13.82C Vancouver 13.82C VancouverNov 7, 2025 2:59 PM - Connect Newsroom - Jasmine Singh with files from The Canadian Press
ਬੀ.ਸੀ.ਦੇ ਐਜਵੁੱਡ ਵਿਚ ਵੀਰਵਾਰ ਦੀ ਰਾਤ ਸੀ.ਐਫ.ਆਈ.ਏ.ਨੇ ਯੂਨੀਵਰਸਲ ਔਸਟਰਿਚ ਫਾਰਮ'ਤੇ ਸੈਂਕੜੇ ਸ਼ੁਤਰਮੁਰਗਾਂ ਨੂੰ ਮਾਰਨ ਦੀ ਵਿਵਾਦਤ ਕਾਰਵਾਈ ਨੂੰ ਅੰਜਾਮ ਦਿੱਤਾ, ਸੁਪਰੀਮ ਕੋਰਟ ਔਫ ਕੈਨੇਡਾ ਵਲੋਂ ਫਾਰਮ ਮਾਲਕਾਂ ਦੀ ਅੰਤਿਮ ਅਪੀਲ ਨੂੰ ਸੁਣਨ ਤੋਂ ਇਨਕਾਰ ਕਰਨ ਦੇ ਕੁਝ ਘੰਟਿਆਂ ਬਾਅਦ ਹੀ ਇਸ ਫਾਰਮ ਵਿਚ ਗੋਲੀਆਂ ਚੱਲਣ ਦੀ ਆਵਾਜ਼ ਗੂੰਜਦੀ ਸੁਣਾਈ ਦਿੱਤੀ।
ਚਸ਼ਮਦੀਦਾਂ ਨੇ ਦੱਸਿਆ ਕਿ ਗੰਨਸ਼ਾਟ ਦੀ ਆਵਾਜ਼ ਘਾਹ ਦੀਆਂ ਗੱਠਾਂ ਦੇ ਬਣੇ ਇੱਕ ਵਾੜੇ ਦੇ ਅੰਦਰੋਂ ਆਈਆਂ, ਜਿੱਥੇ ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਦੇ ਕਰਮਚਾਰੀਆਂ ਵਲੋਂ ਸ਼ਤਰਮੁਰਗਾਂ ਨੂੰ ਇਕੱਠਾ ਕੀਤਾ ਗਿਆ ਸੀ। ਸੁਰੱਖਿਆ ਦੇ ਸਖ਼ਤ ਪ੍ਰਬੰਧਾਂ ਹੇਠ ਕੀਤੀ ਗਈ ਮਾਰਨ ਦੀ ਕਾਰਵਾਈ ਦੌਰਾਨ ਵਿਰੋਧ ਕਰਨ ਵਾਲੇ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ, ਫਾਰਮ ਵੱਲ ਜਾਣ ਵਾਲੀ ਸੜਕ 'ਤੇ ਖੜ੍ਹੀਆਂ ਲਗਭਗ ਇੱਕ ਦਰਜਨ ਕਾਰਾਂ ਤੋਂ ਸਮਰਥਕ ਕਾਰਵਾਈ ਰੋਕੋ ਤੇ ਕਾਤਲ ਦੇ ਨਾਅਰੇ ਲਗਾ ਰਹੇ ਸਨ।
ਗੌਰਤਲਬ ਹੈ ਕਿ ਇਹ ਘਟਨਾ ਮਹੀਨਿਆਂ ਦੀ ਤਿੱਖੀ ਜਨਤਕ ਬਹਿਸ ਅਤੇ ਕਾਨੂੰਨੀ ਖਿੱਚੋਤਾਣ ਤੋਂ ਬਾਅਦ ਹੋਈ। ਫਾਰਮ ਦੇ ਮਾਲਕਾਂ ਨੇ ਮਾਰਨ ਦੇ ਹੁਕਮ ਨੂੰ 10 ਮਹੀਨਿਆਂ ਤੋਂ ਵੱਧ ਸਮੇਂ ਤੱਕ ਅਦਾਲਤਾਂ ਵਿਚ ਚੁਣੌਤੀ ਦਿੱਤੀ। ਉਨ੍ਹਾਂ ਦਾ ਤਰਕ ਸੀ ਕਿ ਬਾਕੀ ਬਚਿਆ ਝੁੰਡ ਸਿਹਤਮੰਦ ਹੈ। ਹਾਲਾਂਕਿ,ਸੁਪਰੀਮ ਕੋਰਟ ਔਫ ਕੈਨੇਡਾ ਨੇ ਉਨ੍ਹਾਂ ਦੀ ਆਖਰੀ ਅਪੀਲ ਸੁਣਨ ਤੋਂ ਇਨਕਾਰ ਕਰ ਦਿੱਤਾ,ਜਿਸ ਨਾਲ ਸ਼ੁਤਰਮੁਰਗਾਂ ਨੂੰ ਮਾਰਨ ਦੀ ਕਾਨੂੰਨੀ ਰੋਕ ਹਟ ਗਈ।
