ਕਿੰਗ ਚਾਰਲਸ ਦੀ ਤਸਵੀਰ ਵਾਲੇ ਸਿੱਕੇ ਜਲਦ ਹੋਣਗੇ ਜਾਰੀ: ਰਾਇਲ ਕੈਨੇਡੀਅਨ ਮਿੰਟ

ਰਾਇਲ ਕੈਨੇਡੀਅਨ ਮਿੰਟ ਜਲਦ ਹੀ ਕਿੰਗ ਚਾਰਲਸ ਦੇ ਚਿਹਰੇ ਵਾਲੇ ਸਿੱਕੇ ਜਾਰੀ ਕਰਨ ਵਾਲੀ ਹੈ।

ਸਿੱਕਿਆਂ ਦੇ ਦੋਵੇਂ ਪਾਸੇ ਸਵਰਗੀ ਮਹਾਰਾਣੀ ਐਲਿਜ਼ਾਬੈਥ II ਦੀ ਜਗ੍ਹਾ ਕਿੰਗ ਚਾਰਲਸ ਦੀ ਫੋਟੋ ਹੋਵੇਗੀ।

ਰਾਇਲ ਕੈਨੇਡੀਅਨ ਮਿੰਟ ਦਾ ਕਹਿਣਾ ਹੈ ਕਿ ਨਵੇਂ ਸਿੱਕੇ ਦਸੰਬਰ ਦੇ ਸ਼ੁਰੂ ਤੋਂ ਸਰਕੂਲੇਟ ਹੋਣੇ ਸ਼ੁਰੂ ਹੋ ਜਾਣਗੇ।

ਇਨ੍ਹਾਂ ਦੇ ਡਿਜ਼ਾਈਨ 'ਤੇ ਕੈਨੇਡੀਅਨ ਪੋਰਟਰੇਟ ਕਲਾਕਾਰ ਸਟੀਵਨ ਰੋਸਾਟੀ ਨੇ ਕੰਮ ਕੀਤਾ ਹੈ। ਉਹ ਇਸ ਤੋਂ ਪਹਿਲਾਂ ਹੋਰ ਸਿੱਕਿਆਂ ਲਈ ਵੀ ਕੰਮ ਕਰ ਚੁੱਕੇ ਹਨ। ਨਵੇਂ ਸਿੱਕਿਆਂ ਲਈ ਰੋਸਾਟੀ ਦੇ ਡਿਜ਼ਾਈਨ ਨੂੰ 350 ਕਲਾਕਾਰਾਂ ਵਿੱਚੋਂ ਚੁਣਿਆ ਗਿਆ ਸੀ ਅਤੇ ਉਨ੍ਹਾਂ ਦੇ ਡਿਜ਼ਾਈਨ ਨੂੰ ਪ੍ਰਵਾਨਗੀ ਲਈ ਬਕਿੰਘਮ ਪੈਲੇਸ ਭੇਜਿਆ ਗਿਆ ਸੀ।

ਗੌਰਤਲਬ ਹੈ ਕਿ ਬ੍ਰਿਟੇਨ ਦੀ 70 ਸਾਲਾਂ ਤੋਂ ਮਹਾਰਾਣੀ ਰਹੀ ਐਲਿਜ਼ਾਬੈਥ II ਦਾ 96 ਸਾਲ ਦੀ ਉਮਰ ਵਿੱਚ ਸਤੰਬਰ 2022 ਵਿੱਚ ਦਿਹਾਂਤ ਹੋ ਗਿਆ ਸੀ ਅਤੇ 6 ਮਈ 2023 ਨੂੰ ਚਾਰਲਸ ਦੀ ਕਿੰਗ ਵਜੋਂ ਤਾਜਪੋਸ਼ੀ ਕੀਤੀ ਗਈ ਸੀ।