ਕੈਨੇਡੀਅਨ ਆਰਮਡ ਫੋਰਸਿਜ਼ ਨੇ ਲਗਾਤਾਰ ਦੂਜੇ ਸਾਲ ਭਰਤੀ ਟੀਚੇ ਕੀਤੇ ਪਾਰ : ਡਿਫੈਂਸ ਮੰਤਰੀ

ਕੈਨੇਡੀਅਨ ਆਰਮਡ ਫੋਰਸਿਜ਼ ਵਿਚ ਨੌਜਵਾਨਾਂ ਦੇ ਭਰਤੀ ਹੋਣ ਵਿਚ ਉਤਸ਼ਾਹ ਦੇਖਿਆ ਜਾ ਰਿਹਾ ਹੈ। ਡਿਫੈਂਸ ਮਿਨਿਸਟਰ ਡੇਵਿਡ ਮੈਕਗਿੰਟੀ ਮੁਤਾਬਕ, ਪਿਛਲੇ ਇੱਕ ਸਾਲ ਵਿਚ 7,300 ਤੋਂ ਵੱਧ ਲੋਕ ਫੌਜ ਵਿਚ ਸ਼ਾਮਲ ਹੋਏ ਹਨ। ਇਹ ਲਗਾਤਾਰ ਦੂਜਾ ਸਾਲ ਹੈ ਜਦੋਂ ਕੈਨੇਡੀਅਨ ਆਰਮਡ ਫੋਰਸਿਜ਼ ਨੇ ਆਪਣੇ ਨਿਰਧਾਰਤ ਭਰਤੀ ਟੀਚਿਆਂ ਨੂੰ ਪਾਰ ਕੀਤਾ ਹੈ।

ਉਨ੍ਹਾਂ ਮੁਤਾਬਕ, ਸਾਲ 2025-26 ਲਈ 6,957 ਨਵੇਂ ਮੈਂਬਰਾਂ ਦੀ ਭਰਤੀ ਦਾ ਟੀਚਾ ਸੀ। ਇਸ ਤੋਂ ਪਹਿਲਾਂ ਸਾਲ 2024-25 ਵਿਚ ਵੀ 6,706 ਨਵੇਂ ਮੈਂਬਰਾਂ ਭਰਤੀ ਕੀਤੇ ਗਏ ਸਨ, ਜੋ ਕਿ 6,496 ਦੇ ਟੀਚੇ ਤੋਂ ਵੱਧ ਸਨ। ਕਾਰਨੀ ਸਰਕਾਰ ਮੁਤਾਬਕ,ਇਹ ਵਾਧਾ ਡਿਫੈਂਸ ਖ਼ਰਚ ਵਿਚ ਕੀਤੇ ਜਾ ਰਹੇ ਵੱਡੇ ਨਿਵੇਸ਼ ਅਤੇ ਤਨਖਾਹਾਂ ਵਿਚ ਕੀਤੇ ਗਏ ਸੁਧਾਰਾਂ ਦਾ ਸਿੱਟਾ ਹੈ।

ਰਾਸ਼ਟਰੀ ਰੱਖਿਆ ਵਿਭਾਗ ਮੁਤਾਬਕ,28 ਫਰਵਰੀ ਤੱਕ ਰੈਗੂਲਰ ਫੋਰਸ ਦੀ ਗਿਣਤੀ 66,726 ਤੱਕ ਪਹੁੰਚ ਗਈ ਹੈ। ਉਥੇ ਹੀ, 31 ਮਾਰਚ 2027 ਤੱਕ ਲਈ ਸਰਕਾਰ ਨੇ 8,200 ਹੋਰ ਨਵੇਂ ਮੈਂਬਰ ਭਰਤੀ ਕਰਨ ਦਾ ਟੀਚਾ ਮਿੱਥਿਆ ਹੈ। ਗੌਰਤਲਬ ਹੈ ਕਿ ਲਗਭਗ 35 ਸਾਲਾਂ ਵਿਚ ਪਹਿਲੀ ਵਾਰ ਕੈਨੇਡਾ ਆਪਣੀ ਜੀ.ਡੀ.ਪੀ. ਦਾ 2 ਫੀਸਦੀ ਡਿਫੈਂਸ 'ਤੇ ਖਰਚ ਕਰ ਰਿਹਾ ਹੈ, ਅਜਿਹਾ ਆਖਰੀ ਵਾਰ ਸ਼ੀਤ ਯੁੱਧ ਦੇ ਅੰਤ ਵੇਲੇ ਦੇਖਿਆ ਗਿਆ ਸੀ।