16.39C Vancouver 16.39C VancouverFeb 20, 2025 5:39 PM - Connect Newsroom
ਕੈਨੇਡੀਅਨ ਸਾਫਟਵੁੱਡ ਇੰਡਸਟਰੀ ਨੂੰ ਅਮਰੀਕਾ ਤੋਂ ਵੱਡਾ ਝਟਕਾ ਲੱਗ ਸਕਦਾ ਹੈ। ਰਿਪੋਰਟਸ ਹਨ ਕਿ ਅਮਰੀਕਾ ਦਾ ਡਿਪਾਰਟਮੈਂਟ ਆਫ ਕਾਮਰਸ ਕੈਨੇਡਾ ਦੀ ਸਾਫਟਵੁੱਡ ਲੱਕੜ ’ਤੇ ਐਂਟੀ-ਡੰਪਿੰਗ ਡਿਊਟੀ ਵਧਾ ਸਕਦਾ ਹੈ।
ਵਪਾਰ ਮਾਹਰ ਦਾ ਕਹਿਣਾ ਹੈ ਕਿ ਜ਼ਿਆਦਾਤਰ ਕੈਨੇਡੀਅਨ ਉਤਪਾਦਕ ਇਸ ਸਮੇਂ ਕੈਨੇਡਾ ਤੋਂ ਅਮਰੀਕਾ ਵਿਚ ਲੱਕੜ ਦੀ ਸ਼ਿਪਮੈਂਟ ’ਤੇ 7.66 ਫੀਸਦੀ ਐਂਟੀ-ਡੰਪਿੰਗ ਡਿਊਟੀ ਦਾ ਭੁਗਤਾਨ ਕਰ ਰਹੇ ਹਨ ਜੋ 20 ਫੀਸਦੀ ਤੱਕ ਵੱਧ ਸਕਦੀ ਹੈ। ਨਵੀਂ ਡਿਊਟੀ ਜੋ ਵੀ ਹੋਵੇਗੀ ਉਹ ਅਗਸਤ ਵਿਚ ਪ੍ਰਭਾਵੀ ਹੋਵੇਗੀ।
ਐਂਟੀ-ਡੰਪਿੰਗ ਡਿਊਟੀ ਇਸ ਲਈ ਜਾ ਰਹੀ ਹੈ ਕਿਉਂਕਿ ਅਮਰੀਕਾ ਦਾ ਮੰਨਣਾ ਹੈ ਕਿ ਕੈਨੇਡੀਅਨ ਉਤਪਾਦਕ ਸਾਫਟਵੁੱਡ ਨੂੰ ਬਾਜ਼ਾਰ ਮੁੱਲ ਤੋਂ ਘੱਟ ਕੀਮਤ ’ਤੇ ਅਮਰੀਕਾ ਵਿਚ ਡੰਪ ਕਰ ਰਹੇ ਹਨ।
ਵੈਨਕੂਵਰ-ਆਧਾਰਿਤ ਜੰਗਲਾਤ ਵਿਸ਼ਲੇਸ਼ਕ ਰੌਸ ਟੇਲਰ ਮੁਤਾਬਕ, ਜ਼ਿਆਦਾਤਰ ਕੈਨੇਡੀਅਨ ਸਾਫਟਵੁੱਡ ਉਤਪਾਦਕ ਕਾਊਂਟਰਵੇਲਿੰਗ ਅਤੇ ਐਂਟੀ-ਡੰਪਿੰਗ ਡਿਊਟੀ ਦਾ ਭੁਗਤਾਨ ਕਰ ਰਹੇ ਹਨ ਜੋ ਵਰਤਮਾਨ ਵਿਚ ਕੁੱਲ 14.4 ਫੀਸਦੀ ਹੈ। ਉਨ੍ਹਾਂ ਕਿਹਾ ਕਿ ਟੈਰਿਫ ਨਾਲ ਸਾਫਟਵੁੱਡ ਡਿਊਟੀ ਹੋਰ ਵੱਧ ਜਾਵੇਗੀ, ਜਿਸ ਨਾਲ ਕੈਨੇਡੀਅਨ ਲੱਕੜ ਦੀ ਸ਼ਿਪਮੈਂਟ ਨੂੰ ਭਾਰੀ ਟੈਕਸ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
