ਕੈਨੇਡਾ ਸਰਕਾਰ ਨੇ ਫੌਜ ਨੂੰ ਆਧੁਨਿਕ ਹਥਿਆਰਾਂ ਨਾਲ ਲੈਸ ਕਰਨ ਲਈ ਨਵੇਂ ਡਿਫੈਂਸ ਸੌਦੇ ਦਾ ਕੀਤਾ ਐਲਾਨ

ਕੈਨੇਡਾ ਸਰਕਾਰ ਨੇ ਫੌਜ ਨੂੰ ਆਧੁਨਿਕ ਹਥਿਆਰਾਂ ਨਾਲ ਲੈਸ ਕਰਨ ਲਈ ਨਵੇਂ ਡਿਫੈਂਸ ਸੌਦੇ ਦਾ ਐਲਾਨ ਕੀਤਾ ਹੈ। ਇਸ ਤਹਿਤ ਸਰਕਾਰ ਕੋਲਟ ਕੈਨੇਡਾ ਕੰਪਨੀ ਤੋਂ 30,000 ਨਵੀਆਂ ਮਾਡਿਊਲਰ ਅਸਾਲਟ ਰਾਈਫਲ ਖਰੀਦਣ ਜਾ ਰਹੀ ਹੈ। ਇਸ ਖਰੀਦ 'ਤੇ $307 ਮਿਲੀਅਨ ਖਰਚ ਕੀਤੇ ਜਾਣਗੇ।

ਇਹ ਰਕਮ ਸਿਰਫ਼ ਪਹਿਲੇ ਤਿੰਨ ਸਾਲਾਂ ਦੇ ਕੌਂਟਰੈਕਟ ਲਈ ਹੈ। ਇਸ ਤੋਂ ਬਾਅਦ ਸਰਕਾਰ 35,000 ਹੋਰ ਰਾਈਫਲ ਖਰੀਦਣ ਦਾ ਵੀ ਵਿਕਲਪ ਰੱਖ ਰਹੀ ਹੈ। ਇਹ ਨਵੀਆਂ ਰਾਈਫਲਾਂ ਕੈਨੇਡੀਅਨ ਆਰਮੀ ਵਿਚ ਪਿਛਲੇ 30 ਸਾਲਾਂ ਤੋਂ ਵਰਤੀਆਂ ਜਾ ਰਹੀਆਂ ਪੁਰਾਣੀਆਂ ਸੀ7 ਅਤੇ ਸੀ8 ਰਾਈਫਲਾਂ ਦੀ ਜਗ੍ਹਾ ਲੈਣਗੀਆਂ।

ਰੱਖਿਆ ਖਰੀਦ ਦੇ ਸਕੱਤਰ ਸਟੀਫਨ Fuhr ਨੇ ਦੱਸਿਆ ਕਿ ਨਵੀਂ ਡਿਫੈਂਸ ਇਨਵੈਸਟਮੈਂਟ ਏਜੰਸੀ ਰਾਹੀਂ ਮਿਲਟਰੀ ਸਾਜ਼ੋ-ਸਾਮਾਨਾਂ ਦੀ ਖਰੀਦ ਪ੍ਰਕਿਰਿਆ ਨੂੰ ਤੇਜ਼ੀ ਨਾਲ ਨੇਪਰੇ ਚਾੜ੍ਹਿਆ ਜਾ ਰਿਹਾ ਹੈ। ਗੌਰਤਲਬ ਹੈ ਕਿ ਇਹ ਲੇਟਸਟ ਕੌਂਟਰੈਕਟ ਸਰਕਾਰ ਵੱਲੋਂ ਹਾਲ ਹੀ ਵਿਚ ਐਲਾਨੇ ਗਏ ਡਿਫੈਂਸ ਖਰਚਿਆਂ ਦੀ ਲੜੀ ਦਾ ਹਿੱਸਾ ਹੈ। ਇਸ ਤੋਂ ਪਹਿਲਾਂ ਸਰਕਾਰ ਨੇ ਸਪੇਸ ਲੌਂਚ ਪੈਡ ਲਈ $200 ਮਿਲੀਅਨ ਅਤੇ ਘਰੇਲੂ ਹਥਿਆਰ ਉਦਯੋਗ ਲਈ $1.4 ਬਿਲੀਅਨ ਦੇ ਫੰਡਾਂ ਦਾ ਐਲਾਨ ਕੀਤਾ ਸੀ।