ਪ੍ਰਧਾਨ ਮੰਤਰੀ ਕਾਰਨੀ ਨੇ ਕੈਨੇਡੀਅਨਾਂ ਨੂੰ ਦਿੱਤੀ ਇਕ ਹੋਰ ਵੱਡੀ ਰਾਹਤ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਕੈਨੇਡੀਅਨਾਂ ਨੂੰ ਇੱਕ ਹੋਰ ਵੱਡੀ ਰਾਹਤ ਦਿੰਦੇ ਹੋਏ ਪੂੰਜੀ ਲਾਭ ਟੈਕਸ ਵਿਚ ਪ੍ਰਸਾਤਿਵ ਵਾਧੇ ਨੂੰ ਰੱਦ ਕਰ ਦਿੱਤਾ ਹੈ। ਇਸ ਦੇ ਨਾਲ ਹੀ ਛੋਟੇ ਕਾਰੋਬਾਰ ਦੇ ਸ਼ੇਅਰ, ਖੇਤੀ ਅਤੇ ਮੱਛੀ ਫੜਨ ਵਾਲੀ ਜਾਇਦਾਦ ਦੀ ਵਿਕਰੀ 'ਤੇ ਲਾਈਫਟਾਈਮ ਕੈਪੀਟਲ ਗੇਨ ਵਿਚ ਛੋਟ ਨੂੰ $1 ਮਿਲੀਅਨ ਤੋਂ ਵਧਾ ਕੇ $1.25 ਮਿਲੀਅਨ ਕਰਨ ਦੇ ਪ੍ਰਸਤਾਵ ਨੂੰ ਬਰਕਰਾਰ ਰੱਖਣ ਦਾ ਫੈਸਲਾ ਕੀਤਾ ਹੈ, ਜਿਸ ਲਈ ਬਿੱਲ ਚੋਣਾਂ ਬਾਅਦ ਪੇਸ਼ ਕੀਤਾ ਜਾਵੇਗਾ।

ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਪੂੰਜੀ ਲਾਭ ਟੈਕਸ ਵਿਚ ਪ੍ਰਸਾਤਿਵ ਵਾਧੇ ਨੂੰ ਰੱਦ ਕਰਨ ਨਾਲ ਕੈਨੇਡਾ ਵਿਚ ਨਿਵੇਸ਼ ਨੂੰ ਵਾਧਾ ਮਿਲੇਗਾ, ਜਿਸ ਨਾਲ ਵਧੇਰੇ ਉੱਚ ਤਨਖਾਹ ਵਾਲੀਆਂ ਨੌਕਰੀਆਂ ਪੈਦਾ ਹੋਣਗੀਆਂ। ਗੌਰਤਲਬ ਹੈ ਕਿ ਪੂੰਜੀ ਲਾਭ ਟੈਕਸ ਵਿਚ ਵਾਧੇ ਦਾ ਪ੍ਰਸਤਾਵ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਸਮੇਂ ਪਿਛਲੇ ਸਾਲ ਬਜਟ ਵਿਚ ਕੀਤਾ ਗਿਆ ਸੀ।

ਇਸ ਤਹਿਤ ਕੈਨੇਡੀਅਨਾਂ ਨੂੰ ਇੱਕ ਸਾਲ ਵਿਚ $250,000 ਤੋਂ ਉੱਪਰ ਹੋਣ ਵਾਲੇ ਦੋ ਤਿਹਾਈ ਨਿਵੇਸ਼ ਲਾਭ 'ਤੇ ਪੂੰਜੀ ਲਾਭ ਟੈਕਸ ਦੇਣਾ ਪੈਣਾ ਸੀ।