ਬੀ.ਸੀ. ਸਰਕਾਰ ਨੇ ਬਰਨਬੀ ਦੇ ਤਿੰਨ ਸਕੂਲਾਂ ਵਿਚ ਨਵੇਂ ਕਲਾਸਰੂਮਾਂ ਦੀ ਉਸਾਰੀ ਸ਼ੁਰੂ ਕਰਨ ਦਾ ਕੀਤਾ ਐਲਾਨ

ਬੀ.ਸੀ. ਸਰਕਾਰ ਨੇ ਬਰਨਬੀ ਦੇ ਤਿੰਨ ਸਕੂਲਾਂ ਵਿਚ ਨਵੇਂ ਕੇ-12 ਕਲਾਸਰੂਮਾਂ ਦੀ ਉਸਾਰੀ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਬਰਨਬੀ ਨੌਰਥ ਤੋਂ ਵਿਧਾਇਕ ਜੈਨੇਟ ਰੂਟਲੇਜ ਨੇ ਕਿਹਾ ਕਿ ਇਨ੍ਹਾਂ ਨਵੇਂ ਕਲਾਸਰੂਮਾਂ ਨਾਲ 1,000 ਤੋਂ ਵੱਧ ਨਵੇਂ ਵਿਦਿਆਰਥੀਆਂ ਲਈ ਸਪੇਸ ਉਪਲਬਧ ਹੋਵੇਗੀ, ਜਿਸ ਨਾਲ ਕਮਿਊਨਿਟੀ ਦੀਆਂ ਜ਼ਰੂਰਤਾਂ ਨੂੰ ਪੂਰਾ ਕੀਤਾ ਜਾ ਸਕੇਗਾ।

ਇਨ੍ਹਾਂ ਵਿਚ ਨਵੇਂ ਸੀ.ਐਸ.ਐਫ. ਯਾਨੀ ਕੌਨਸਿਲ ਸਕੋਲੇਅਰ ਫ੍ਰੈਂਕੋਫੋਨ ਐਲੀਮੈਂਟਰੀ ਸਕੂਲ ਤੋਂ ਇਲਾਵਾ ਕਿਚਨਰ ਐਲੀਮੈਂਟਰੀ ਅਤੇ ਬ੍ਰੈਂਟਵੁੱਡ ਪਾਰਕ ਐਲੀਮੈਂਟਰੀ ਸਕੂਲ ਨੂੰ ਅਪਗ੍ਰੇਡ ਕਰਨਾ ਸ਼ਾਮਲ ਹੈ। ਸੂਬਾ ਸਰਕਾਰ ਨੇ ਕਿਹਾ ਕਿ ਨੌਰਥ ਬਰਨਬੀ ਵਿਚ ਸੀ.ਐਸ.ਐਫ. ਐਲੀਮੈਂਟਰੀ ਸਕੂਲ ਆਪਣੀ ਕਿਸਮ ਦਾ ਪਹਿਲਾ ਫਰੈਂਚ-ਭਾਸ਼ਾ ਦਾ ਸਕੂਲ ਹੋਵੇਗਾ, ਜਿਸ ਵਿਚ 112 ਫ੍ਰੈਂਚ-ਭਾਸ਼ਾ ਚਾਈਲਡ ਕੇਅਰ ਸਪੇਸ ਹੋਣਗੇ।

ਸਰਕਾਰ ਨੇ ਕਿਹਾ ਕਿ ਪਿਛਲੇ 8 ਸਾਲਾਂ ਵਿਚ ਬਰਨਬੀ ਸਕੂਲ ਜ਼ਿਲ੍ਹੇ ਵਿਚ 1,400 ਤੋਂ ਵੱਧ ਨਵੀਆਂ ਸੀਟਾਂ ਅਤੇ 4,300 ਤੋਂ ਵੱਧ ਭੂਚਾਲ ਪੱਖੋਂ ਸੇਫ ਸੀਟਾਂ ਲਈ $375 ਮਿਲੀਅਨ ਦੇ ਖ਼ਰਚ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ।