26.75C Vancouver 26.75C VancouverApr 15, 2026 5:38 PM - Connect Newsroom - Jasmine Singh with files from The Canadian Press
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਤਾਜ਼ਾ ਜ਼ਿਮਨੀ ਚੋਣਾਂ ਵਿਚ ਜਿੱਤ ਹਾਸਲ ਕਰਨ ਵਾਲੀਆਂ ਤਿੰਨ ਨਵੀਆਂ ਲਿਬਰਲਜ਼ ਐਮ.ਪੀਜ਼ ਨਾਲ ਅੱਜ ਔਟਵਾ ਵਿਚ ਮੁਲਾਕਾਤ ਕੀਤੀ। ਇਸ ਮੌਕੇ ਸਰਕਾਰ ਦੇ ਮੰਤਰੀਆਂ ਅਤੇ ਸੰਸਦ ਮੈਂਬਰਾਂ ਨੇ ਤਾੜੀਆਂ ਦੀ ਗੂੰਜ ਵਿਚ ਨਵੇਂ ਚਿਹਰਿਆਂ ਦਾ ਸਵਾਗਤ ਕੀਤਾ।
ਉਥੇ ਹੀ, ਪਾਰਲੀਮੈਂਟ ਹਿੱਲ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਪ੍ਰਧਾਨ ਮੰਤਰੀ ਕਾਰਨੀ ਨੇ ਖ਼ੁਸ਼ੀ ਜ਼ਾਹਿਰ ਕਰਦਿਆਂ ਦੱਸਿਆ ਕਿ ਹਾਲ ਹੀ ਵਿਚ ਮਰਲਿਨ ਗਲੈਡੂ ਦੇ ਪਾਰਟੀ ਵਿਚ ਸ਼ਾਮਲ ਹੋਣ ਅਤੇ ਇਨ੍ਹਾਂ ਤਿੰਨ ਨਵੀਂਆਂ ਐਮ.ਪੀਜ਼ ਦੇ ਨਾਲ ਹਾਊਸ ਔਫ ਕਾਮਨਜ਼ ਵਿਚ ਸਰਕਾਰੀ ਸਾਈਡ ਵਿਚ ਮਹਿਲਾ ਮੈਂਬਰਸ ਪਾਰਲੀਮੈਂਟ ਦੀ ਗਿਣਤੀ 71 ਹੋ ਗਈ ਹੈ। ਕਾਰਨੀ ਨੇ ਇਸ ਨੂੰ ਸਰਕਾਰ ਦੀਆਂ ਯੋਜਨਾਵਾਂ 'ਤੇ ਲੋਕਾਂ ਦਾ ਭਰੋਸਾ ਅਤੇ ਮਾਣ ਵਾਲਾ ਪੱਲ ਦੱਸਿਆ ਅਤੇ ਕਿਹਾ ਕਿ ਉਹ ਹੁਣ ਨਵੀਂ ਤਾਕਤ ਨਾਲ ਕੰਮ 'ਤੇ ਜੁਟਣ ਜਾ ਰਹੇ ਹਨ।
ਗੌਰਤਲਬ ਹੈ ਕਿ ਟੌਰੋਂਟੋ ਦੀ ਯੂਨੀਵਰਸਿਟੀ-ਰੋਜ਼ਡੇਲ ਸੀਟ ਤੋਂ ਡੈਨੀਅਲ ਮਾਰਟਿਨ ਅਤੇ ਸਕਾਰਬਰੋ ਸਾਊਥ ਵੈਸਟ ਰਾਈਡਿੰਗ ਤੋਂ ਡੋਲੀ ਬੇਗਮ ਅਤੇ ਕਿਊਬੈਕ ਦੀ ਟੈਰੇਬੋਨ ਸੀਟ ਤੋਂ ਟੈਟੀਆਨਾ ਔਗਸਟੇ ਜਿੱਤ ਕੇ ਪਾਰਲੀਮੈਂਟ ਵਿਚ ਪਹੁੰਚੀਆਂ ਹਨ, ਇਨ੍ਹਾਂ ਵਿਚੋਂ ਟੈਟੀਆਨਾ ਨੇ ਬਲਾਕ ਕਿਊਬੈਕਵਾ ਤੋਂ ਆਪਣੀ ਸੀਟ ਕਰੜੇ ਮੁਕਾਬਲੇ ਵਿਚ ਮੁੜ ਹਾਸਲ ਕੀਤੀ ਹੈ।
