 ਫੀਸਦੀ ਸੀ।

ਗੌਰਤਲਬ ਹੈ ਕਿ ਕੈਨੇਡਾ ਦੁਨੀਆ ਦਾ ਚੌਥਾ ਸਭ ਤੋਂ ਵੱਡਾ ਤੇਲ ਉਤਪਾਦਕ ਦੇਸ਼ ਹੈ। ਮੀਥੇਨ ਨਿਕਾਸ ਵਿੱਚ ਕਟੌਤੀ ਦੇ ਨਵੇਂ ਨਿਯਮ 2027 ਵਿੱਚ ਲਾਗੂ ਹੋਣੇ ਸ਼ੁਰੂ ਹੋ ਜਾਣਗੇ।