ਕੈਨੇਡਾ ਵਿੱਚ ਬੇਰੁਜ਼ਗਾਰੀ ਦਰ 6.9 ਫੀਸਦੀ ਤੱਕ ਪਹੁੰਚੀ, ਅਪ੍ਰੈਲ ਵਿੱਚ 17,700 ਨੌਕਰੀਆਂ ਦਾ ਨੁਕਸਾਨ

ਕੈਨੇਡਾ ਦੀ ਲੇਬਰ ਮਾਰਕੀਟ ਲਈ ਚਿੰਤਾਜਨਕ ਖ਼ਬਰ ਸਾਹਮਣੇ ਆਈ ਹੈ। ਸਟੈਟਿਸਟਿਕਸ ਵਿਭਾਗ ਵੱਲੋਂ ਸ਼ੁੱਕਰਵਾਰ ਨੂੰ ਜਾਰੀ ਤਾਜ਼ਾ ਅੰਕੜਿਆਂ ਅਨੁਸਾਰ, ਅਪ੍ਰੈਲ ਮਹੀਨੇ ਵਿਚ ਦੇਸ਼ ਦੀ ਬੇਰੁਜ਼ਗਾਰੀ ਦਰ 0.2 ਫੀਸਦੀ ਅੰਕ ਵਧ ਕੇ 6.9 ਫੀਸਦੀ ਹੋ ਗਈ ਹੈ, ਜੋ ਕਿ ਪਿਛਲੇ ਛੇ ਮਹੀਨਿਆਂ ਦਾ ਸਭ ਤੋਂ ਉੱਚਾ ਪੱਧਰ ਹੈ। ਪਿਛਲੇ ਮਹੀਨੇ ਸਭ ਤੋਂ ਵੱਧ ਮਾਰ ਫੁੱਲ-ਟਾਈਮ ਨੌਕਰੀਆਂ 'ਤੇ ਪਈ, ਜਿਥੇ 46,700 ਲੋਕਾਂ ਦੀ ਨੌਕਰੀ ਖ਼ਤਮ ਹੋਈ।

ਦੂਜੇ ਪਾਸੇ, ਪਾਰਟ-ਟਾਈਮ ਵਿਚ 29,000 ਨੌਕਰੀਆਂ ਦਾ ਵਾਧਾ ਦਰਜ ਹੋਇਆ, ਜਿਸ ਨਾਲ ਕੈਨੇਡਾ ਨੇ 17,700 ਜੌਬਸ ਦਾ ਨੈਟ ਲੌਸ ਦਰਜ ਕੀਤਾ ਹੈ। ਸਟੈਟਕੈਨ ਮੁਤਾਬਕ, ਸਾਲ 2026 ਦੇ ਪਹਿਲੇ ਚਾਰ ਮਹੀਨਿਆਂ ਵਿਚ 112,000 ਨੌਕਰੀਆਂ ਦਾ ਨੁਕਸਾਨ ਹੋ ਚੁੱਕਾ ਹੈ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, ਪਿਛਲੇ ਮਹੀਨੇ ਨੌਜਵਾਨਾਂ ਵਿਚ ਬੇਰੁਜ਼ਗਾਰੀ ਦਰ ਦੀ ਓਵਰਓਲ ਨਾਲੋਂ ਕਿਤੇ ਵੱਧ ਰਹੀ, ਜੋ ਕਿ 14.3 ਫੀਸਦੀ 'ਤੇ ਪਹੁੰਚ ਗਈ ਹੈ।

ਮਾਹਰਾਂ ਅਨੁਸਾਰ, ਅਮਰੀਕੀ ਟੈਰਿਫ ਅਤੇ CUSMA ਵਪਾਰਕ ਡੀਲ ਨੂੰ ਲੈ ਕੇ ਬਣੀ ਅਨਿਸ਼ਚਿਤਤਾ ਕਾਰਨ ਲੇਬਰ ਮਾਰਕੀਟ ਵਿਚ ਭਾਰੀ ਦਬਾਅ ਹੈ। ਸਟੈਟਕੈਨ ਮੁਤਾਬਕ, ਉੱਚ ਬੇਰੁਜ਼ਗਾਰੀ ਦਰ ਦਰਸਾਉਂਦੀ ਹੈ ਕਿ ਵਧੇਰੇ ਲੋਕ ਕੰਮ ਦੀ ਭਾਲ ਕਰ ਰਹੇ ਹਨ।