21.51C Vancouver 21.51C VancouverMar 13, 2026 1:55 PM - Connect Newsroom - Jasmine Singh with files from The Canadian Press
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਆਉਣ ਵਾਲੀ 16 ਮਾਰਚ ਨੂੰ ਕਿੰਗ ਚਾਰਲਸ ਨਾਲ ਮੁਲਾਕਾਤ ਕਰਨਗੇ। ਇਹ ਮੁਲਾਕਾਤ ਪ੍ਰਧਾਨ ਮੰਤਰੀ ਦੇ ਯੂਰਪੀ ਦੌਰੇ ਦਾ ਅਹਿਮ ਹਿੱਸਾ ਹੈ। 2025 ਵਿਚ ਪ੍ਰਧਾਨ ਮੰਤਰੀ ਬਣਨ ਤੋਂ ਬਾਅਦ ਕਾਰਨੀ ਨੇ ਯੂਰਪੀ ਸਹਿਯੋਗੀਆਂ ਨਾਲ ਰਾਬਤਾ ਵਧਾਉਣ ਨੂੰ ਆਪਣੀ ਪਹਿਲ ਬਣਾਇਆ ਹੈ।
ਪ੍ਰਧਾਨ ਮੰਤਰੀ ਆਪਣੇ ਇਸ ਦੌਰੇ ਦੀ ਸ਼ੁਰੂਆਤ ਅੱਜ ਨਾਰਵੇ ਤੋਂ ਕਰ ਰਹੇ ਹਨ, ਜਿੱਥੇ ਉਹ ਆਰਕਟਿਕ ਸਰਕਲ ਦੇ ਉੱਪਰ ਹੋਣ ਵਾਲੇ ਨੈਟੋ ਦੇ ਫੌਜੀ ਅਭਿਆਸ ਕੋਲਡ ਰਿਸਪਾਂਸ ਨੂੰ ਦੇਖਣਗੇ। ਇਸ ਅਭਿਆਸ ਵਿਚ ਦਰਜਨ ਤੋਂ ਵੱਧ ਦੇਸ਼ਾਂ ਦੇ ਹਜ਼ਾਰਾਂ ਸੈਨਿਕ ਹਿੱਸਾ ਲੈ ਰਹੇ ਹਨ। ਪ੍ਰਧਾਨ ਮੰਤਰੀ ਦਾ ਇਹ ਦੌਰਾ ਅਜਿਹੇ ਸਮੇਂ ਹੋ ਰਿਹਾ ਹੈ ਜਦੋਂ ਗਲੋਬਲ ਸੁਰੱਖਿਆ ਦੇ ਹਾਲਾਤ ਕਾਫੀ ਨਾਜ਼ੁਕ ਬਣੇ ਹੋਏ ਹਨ ਅਤੇ ਕੈਨੇਡਾ ਆਪਣੇ ਡਿਫੈਂਸ ਸਿਸਟਮ ਨੂੰ ਆਧੁਨਿਕ ਬਣਾਉਣ ਲਈ ਯਤਨਸ਼ੀਲ ਹੈ।
ਬੀਤੇ ਕੱਲ੍ਹ ਉਨ੍ਹਾਂ ਆਰਕਟਿਕ ਖੇਤਰ ਦੀ ਸਕਿਓਰਿਟੀ ਲਈ $35 ਬਿਲੀਅਨ ਦੇ ਡਿਫੈਂਸ ਪਲੈਨ ਦਾ ਐਲਾਨ ਕੀਤਾ, ਇਸ ਕਦਮ ਦਾ ਮਕਸਦ ਅਮਰੀਕਾ 'ਤੇ ਨਿਰਭਰਤਾ ਘਟਾਉਣਾ ਹੈ। ਪੀ.ਐਮ.ਓ. ਮੁਤਾਬਕ, ਅਧਿਕਾਰਤ ਦੌਰੇ ਮਗਰੋਂ ਪ੍ਰਧਾਨ ਮੰਤਰੀ ਕੁਝ ਸਮਾਂ ਯੂਰਪ ਵਿਚ ਹੀ ਆਪਣੇ ਨਿੱਜੀ ਰੁਝੇਵਿਆਂ ਲਈ ਰੁਕਣਗੇ ਪਰ ਇਸ ਦੌਰਾਨ ਵੀ ਉਹ ਆਪਣੀ ਟੀਮ ਨਾਲ ਨਿਰੰਤਰ ਸੰਪਰਕ ਵਿਚ ਰਹਿਣਗੇ।
