9.25C Vancouver 9.25C VancouverMar 13, 2026 6:26 PM - Connect Newsroom - Jasmine Singh
ਬੀ. ਸੀ. ਦੇ ਪੈਸੀਫਿਕ ਹਾਈਵੇਅ ਪੋਰਟ 'ਤੇ ਕੈਨੇਡਾ ਬਾਰਡਰ ਸਰਵਿਸ ਏਜੰਸੀ ਨੇ ਇੱਕ ਵਪਾਰਕ ਟਰੱਕ ਵਿਚੋਂ 112 ਕਿੱਲੋਗ੍ਰਾਮ ਅਫ਼ੀਮ ਜ਼ਬਤ ਕੀਤੀ ਹੈ। ਸੀ.ਬੀ.ਐਸ.ਏ. ਨੇ ਅੱਜ ਇੱਕ ਬਿਆਨ ਵਿਚ ਕਿਹਾ ਕਿ ਇਹ ਕਾਰਵਾਈ 9 ਜਨਵਰੀ ਨੂੰ ਕੀਤੀ ਗਈ ਸੀ, ਟਰੱਕ ਅਮਰੀਕਾ ਤੋਂ ਕੈਨੇਡਾ ਵਾਪਸ ਆਇਆ ਸੀ।
ਬਾਰਡਰ ਔਫੀਸਰ ਨੇ ਟਰੱਕ ਦੇ ਟ੍ਰੇਲਰ ਵਿਚ ਕੁਝ ਆਸਧਾਰਨ ਚੀਜ਼ਾਂ ਦੇਖੀਆਂ, ਤਲਾਸ਼ੀ ਦੌਰਾਨ ਉਨ੍ਹਾਂ ਨੂੰ ਅਜਿਹੇ ਗੱਤੇ ਦੇ ਡੱਬੇ ਮਿਲੇ ਜੋ ਆਮ ਤੌਰ 'ਤੇ ਸਬਜ਼ੀਆਂ ਜਾਂ ਫਲਾਂ ਦੀ ਪੈਕਿੰਗ ਲਈ ਨਹੀਂ ਵਰਤੇ ਜਾਂਦੇ ਹਨ, ਇਨ੍ਹਾਂ ਦੀ ਆੜ ਵਿਚ ਅਫੀਮ ਦੇ 108 ਪੈਕੇਜ ਲੁਕਾਏ ਹੋਏ ਸਨ। ਡਿਟੈਕਟਰ ਡੌਗ ਦੀ ਮਦਦ ਨਾਲ ਇਹ ਖੇਪ ਫੜੀ ਗਈ ਅਤੇ ਸੀ.ਬੀ.ਐਸ.ਏ. ਨੇ ਟਰੱਕ ਡਰਾਈਵਰ ਅਤੇ ਨਸ਼ੀਲੇ ਪਦਾਰਥਾਂ ਨੂੰ ਅਗਲੀ ਜਾਂਚ ਲਈ ਆਰ.ਸੀ.ਐਮ.ਪੀ. ਦੀ ਫੈਡਰਲ ਪੁਲਿਸਿੰਗ ਯੂਨਿਟ ਦੇ ਹਵਾਲੇ ਕਰ ਦਿੱਤਾ।
ਇਸ ਮਾਮਲੇ ਵਿਚ ਅੱਗੇ ਦੀ ਜਾਂਚ ਜਾਰੀ ਹੈ, ਜਿਸ ਕਾਰਨ ਟਰੱਕ ਡਰਾਈਵਰ ਦੇ ਨਾਮ ਦਾ ਖੁਲਾਸਾ ਨਹੀਂ ਕੀਤਾ ਗਿਆ ਹੈ। ਬਾਰਡਰ ਸਰਵਿਸ ਏਜੰਸੀ ਦੇ ਅੰਕੜਿਆਂ ਅਨੁਸਾਰ, ਸਾਲ 2025 ਵਿਚ ਬ੍ਰਿਟਿਸ਼ ਕੋਲੰਬੀਆ ਦੀਆਂ ਸਰਹੱਦਾਂ 'ਤੇ ਕੁੱਲ 11,390 ਨਸ਼ਾ ਤਸਕਰੀ ਦੇ ਮਾਮਲੇ ਫੜੇ ਗਏ ਸਨ, ਜਿਨ੍ਹਾਂ ਵਿਚ 329 ਕਿੱਲੋ ਓਪੀਔਡਜ਼ ਸ਼ਾਮਲ ਸਨ।
