ਕੈਨੇਡਾ ਭਰ 'ਚ ਐਕਸਟੋਸ਼ਨ ਨੈੱਟਵਰਕਾਂ ਖ਼ਿਲਾਫ਼ ਸੀ.ਬੀ.ਐਸ.ਏ. ਦੀ ਵੱਡੀ ਕਾਰਵਾਈ, ਦਰਜਨਾਂ ਡਿਪੋਰਟੇਸ਼ਨ

ਕੈਨੇਡਾ ਬਾਰਡਰ ਸਰਵਿਸ ਏਜੰਸੀ ਵਲੋਂ ਐਕਸਟੋਸ਼ਨ ਨੈੱਟਵਰਕ ਖਿਲਾਫ ਜਾਂਚ ਵਿਚ ਵੱਡੀ ਗਿਣਤੀ ਵਿਚ ਡੀਪੋਟੇਸ਼ਨ ਦੀ ਕਾਰਵਾਈ ਕੀਤੀ ਜਾ ਰਹੀ ਹੈ, ਜਾਣਕਾਰੀ ਅਨੁਸਾਰ, ਇਨ੍ਹਾਂ ਅਪਰਾਧਿਕ ਗਤੀਵਿਧੀਆਂ ਖ਼ਿਲਾਫ਼ ਚੱਲ ਰਹੀ ਜਾਂਚ ਤਹਿਤ 7 ਮਈ ਤੱਕ ਦੇਸ਼ ਭਰ ਵਿਚ ਜਬਰੀ ਵਸੂਲੀ ਵਿਚ ਸ਼ਾਮਲ ਜਾਂ ਇਸ ਨਾਲ ਜੁੜੇ ਹੋਣ ਦੇ ਸ਼ੱਕ ਵਿਚ ਵਿਦੇਸ਼ੀ ਨਾਗਰਿਕਾਂ ਵਿਰੁੱਧ 446 ਇਮੀਗ੍ਰੇਸ਼ਨ ਜਾਂਚ ਸ਼ੁਰੂ ਕੀਤੀਆਂ ਗਈਆਂ ਹਨ।

ਇਸ ਜਾਂਚ ਦੇ ਸਿੱਟੇ ਵਜੋਂ ਸੀ.ਬੀ.ਐਸ.ਏ. ਨੇ 118 ਸ਼ੱਕੀਆਂ ਨੂੰ ਰੀਮੂਵਲ ਆਰਡਰ ਜਾਰੀ ਕੀਤੇ ਹਨ ਅਤੇ ਹੁਣ ਤੱਕ ਅਜਿਹੇ ਗੈਰ-ਕਾਨੂੰਨੀ ਨੈੱਟਵਰਕਾਂ ਨਾਲ ਜੁੜੇ 55 ਵਿਅਕਤੀਆਂ ਨੂੰ ਕੈਨੇਡਾ ਤੋਂ ਕੱਢ ਦਿੱਤਾ ਗਿਆ ਹੈ। ਉਥੇ ਹੀ, ਐਕਸਟੋਸ਼ਨ ਨਾਲ ਸਭ ਤੋਂ ਪ੍ਰਭਾਵਿਤ ਬ੍ਰਿਟਿਸ਼ ਕੋਲੰਬੀਆ ਦੀ ਗੱਲ ਕਰੀਏ ਤਾਂ ਸੀ.ਬੀ.ਐਸ.ਏ. ਦੀ ਰੀਜਨਲ ਡਾਇਰੈਕਟਰ ਨੀਨਾ ਪਟੇਲ ਮੁਤਾਬਕ, ਪ੍ਰਸ਼ਾਂਤ ਖੇਤਰ ਵਿਚ ਹੁਣ ਤੱਕ 132 ਜਾਂਚਾਂ ਮੁਕੰਮਲ ਕੀਤੀਆਂ ਗਈਆਂ ਹਨ ਅਤੇ ਏਜੰਸੀ ਨੇ 52 ਰੀਮੂਵਲ ਆਰਡਰ ਜਾਰੀ ਕੀਤੇ ਹਨ, ਜਿਸ ਦੇ ਚੱਲਦੇ 33 ਲੋਕਾਂ ਨੂੰ ਡਿਪੋਰਟ ਕੀਤਾ ਜਾ ਚੁੱਕਾ ਹੈ।

ਗੌਰਤਲਬ ਹੈ ਕਿ ਇਹ ਸਾਰੀ ਅਪਡੇਟ ਬੀਤੀ ਸ਼ਾਮ ਬੀ. ਸੀ. ਦੀ ਪਬਲਿਕ ਸੇਫਟੀ ਮਿਨਿਸਟਰ ਨੀਨਾ ਕਰੀਗਰ ਦੀ ਅਗਵਾਈ ਵਿਚ ਹੋਈ ਗੋਲਮੇਜ਼ ਚਰਚਾ ਵਿਚ ਸਾਹਮਣੇ ਆਈ ਹੈ, ਜਿਸ ਵਿਚ CBSA ਅਤੇ ਲੋਕਲ ਪੁਲਿਸ ਤੇ ਐਕਸਟੋਸ਼ਨ ਖਿਲਾਫ ਜਾਂਚ ਟੀਮਾਂ ਸ਼ਾਮਲ ਸਨ।