ਮੇਲਾਨੀ ਜੋਲੀ ਟਰੰਪ ਦੇ ਟੈਰਿਫਾਂ ਨੂੰ ਰੋਕਣ ਲਈ ਅਮਰੀਕਾ ਦਾ ਕਰਨਗੇ ਦੌਰਾ

ਕੈਨੇਡਾ ਦੇ ਵਿਦੇਸ਼ੀ ਮਾਮਲਿਆਂ ਦੇ ਮੰਤਰੀ ਮੇਲਾਨੀ ਜੌਲੀ ਵਲੋਂ ਟਰੰਪ ਦੇ ਟੈਰਿਫ ਨੂੰ ਰੋਕਣ ਦੀ ਕੋਸ਼ਿਸ਼ ਵਜੋਂ ਬੁੱਧਵਾਰ ਨੂੰ ਅਮਰੀਕਾ ਦਾ ਦੌਰਾ ਕੀਤਾ ਜਾਵੇਗਾ। ਜੌਲੀ ਨੇ ਅੱਜ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਇਸ ਦੀ ਪੁਸ਼ਟੀ ਕੀਤੀ।

ਉਨ੍ਹਾਂ ਕਿਹਾ ਕਿ ਜਿੱਥੋਂ ਤੱਕ ਅਮਰੀਕਾ ਨਾਲ ਸਰਹੱਦੀ ਸੁਰੱਖਿਆ ਦੀ ਗੱਲ ਹੈ ਤਾਂ ਕੈਨੇਡਾ ਦੀ ਬਹੁਤ ਵਧੀਆ ਸਰਹੱਦੀ ਯੋਜਨਾ ਹੈ, ਜਿਸ ਨੂੰ ਲਾਗੂ ਕੀਤਾ ਜਾ ਰਿਹਾ ਹੈ। ਜੌਲੀ ਨੇ ਕਿਹਾ ਕਿ ਉਹ ਟੈਰਿਫ ਨੂੰ ਰੋਕਣ ਲਈ ਬੁੱਧਵਾਰ ਨੂੰ ਵਾਸ਼ਿੰਗਟਨ ਵਿਚ ਟਰੰਪ ਦੇ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨਾਲ ਮੁਲਾਕਾਤ ਕਰਨਗੇ ਅਤੇ ਰਾਸ਼ਟਰਪਤੀ ਦੇ ਬਾਰਡਰ ਜ਼ਾਰ-ਟੌਮ ਹੋਮਨ ਨਾਲ ਵੀ ਸੰਪਰਕ ਵਿਚ ਹਨ।

ਹਾਲਾਂਕਿ, ਮੇਲਾਨੀ ਜੌਲੀ ਨੇ ਇਸ ਦੇ ਨਾਲ ਹੀ ਇਹ ਵੀ ਪੁਸ਼ਟੀ ਕੀਤੀ ਕਿ ਕੈਨੇਡਾ ਟਰੰਪ ਦੇ ਟੈਰਿਫ ਦਾ ਪਹਿਲੇ ਹੀ ਦਿਨ ਜਵਾਬ ਦੇਣ ਲਈ ਵੀ ਤਿਆਰ ਹੈ।

ਗੌਰਤਲਬ ਹੈ ਕਿ ਟਰੰਪ ਨੇ 1 ਫਰਵਰੀ ਤੋਂ ਕੈਨੇਡਾ ਦੇ ਮਾਲ ’ਤੇ 25 ਫੀਸਦੀ ਟੈਰਿਫ ਲਗਾਉਣ ਦੀ ਧਮਕੀ ਦਿੱਤੀ ਹੈ, ਜੋ ਕਿ ਬਹੁਤ ਹੀ ਨਜ਼ਦੀਕ ਹੈ। ਐਲਬਰਟਾ ਨੂੰ ਛੱਡ ਕੇ ਕੈਨੇਡਾ ਭਰ ਦੇ ਲਗਭਗ ਸਾਰੇ ਸੂਬੇ ਟੈਰਿਫ ਦਾ ਜਵਾਬ ਦੇਣ ਦੇ ਪੱਖ ਵਿਚ ਹਨ। ਹਾਲਾਂਕਿ, ਇਸ ਨਾਲ ਰੁਜ਼ਗਾਰ ’ਤੇ ਵੀ ਅਸਰ ਪੈਣ ਦੇ ਅਨੁਮਾਨ ਜਤਾਏ ਜਾ ਚੁੱਕੇ ਹਨ।