18.95C Vancouver 18.95C VancouverMay 20, 2025 4:46 PM - Connect Newsroom
ਕੈਨੇਡਾ ਵਿਚ ਮਹਿੰਗਾਈ ਦੀ ਰਫ਼ਤਾਰ ਸਤੰਬਰ ਤੋਂ ਬਾਅਦ ਸਭ ਤੋਂ ਹੌਲੀ ਹੋ ਗਈ ਹੈ। ਸਟੈਟੇਟਿਕਸ ਕੈਨੇਡਾ ਦੇ ਅੰਕੜਿਆਂ ਮੁਤਾਬਕ, ਅਪ੍ਰੈਲ ਵਿਚ ਮਹਿੰਗਾਈ ਦਰ ਇੱਕ ਸਾਲ ਪਹਿਲਾਂ ਦੇ ਮੁਕਾਬਲੇ 1.7 ਫੀਸਦੀ ਵਧੀ ਹੈ, ਜਦੋਂ ਕਿ ਮਾਰਚ ਵਿਚ ਇਹ 2.3 ਫੀਸਦੀ ਸੀ।
ਪਿਛਲੇ ਮਹੀਨੇ ਮਹਿੰਗਾਈ ਵਿਚ ਤੇਜ਼ ਗਿਰਾਵਟ ਅਪ੍ਰੈਲ ਦੇ ਸ਼ੁਰੂ ਵਿਚ ਖ਼ਤਮ ਕੀਤੇ ਗਏ ਖਪਤਕਾਰ ਕਾਰਬਨ ਕੀਮਤ ਕਾਰਨ ਆਈ, ਜਦੋਂ ਕਿ ਮੂਲ ਮਹਿੰਗਾਈ ਯਾਨੀ ਗ੍ਰੋਸਰੀ ਦੀ ਮਹਿੰਗਾਈ ਵਿਚ ਕੋਈ ਰਾਹਤ ਨਹੀਂ ਮਿਲੀ।
ਬੈਂਕ ਆਫ ਕੈਨੇਡਾ ਮੂਲ ਮਹਿੰਗਾਈ ਨੂੰ ਹੀ ਵਿਆਜ ਦਰਾਂ ਵਧਾਉਣ-ਘਟਾਉਣ ਲਈ ਮੁੱਖ ਤੌਰ 'ਤੇ ਦੇਖਦਾ ਹੈ। ਸਟੈਟੇਟਿਕਸ ਡਿਪਾਰਟਮੈਂਟ ਮੁਤਾਬਕ, ਅਪ੍ਰੈਲ ਵਿਚ ਗ੍ਰੋਸਰੀ ਦਾ ਸਾਮਾਨ ਸਾਲ-ਦਰ-ਸਾਲ 3.8 ਫੀਸਦੀ ਮਹਿੰਗਾ ਹੋਇਆ ਹੈ।
ਗੌਰਤਲਬ ਹੈ ਕਿ ਮਹਿੰਗਾਈ ਦੇ ਇਹ ਤਾਜ਼ਾ ਅੰਕੜੇ ਬੈਂਕ ਆਫ ਕੈਨੇਡਾ ਵਲੋਂ 4 ਜੂਨ ਨੂੰ ਅਗਲੀ ਵਿਆਜ ਦਰ ਦੀ ਘੋਸ਼ਣਾ ਕਰਨ ਤੋਂ ਦੋ ਹਫ਼ਤੇ ਪਹਿਲਾਂ ਆਏ ਹਨ। ਬੈਂਕ ਨੇ ਪਿਛਲੇ ਜੂਨ ਤੋਂ 7 ਵਾਰ ਲਗਾਤਾਰ ਰੇਟ ਕੱਟ ਤੋਂ ਬਾਅਦ 16 ਅਪ੍ਰੈਲ ਨੂੰ ਵਿਆਜ ਦਰਾਂ ਨੂੰ ਸਥਿਰ ਰੱਖਿਆ ਸੀ ਅਤੇ ਕਿਹਾ ਸੀ ਕਿ ਜੇ ਮਹਿੰਗਾਈ ਨੂੰ ਕਾਬੂ ਵਿਚ ਰੱਖਣ ਲਈ ਲੋੜ ਪਈ ਤਾਂ ਉਹ ਫੈਸਲਾਕੁੰਨ ਕਦਮ ਚੁੱਕ ਸਕਦਾ ਹੈ।
