ਕੈਲਗਰੀ 'ਚ ਹਟਾਈਆਂ ਗਈਆਂ ਪਾਣੀ ਸਬੰਧੀ ਪਾਬੰਦੀਆਂ

ਕੈਲਗਰੀ ਸਿਟੀ ਵਲੋਂ ਬੀਤੇ ਦਿਨ ਪਾਣੀ ਸਬੰਧੀ ਲਾਈਆਂ ਸਾਰੀਆਂ ਪਾਬੰਦੀਆਂ ਨੂੰ ਹਟਾ ਦਿੱਤਾ ਗਿਆ ਹੈ। ਬੀਅਰਸਪੌ ਸਾਊਥ ਫੀਡਰ ਮੇਨ ਦੀ ਸਰਵਿਸ ਮੁੜ ਸ਼ੁਰੂ ਹੋ ਗਈ ਹੈ।

ਕੈਲਗਰੀ ਦੀ ਮੇਅਰ ਜੋਤੀ ਗੋਂਡੇਕ ਨੇ ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਕੈਲਗੇਰੀਅਨਜ਼ ਨੂੰ ਸਾਥ ਦੇਣ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਲੋਕਾਂ ਨੇ ਇਸ ਨਾਜ਼ੁਕ ਰੱਖ-ਰਖਾਅ ਪ੍ਰਾਜੈਕਟ ਨੂੰ ਪੂਰਾ ਕਰਨ ਵਿਚ ਜੋ ਸਹਿਯੋਗ ਦਿੱਤਾ, ਉਹ ਤਾਰੀਫਯੋਗ ਹੈ। ਲੋਕਾਂ ਵਲੋਂ ਬਚਾਇਆ ਗਿਆ ਹਰ ਲੀਟਰ ਪਾਣੀ ਦਾ ਬਹੁਤ ਫਾਇਦਾ ਹੋਇਆ, ਇਸ ਨਾਲ ਪਾਣੀ ਦੇ ਸਿਸਟਮ 'ਤੇ ਬੋਝ ਪੈਣ ਤੋਂ ਬਚਾਅ ਰਿਹਾ। ਸਿਟੀ ਦੀ ਪੂਰੀ ਕੋਸ਼ਿਸ਼ ਰਹੀ ਕਿ ਘਰਾਂ ਅਤੇ ਕਾਰੋਬਾਰ ਨੂੰ ਸੁਰੱਖਿਅਤ ਅਤੇ ਸਾਫ ਪੀਣ ਵਾਲਾ ਪਾਣੀ ਮਿਲੇ।

ਸਿਟੀ ਔਫੀਸ਼ੀਅਲਜ਼ ਵਲੋਂ ਕਿਹਾ ਗਿਆ ਸੀ ਕਿ ਉਹ 23 ਸਤੰਬਰ ਤੱਕ ਪਾਬੰਦੀਆਂ ਹਟਾ ਦੇਣਗੇ ਪਰ ਇਕ ਦਿਨ ਪਹਿਲਾਂ ਹੀ ਇਨ੍ਹਾਂ ਨੂੰ ਹਟਾ ਦਿੱਤਾ ਗਿਆ। ਹੁਣ ਲੋਕ ਲਾਂਡਰੀ, ਸ਼ਾਵਰ ਅਤੇ ਹੋਰ ਕੰਮਾਂ ਲਈ ਪਾਣੀ ਦੀ ਵਰਤੋਂ ਆਮ ਵਾਂਗ ਕਰ ਸਕਣਗੇ। ਹਾਲਾਂਕਿ ਪਾਣੀ ਦਾ ਰੰਗ ਥੋੜ੍ਹਾ ਧੁੰਦਲਾ ਹੋਵੇਗਾ ਅਤੇ ਕੁਝ ਦਿਨ ਕਲੋਰੀਨ ਦੀ ਸਮੈੱਲ ਇਸ ਵਿਚੋਂ ਆਵੇਗੀ ਪਰ ਇਹ ਪੀਣ ਲਈ ਸੁਰੱਖਿਅਤ ਹੈ।