ਕਈ ਪ੍ਰਾਂਤਾਂ ਵਿੱਚ ਕੈਨੇਡੀਅਨ ਅੱਜ ਕਾਰਬਨ ਕੀਮਤਾਂ ਵਿੱਚ ਕਰਨਗੇ ਛੋਟ ਪ੍ਰਾਪਤ

ਕੈਨੇਡੀਅਨਾਂ ਨੂੰ ਸੋਮਵਾਰ ਤੋਂ ਫੈਡਰਲ ਸਰਕਾਰ ਵਲੋਂ 2024 ਦੀ ਪਹਿਲੀ ਕਾਰਬਨ ਕੀਮਤ ਛੋਟ ਪ੍ਰਾਪਤ ਹੋ ਰਹੀ ਹੈ। ਅੱਜ ਕਰੀਬ 12 ਮਿਲੀਅਨ ਕੈਨੇਡੀਅਨਾਂ ਨੂੰ ਫੈਡਰਲ ਕਾਰਬਨ ਟੈਕਸ ਛੋਟਾਂ ਵਿਚ ਲਗਭਗ $2.3 ਬਿਲੀਅਨ ਦਾ ਭੁਗਤਾਨ ਕੀਤਾ ਜਾ ਰਿਹਾ ਹੈ।

ਜਲਵਾਯੂ ਕਾਰਵਾਈ ਪ੍ਰੋਤਸਾਹਨ ਭੁਗਤਾਨ ਨਾਮ ਦੀ ਇਹ ਰਿਬੇਟ 8 ਸੂਬਿਆਂ ਦੇ ਲੋਕਾਂ ਨੂੰ ਮਿਲ ਰਹੀ ਹੈ, ਇਨ੍ਹਾਂ ਵਿਚ ਅਲਬਰਟਾ, ਓਨਟਾਰੀਓ, ਮੈਨੀਟੋਬਾ, ਸਸਕੈਚਵਨ, ਨਿਊ ਬਰੰਜ਼ਵਿਕ, ਪ੍ਰਿੰਸ ਐਡਵਰਡ ਆਈਲੈਂਡ, ਨੋਵਾ ਸਕੋਸ਼ੀਆ ਅਤੇ ਨਿਊਫਾਊਂਡਲੈਂਡ ਅਤੇ ਲੈਬਰਾਡੋਰ ਸ਼ਾਮਲ ਹਨ, ਜਿੱਥੇ ਫੈਡਰਲ ਕਾਰਬਨ ਟੈਕਸ ਲਾਗੂ ਹੈ।

ਇਨ੍ਹਾਂ ਸੂਬਿਆਂ ਦੇ ਟੈਕਸ ਸਿੱਧੇ ਬੈਂਕ ਖਾਤੇ ਵਿਚ ਜਾਂ ਚੈੱਕ ਰਾਹੀਂ ਆਪਣੇ ਆਪ ਪੇਮੈਂਟ ਪ੍ਰਾਪਤ ਕਰਨਗੇ। ਕੈਨੇਡਾ ਰੈਵੇਨਿਊ ਏਜੰਸੀ ਮੁਤਾਬਕ, 81 ਫੀਸਦੀ ਲੋਕਾਂ ਨੂੰ ਆਪਣੇ ਪੈਸੇ ਸਿੱਧੇ ਬੈਂਕ ਖਾਤੇ ਵਿਚ ਪ੍ਰਾਪਤ ਹੋਣਗੇ, ਜਦੋਂ ਕਿ ਬਾਕੀ 19 ਫੀਸਦੀ ਨੂੰ ਡਾਕ ਰਾਹੀਂ ਚੈੱਕ ਭੇਜੇ ਜਾਣਗੇ।

ਬ੍ਰਿਟਿਸ਼ ਕੋਲੰਬੀਆ, ਕਿਊਬਿਕ ਅਤੇ ਉੱਤਰ ਪੱਛਮੀ ਪ੍ਰਦੇਸ਼ ਫੈਡਰਲ ਕਾਰਬਨ ਪ੍ਰਦੂਸ਼ਣ ਕੀਮਤ ਸਿਸਟਮ ਦਾ ਹਿੱਸਾ ਨਹੀਂ ਹਨ, ਇਸ ਲਈ ਇਨ੍ਹਾਂ ਸੂਬਿਆਂ ਦੇ ਵਸਨੀਕ ਕਾਰਬਨ ਪੇਮੈਂਟ ਪ੍ਰਾਪਤ ਕਰਨ ਲਈ ਯੋਗ ਨਹੀਂ ਹਨ। ਉਥੇ ਹੀ, ਅਲਬਰਟਾ ਵਿਚ 4 ਜੀਆਂ ਵਾਲੇ ਪਰਿਵਾਰ ਨੂੰ $386 ਪ੍ਰਾਪਤ ਹੋਣਗੇ ਅਤੇ ਜੋ ਇਕੱਲੇ ਰਹਿੰਦੇ ਹਨ ਉਨ੍ਹਾਂ ਨੂੰ $193 ਮਿਲਣ ਦੀ ਸੰਭਾਵਨਾ ਹੈ।