ਸੀ.ਬੀ.ਐਸ.ਏ. ਨੇ ਬਲੂ ਵਾਟਰ ਬ੍ਰਿਜ 'ਚ ਵੱਡੀ ਮਾਤਰਾ 'ਚ ਜ਼ਬਤ ਕੀਤੀ ਕੋਕੇਨ, ਬਰੈਂਪਟਨ ਵਾਸੀ 'ਤੇ ਲੱਗੇ ਦੋਸ਼

ਕੈਨੇਡੀਅਨ ਬਾਰਡਰ ਅਧਿਕਾਰੀ ਨੇ ਇੱਕ 27 ਸਾਲਾ ਪੰਜਾਬੀ ਡਰਾਈਵਰ ਨੂੰ ਬਲੂ ਵਾਟਰ ਬ੍ਰਿਜ 'ਤੇ ਵੱਡੀ ਮਾਤਰਾ ਵਿਚ ਕੋਕੀਨ ਦੀ ਖੇਪ ਨਾਲ ਗ੍ਰਿਫਤਾਰ ਕੀਤਾ ਹੈ। ਨੌਜਵਾਨ ਦੀ ਪਛਾਣ ਬਰੈਂਪਟਨ ਦੇ ਕਰਮਵੀਰ ਸਿੰਘ ਵਜੋਂ ਹੋਈ ਹੈ। ਬਾਰਡਰ ਅਧਿਕਾਰੀ ਨੇ ਕਿਹਾ ਕਿ ਲਗਭਗ 190 ਕਿਲੋਗ੍ਰਾਮ ਕੋਕੀਨ ਜ਼ਬਤ ਕੀਤੀ ਗਈ, ਜਿਸ ਦੀ ਅਨੁਮਾਨਤ ਸਟ੍ਰੀਟ ਵੈਲਿਊ $23.3 ਮਿਲੀਅਨ ਹੈ।

ਇਹ ਡਰੱਗ ਵਪਾਰਕ ਟਰੱਕ ਵਿਚ ਲੁਕਾਈ ਗਈ ਸੀ ਜਿਸ ਦਾ ਡਰਾਈਵਰ ਕਰਮਵੀਰ ਸਿੰਘ ਸੀ। ਇਸ ਦਾ ਪਰਦਾਫਾਸ਼ 12 ਜੂਨ ਨੂੰ ਉਦੋਂ ਹੋਇਆ ਜਦੋਂ ਅਮਰੀਕਾ ਤੋਂ ਆਏ ਟਰੱਕ ਦੀ ਓਨਟਾਰੀਓ ਦੇ ਪੁਆਇੰਟ ਐਡਵਰਡ ਵਿਚ ਐਂਟਰੀ 'ਤੇ ਤਲਾਸ਼ੀ ਲਈ ਗਈ।

ਸੀਬੀਐਸਏ ਅਧਿਕਾਰੀ ਨੇ ਖੋਜੀ ਕੁੱਤੇ ਦੀ ਮਦਦ ਨਾਲ ਟ੍ਰੇਲਰ ਵਿਚ 6 ਬਕਸਿਆਂ ਵਿਚ ਲੁਕਾਈ ਗਈ ਸ਼ੱਕੀ ਕੋਕੀਨ ਬਰਾਮਦ ਕੀਤੀ।

ਬਾਰਡਰ ਅਧਿਕਾਰੀ ਨੇ ਕਿਹਾ ਕਿ 27 ਸਾਲਾ ਡਰਾਈਵਰ ਕਰਮਵੀਰ ਸਿੰਘ ਨੂੰ ਆਰ.ਸੀ.ਐਮ.ਪੀ. ਦੇ ਹਵਾਲੇ ਕੀਤਾ ਜਾ ਚੁੱਕਾ ਹੈ, ਜੋ ਹੁਣ ਕੋਕੀਨ ਕੈਨੇਡਾ ਵਿਚ ਲਿਆਉਣ ਅਤੇ ਇਸ ਦੀ ਤਸਕਰੀ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਿਹਾ ਹੈ। ਆਰ.ਸੀ.ਐਮ.ਪੀ. ਨੇ ਕਿਹਾ ਕਿ ਜਾਂਚ ਜਾਰੀ ਹੈ ਅਤੇ ਹੋਰ ਗ੍ਰਿਫ਼ਤਾਰੀਆਂ ਹੋ ਸਕਦੀਆਂ ਹਨ।