ਸ਼ਤਰਮੁਰਗਾਂ ਨੂੰ ਮਾਰਨ ਦੀ ਕਾਰਵਾਈ ਕਰਨ ਵਾਲੀ ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਦੇ ਵਰਕਰਾਂ ਦੀ ਵਧੀ ਚਿੰਤਾ

ਬੀ.ਸੀ. ਦੇ ਐਜਵੁੱਡ ਸਥਿਤ ਯੂਨੀਵਰਸਲ ਓਸਟ੍ਰਿਚ ਫਾਰਮ ਵਿਚ ਸ਼ਤਰਮੁਰਗਾਂ ਨੂੰ ਮਾਰਨ ਦੀ ਕਾਰਵਾਈ ਕਰਨ ਵਾਲੀ ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਦੇ ਵਰਕਰਜ਼ ਨਾਲ ਜੁੜੀ ਚਿੰਤਾਜਨਕ ਖ਼ਬਰ ਸਾਹਮਣੇ ਆਈ ਹੈ।

ਏਜੰਸੀ ਦੇ ਇੱਕ ਸੀਨੀਅਰ ਅਧਿਕਾਰੀ ਮੁਤਾਬਕ, ਪਿਛਲੇ ਸਾਲ ਫਾਰਮ ਵਿਚ ਬਰਡ ਫਲੂ ਦੇ ਖ਼ਤਰੇ ਕਾਰਨ ਕਲ ਓਪਰੇਸ਼ਨ ਦੀ ਕਾਰਵਾਈ ਕੀਤੀ ਗਈ ਸੀ ਪਰ ਇਸ ਨੇ ਵਿਰੋਧ ਕਰਨ ਵਾਲਿਆਂ ਦੀ ਭਾਵਨਾਵਾਂ ਨੂੰ ਭੜਕਾ ਦਿੱਤਾ, ਜਿਸ ਦੇ ਨਤੀਜੇ ਵਜੋਂ ਏਜੰਸੀ ਦੇ ਕਰਮਚਾਰੀਆਂ ਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਔਨਲਾਈਨ ਅਤੇ ਵਿਅਕਤੀਗਤ ਤੌਰ 'ਤੇ ਧਮਕੀਆਂ ਮਿਲੀਆਂ।

ਇੱਕ ਮਾਮਲੇ ਵਿਚ ਏਜੰਸੀ ਨੂੰ ਇੱਕ ਕਰਮਚਾਰੀ ਤੇ ਉਸ ਦੇ ਪਰਿਵਾਰ ਨੂੰ ਤੁਰੰਤ ਸੁਰੱਖਿਅਤ ਥਾਂ 'ਤੇ ਤਬਦੀਲ ਕਰਨਾ ਪਿਆ ਸੀ। ਕੈਨੇਡੀਅਨ ਪ੍ਰੈਸ ਨੂੰ ਦਿੱਤੇ ਇੰਟਰਵਿਊ ਵਿਚ ਅਧਿਕਾਰੀ ਨੇ ਕਿਹਾ ਕਿ ਨਵੰਬਰ ਵਿਚ ਸ਼ਤਰਮੁਰਗਾਂ ਨੂੰ ਮਾਰਨ ਦੀ ਹੋਈ ਕਾਰਵਾਈ ਤੋਂ ਪਹਿਲਾਂ ਤੇ ਬਾਅਦ ਵਿਚ ਧਮਕੀਆਂ ਦਾ ਇੱਕ ਸਿਲਸਿਲਾ ਚੱਲ ਪਿਆ ਸੀ। ਤਣਾਅ ਦੇ ਮਾਹੌਲ ਦੌਰਾਨ ਕੈਲਗਰੀ ਵਿਚ ਸੀ.ਐਫ.ਆਈ.ਏ. ਦੇ ਦਫ਼ਤਰ ਅਤੇ ਵਾਹਨਾਂ ਦਾ ਨੁਕਸਾਨ ਤੱਕ ਕੀਤਾ ਗਿਆ ਸੀ।

ਗੌਰਤਲਬ ਹੈ ਕਿ ਫੈਡਰਲ ਸਰਕਾਰ ਦੇ ਅੰਕੜਿਆਂ ਮੁਤਾਬਕ, ਲਗਭਗ 300 ਸ਼ਤਰਮੁਰਗਾਂ ਨੂੰ ਮਾਰਨ ਲਈ ਚਲਾਏ ਗਏ ਇਸ ਓਪਰੇਸ਼ਨ ਦਾ ਖ਼ਰਚ ਕਰੀਬ $7 ਮਿਲੀਅਨ ਵਿਚ ਪਿਆ, ਜਿਸ ਵਿਚ $3.8 ਮਿਲੀਅਨ ਓਪਰੇਸ਼ਨ ਦੀ ਨਿਗਰਾਨੀ ਅਤੇ ਸੁਰੱਖਿਆ ਲਈ ਆਰ.ਸੀ.ਐਮ.ਪੀ. 'ਤੇ ਖ਼ਰਚ ਹੋਏ ਸਨ।