17.7C Vancouver 17.7C VancouverMay 20, 2026 2:25 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਸਰਕਾਰ ਨੇ ਦੇਸ਼ ਦੀ ਟੌਪ ਮਿਲਟਰੀ ਕਮਾਂਡਰ ਜਨਰਲ Jennie Carignan ਨੂੰ ਅਗਲੇ ਸਾਲ ਖਾਲੀ ਹੋ ਰਹੇ ਨੈਟੋ ਮਿਲਟਰੀ ਕਮੇਟੀ ਦੇ ਚੇਅਰਮੈਨ ਅਹੁਦੇ ਲਈ ਨਾਮਜ਼ਦ ਕੀਤਾ ਹੈ। ਡਿਫੈਂਸ ਮਿਨਿਸਟਰ ਡੇਵਿਡ ਮੈਕਗਿੰਟੀ ਨੇ ਬੁੱਧਵਾਰ ਨੂੰ ਇਸ ਵਕਾਰੀ ਅਹੁਦੇ ਲਈ ਜਨਰਲ Carignan ਦੀ ਉਮੀਦਵਾਰੀ ਦਾ ਰਸਮੀ ਐਲਾਨ ਕੀਤਾ।
ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਉਹ ਅਗਲੇ ਸਾਲ ਤੱਕ ਕੈਨੇਡੀਅਨ ਫੌਜ ਵਿਚ ਆਪਣੀ ਮੌਜੂਦਾ ਭੂਮਿਕਾ Chief of Defence Staff ਵਜੋਂ ਬਣੇ ਰਹਿਣਗੇ। ਦੱਸ ਦੇਈਏ ਕਿ ਨੈਟੋ ਮਿਲਟਰੀ ਕਮੇਟੀ ਦੇ ਅਗਲੇ chair ਲਈ ਚੋਣ ਇਸੇ ਸਾਲ ਸਤੰਬਰ ਵਿਚ ਹੋਣੀ ਹੈ। ਇਸ ਸਮੇਂ ਇਟਾਲੀਅਨ ਨੇਵੀ ਦੇ Admiral Giuseppe Cavo Dragone ਇਸ ਅਹੁਦੇ 'ਤੇ ਤਾਇਨਾਤ ਹਨ, ਜਿਨ੍ਹਾਂ ਦਾ ਕਾਰਜਕਾਲ ਅਗਲੇ ਸਾਲ ਗਰਮੀਆਂ ਵਿਚ ਖ਼ਤਮ ਹੋਣ ਜਾ ਰਿਹਾ ਹੈ। Dragone ਮੌਜੂਦਾ ਸਮੇਂ ਨੈਟੋ ਦੇ ਸੈਕਟਰੀ ਜਨਰਲ ਮਾਰਕ ਰੁਟੇ ਦੇ ਮੁੱਖ ਫੌਜੀ ਸਲਾਹਕਾਰ ਵਜੋਂ ਸੇਵਾਵਾਂ ਦੇ ਰਹੇ ਹਨ ਅਤੇ ਉਹ ਸੰਗਠਨ ਦੇ 32 ਮੈਂਬਰ ਦੇਸ਼ਾਂ ਦੇ ਫੌਜ ਮੁਖੀਆਂ ਵਿਚਕਾਰ ਤਾਲਮੇਲ ਦਾ ਮੁੱਖ ਜ਼ਰੀਆ ਹਨ।
ਕੈਨੇਡਾ ਦੇ ਇਤਿਹਾਸ ਵਿਚ ਆਖਰੀ ਵਾਰ ਇਹ ਅਹੁਦਾ 2000 ਦੇ ਦਹਾਕੇ ਦੀ ਸ਼ੁਰੂਆਤ ਵਿਚ ਸੇਵਾਮੁਕਤ ਜਨਰਲ Ray Henault ਕੋਲ ਸੀ। ਮੰਤਰੀ ਮੈਕਗਿੰਟੀ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਜਨਰਲ Carignan ਇੱਕ ਬੇਮਿਸਾਲ ਫੌਜੀ ਆਗੂ ਹਨ, ਜਿਨ੍ਹਾਂ ਦਾ ਤਜਰਬਾ, ਨਿਰਣਾ ਲੈਣ ਦੀ ਸਮਰੱਥਾ ਅਤੇ ਸਹਿਯੋਗ ਦੀ ਭਾਵਨਾ ਉਨ੍ਹਾਂ ਨੂੰ ਨੈਟੋ ਦੀ ਮਿਲਟਰੀ ਕਮੇਟੀ ਦੇ ਅਗਲੇ ਚੇਅਰ ਲਈ ਇੱਕ ਬਿਹਤਰ ਉਮੀਦਵਾਰ ਬਣਾਉਂਦੀ ਹੈ।
