ਕਾਰਨੀ ਕਰਨਗੇ ਨਾਰਵੇ ਦਾ ਦੌਰਾ, ਉੱਥੋਂ ਦੇ ਲੀਡਰਜ਼ ਨਾਲ ਕਰਨਗੇ ਮੁਲਾਕਾਤ

ਪੀ.ਐਮ.ਮਾਰਕ ਕਾਰਨੀ ਸ਼ੁੱਕਰਵਾਰ ਨੂੰ ਨਾਰਵੇ ਦੇ ਦੌਰੇ 'ਤੇ ਰਵਾਨਾ ਹੋ ਰਹੇ ਹਨ। ਇਸ ਦੌਰਾਨ ਉਹ ਆਰਕਟਿਕ ਸਰਕਲ ਦੇ ਬੇਹੱਦ ਚੁਣੌਤੀਪੂਰਨ ਅਤੇ ਬਰਫ਼ੀਲੇ ਇਲਾਕਿਆਂ ਵਿਚ ਨਾਰਵੇ ਦੀ ਅਗਵਾਈ ਹੇਠ ਹੋ ਰਹੇ ਨੈਟੋ ਦੇ ਫੌਜੀ ਅਭਿਆਸ ਕੋਲਡ ਰਿਸਪਾਂਸ ਨੂੰ ਦੇਖਣ ਲਈ ਹਾਜ਼ਰੀ ਭਰਨਗੇ। ਇਹ ਫੌਜੀ ਅਭਿਆਸ ਹਰ ਦੋ ਸਾਲ ਬਾਅਦ ਕਰਵਾਇਆ ਜਾਂਦਾ ਹੈ,ਜਿਸ ਵਿਚ ਇਸ ਵਾਰ 14 ਮੁਲਕਾਂ ਦੇ ਲਗਭਗ 25,000 ਸੈਨਿਕ ਹਿੱਸਾ ਲੈ ਰਹੇ ਹਨ।

ਇਸ ਕਸਰਤ ਦਾ ਮੁੱਖ ਮਕਸਦ ਆਰਕਟਿਕ ਵਰਗੇ ਮੁਸ਼ਕਲ ਹਾਲਾਤ ਵਿਚ ਜ਼ਮੀਨੀ, ਹਵਾਈ ਅਤੇ ਸਮੁੰਦਰੀ ਫੌਜਾਂ ਦੇ ਤਾਲਮੇਲ ਨੂੰ ਮਜ਼ਬੂਤ ਕਰਨਾ ਹੈ। ਇਸ ਅਭਿਆਸ ਵਿਚ ਹਿੱਸਾ ਲੈਣ ਵਾਲੇ ਦੇਸ਼ਾਂ ਵਿਚ ਕੈਨੇਡਾ, ਅਮਰੀਕਾ, ਯੂ.ਕੇ., ਜਰਮਨੀ, ਨੀਦਰਲੈਂਡ, ਫਰਾਂਸ, ਸਵੀਡਨ ਅਤੇ ਫਿਨਲੈਂਡ ਦੀਆਂ ਫੌਜਾਂ ਸ਼ਾਮਲ ਹਨ। ਓਸਲੋ ਵਿਚ ਆਪਣੇ ਦੌਰੇ ਦੌਰਾਨ ਕਾਰਨੀ ਨਾਰਵੇ ਦੇ ਪ੍ਰਧਾਨ ਮੰਤਰੀ ਨਾਲ ਮੁਲਾਕਾਤ ਕਰਨਗੇ।

ਇਸ ਬੈਠਕ ਵਿਚ ਦੋਵਾਂ ਦੇਸ਼ਾਂ ਵਿਚਾਲੇ ਵਪਾਰ, ਸਾਫ਼ ਊਰਜਾ, ਮਹੱਤਵਪੂਰਨ ਖਣਿਜ ਅਤੇ ਐਰੋਸਪੇਸ ਖੇਤਰ ਵਿਚ ਸਹਿਯੋਗ ਵਧਾਉਣ 'ਤੇ ਚਰਚਾ ਹੋਵੇਗੀ। ਇਸ ਤੋਂ ਇਲਾਵਾ ਉਹ ਕੈਨੇਡਾ-ਨੋਰਡਿਕ ਸੰਮੇਲਨ ਵਿਚ ਵੀ ਸ਼ਿਰਕਤ ਕਰਨਗੇ। ਨਾਰਵੇ ਦਾ ਦੌਰਾ ਮੁਕੰਮਲ ਕਰਨ ਉਪਰੰਤ ਪ੍ਰਧਾਨ ਮੰਤਰੀ ਲੰਡਨ ਜਾਣਗੇ, ਜਿੱਥੇ ਉਨ੍ਹਾਂ ਵਲੋਂ ਯੂ. ਕੇ. ਦੇ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਨਾਲ ਬੈਠਕ ਵਿਚ ਮਿਡਲ ਈਸਟ ਦੀ ਸਥਿਤੀ ਅਤੇ ਡਿਫੈਂਸ ਸਬੰਧਾਂ ਨੂੰ ਲੈ ਕੇ ਅਹਿਮ ਚਰਚਾ ਕੀਤੇ ਜਾਣ ਦੀ ਉਮੀਦ ਹੈ।