ਹੌਂਗ ਕੌਂਗ 'ਚ ਦਖ਼ਲ ਦੇ ਸੰਬੰਧ ਵਿੱਚ ਚੀਨ ਨੇ ਕੈਨੇਡਾ ਨੂੰ ਦਿੱਤੀ ਚਿਤਾਵਨੀ

ਕੈਨੇਡਾ ਵੱਲੋਂ ਹੌਂਗ ਕੌਂਗ ਨਾਲ ਹਵਾਲਗੀ ਸਮਝੌਤਾ ਰੱਦ ਕੀਤੇ ਜਾਣ ਅਤੇ ਸੰਵੇਦਨਸ਼ੀਲ ਮਿਲਟਰੀ ਸਮਾਨ ਦੇ ਵਪਾਰ 'ਤੇ ਰੋਕ ਲਗਾਏ ਜਾਣ ਦੇ ਜਵਾਬ ਵਿੱਚ ਅੱਜ ਚੀਨ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਜਾਓ ਲਿਜਿਆਨ ਨੇ ਕੈਨੇਡਾ ਨੂੰ ਗੰਭੀਰ ਨਤੀਜਿਆਂ ਲਈ ਤਿਆਰ ਰਹਿਣ ਦੀ ਚਿਤਾਵਨੀ ਦਿੱਤੀ।

ਲਿਜਿਆਨ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਚੀਨ, ਕੈਨੇਡਾ ਦੇ ਇਸ ਕਦਮ ਦੀ ਨਿਖੇਧੀ ਕਰਦਾ ਹੈ ਅਤੇ ਹੁਣ ਜਵਾਬੀ ਕਾਰਵਾਈ ਕਰਨ ਦਾ ਅਧਿਕਾਰ ਚੀਨ ਕੋਲ ਹੈ।

ਇਸ ਤੋਂ ਪਹਿਲਾਂ, ਕੈਨੇਡਾ ਦੇ ਫ਼ੌਰਨ ਅਫ਼ੇਅਰਜ਼ ਮਿਨਿਸਟਰ ਫ਼੍ਰਾਂਸੂਆ ਫ਼ੀਲੀਪ ਸ਼ੈਂਪੇਨ ਨੇ ਕਿਹਾ ਸੀ ਕਿ ਚੀਨ ਵੱਲੋਂ ਹੌਂਗ ਕੌਂਗ ਦੇ ਬੇਸਿਕ ਲਾਅ ਦੀ ਬੇਕਦਰੀ ਕੀਤੀ ਜਾ ਰਹੀ ਹੈ ਅਤੇ ਇਸ ਕਾਰਣ ਕੈਨੇਡਾ ਨੂੰ ਹੌਂਗ ਕੌਂਗ ਨਾਲ ਮੌਜੂਦਾ ਪ੍ਰਬੰਧਾਂ ਬਾਰੇ ਮੁੜ ਵਿਚਾਰ ਕਰਨਾ ਪੈ ਰਿਹਾ ਹੈ।

ਅੱਜ ਔਟਵਾ ਵਿੱਚ ਚੀਨ ਦੀ ਐਮਬੈਸੀ ਵੱਲੋਂ ਚੀਨੀ ਨਾਗਰਿਕਾਂ ਲਈ 'ਵੀ ਚੈਟ' 'ਤੇ ਇੱਕ ਆਵਾਜਾਈ ਸੰਬੰਧਿਤ ਚੇਤਾਵਨੀ ਵੀ ਜਾਰੀ ਕੀਤੀ ਗਈ। ਇਸ ਵਿੱਚ ਲਿਖਿਆ ਗਿਆ ਹੈ ਕਿ ਜੇਕਰ ਕੋਈ ਚੀਨੀ ਨਾਗਰਿਕ ਕੈਨੇਡਾ ਜਾਂਦਾ ਹੈ ਤਾਂ ਉਸ ਖਿਲਾਫ਼ ਕੈਨੇਡਾ ਵੱਲੋਂ 'ਹਿੰਸਕ ਕਾਰਵਾਈ' ਕੀਤੀ ਜਾ ਸਕਦੀ ਹੈ।