18.59C Vancouver 18.59C VancouverMay 12, 2020 11:35 PM -
ਕੈਨੇਡਾ ਦੀ ਚੀਫ ਪਬਲਿਕ ਹੈਲਥ ਅਫਸਰ, ਡਾ. ਥਰੈਸਾ ਟੈਮ ਨੇ ਸਲਾਹ ਦਿੱਤੀ ਹੈ ਕਿ ਕੈਨੇਡਾ ਅਤੇ ਅਮਰੀਕਾ ਦੇ ਬਾਰਡਰ ਨੂੰ ਖੋਲ੍ਹਣ ਦਾ ਫੈਸਲਾ ਲੈਂਦੇ ਹੋਏ ਬੇਹੱਦ ਧਿਆਨ ਰੱਖਿਆ ਜਾਵੇ।
ਉਨ੍ਹਾਂ ਕਿਹਾ ਕਿ ਕੈਨੇਡਾ ਨੂੰ ਪਹਿਲਾਂ ਵੇਖਣ ਦੀ ਲੋੜ ਹੈ ਕਿ ਦੇਸ਼ ਦੇ ਅੰਦਰ ਹੀ ਵਰਤੇ ਜਾ ਰਹੇ ਲੋਕ ਸਿਹਤ ਦੇ ਉਪਾਅ (public health measures) 'ਚ ਜਦੋਂ ਢਿੱਲ ਦਿੱਤੀ ਜਾਂਦੀ ਹੈ, ਤਾਂ ਕਿਸ ਪ੍ਰਕਾਰ ਦੇ ਨਤੀਜੇ ਵੇਖਣ ਨੂੰ ਮਿਲਦੇ ਹਨ।
ਇਸਤੋਂ ਬਾਅਦ ਹੀ ਅੰਤਰਰਾਸ਼ਟਰੀ ਟਰੈਵਲ ਸੰਬੰਧੀ ਕੋਈ ਫੈਸਲਾ ਕੀਤਾ ਜਾਵੇ।
ਉਨ੍ਹਾਂ ਕਿਹਾ ਕਿ ਕੈਨੇਡਾ ਨੂੰ ਅਮਰੀਕਾ ਦੀ ਕੋਵਿਡ-19 ਦੀ ਸਥਿਤੀ 'ਤੇ ਨਜ਼ਰ ਬਣਾ ਕੇ ਰੱਖਣ ਦੀ ਲੋੜ ਹੈ ਅਤੇ ਉਸੇ ਅਨੁਸਾਰ ਬਾਰਡਰ ਨੂੰ ਖੋਲ੍ਹਣ ਜਾਂ ਬਾਰਡਰ ਪਾਰ ਦੀ ਯਾਤਰਾ ਸੰਬੰਧੀ ਫੈਸਲਾ ਲੈਣਾ ਚਾਹੀਦਾ ਹੈ।
ਟੈਸਟਿੰਗ 'ਚ ਵਾਧੇ ਦੀ ਲੋੜ
ਡਾ. ਥਰੈਸਾ ਟੈਮ ਦਾ ਕਹਿਣਾ ਹੈ ਕਿ ਕੈਨੇਡਾ 'ਚ ਕੋਵਿਡ-19 ਸੰਬੰਧੀ ਕੀਤੀ ਜਾ ਰਹੀ ਟੈਸਟਿੰਗ 'ਚ ਅਗਲੇ ਦੌਰ 'ਚ ਹੋਰ ਵਧੇਰੇ ਵਾਧਾ ਕਰਨਾ ਹੋਵੇਗਾ।
ਉਨ੍ਹਾਂ ਕਿਹਾ ਕਿ ਇਸਦੇ ਵਿੱਚ ਵਧੇਰੇ ਲੱਛਣਾਂ ਸੰਬੰਧੀ ਟੈਸਟ ਕੀਤੇ ਜਾਣ ਦੀ ਲੋੜ ਹੋਵੇਗੀ।
ਕੁਝ ਸਮਾਂ ਪਹਿਲਾਂ ਤੱਕ ਸਰਕਾਰ ਵੱਲੋਂ ਲੋਕਾਂ ਨੂੰ ਮੰਗ ਕੀਤੀ ਜਾ ਰਹੀ ਸੀ ਕਿ ਵਾਇਰਸ ਸੰਬੰਧੀ ਹਲਕੇ ਲੱਛਣ ਵਿਖਾਈ ਦੇਣ ਤਾਂ ਟੈਸਟ ਕਰਵਾਉਣ ਦੀ ਜਗ੍ਹਾ 'ਤੇ ਖੁਦ ਨੂੰ ਇਕੱਲੇ 'ਚ ਰੱਖਿਆ ਜਾਵੇ।
ਡਾ. ਟੈਮ ਦਾ ਕਹਿਣਾ ਹੈ ਕਿ ਕਿਸ ਨੂੰ ਇਹ ਬਿਮਾਰੀ ਹੈ ਤੇ ਕਿਸ ਨੂੰ ਨਹੀਂ, ਇਸਦੇ ਸੰਬੰਧੀ ਪਤਾ ਲਗਾਉਣ ਲਈ ਕੈਨੇਡਾ ਨੂੰ ਹੁਣ ਵਧੇਰੇ ਟੈਸਟ ਕਰਨੇ ਸ਼ੁਰੂ ਕਰਨ ਦੀ ਲੋੜ ਹੋਵੇਗੀ।
ਜਨਵਰੀ ਦੇ ਮਹੀਨੇ ਜਿਹੇ ਆਮ ਜੀਵਨ 'ਚ ਅਜੇ ਨਹੀਂ ਹੋਵੇਗੀ ਵਾਪਸੀ
ਡਾ. ਥਰੈਸਾ ਟੈਮ ਦਾ ਕਹਿਣਾ ਹੈ ਕਿ ਕੈਨੇਡਾ ਵਿੱਚ ਅਜੇ ਵੱਡੇ ਇਕੱਠ ਅਤੇ ਗੈਰ ਜ਼ਰੂਰੀ ਯਾਤਰਾ ਦੀ ਨੇੜਲੇ ਸਮੇਂ 'ਚ ਇਜਾਜ਼ਤ ਨਹੀਂ ਮਿਲਣ ਵਾਲੀ।
ਡਾ. ਟੈਮ ਦਾ ਕਹਿਣਾ ਹੈ ਕਿ ਕੈਨੇਡਾ ਜਿਸ ਨਵੇਂ ਆਮ ਜੀਵਨ 'ਚ ਦਾਖਿਲਾ ਲੈਣ ਜਾ ਰਿਹਾ ਹੈ, ਉਹ ਉਸੇ ਪ੍ਰਕਾਰ ਦਾ ਨਹੀਂ ਹੋਵੇਗਾ ਜੋ ਜਨਵਰੀ ਤੱਕ ਵੇਖਣ ਨੂੰ ਮਿਲਦਾ ਸੀ।
ਉਨ੍ਹਾਂ ਉਦਾਹਰਣ ਵਜੋਂ ਕਿਹਾ ਕਿ ਹੁਣ ਸਟੋਰ ਦੁਬਾਰਾ ਖੁੱਲ੍ਹਣ ਤੋਂ ਬਾਅਦ ਵੀ ਫਿਜ਼ੀਕਲ ਡਿਸਟੈਨਸਿੰਗ ਜਿਹੇ ਕਦਮ ਉਠਾਉਂਦੇ ਰਹਿਣਾ ਜ਼ਰੂਰੀ ਹੋਵੇਗਾ।
