ਕੋਕਿਟਲਮ 'ਚ ਇੱਕ ਖਾਲੀ ਪਈ ਅਪਾਰਟਮੈਂਟ ਬਿਲਡਿੰਗ ਵਿਚ ਲੱਗੀ ਅੱਗ, ਪੁਲਿਸ ਵਲੋਂ ਕੀਤੀ ਜਾ ਰਹੀ ਜਾਂਚ

ਕੋਕਿਟਲਮ ਵਿਚ ਇੱਕ ਖਾਲੀ ਪਈ ਅਪਾਰਟਮੈਂਟ ਬਿਲਡਿੰਗ ਵਿਚ ਅੱਗ ਲੱਗਣ ਦਾ ਸ਼ੱਕੀ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਇਸ ਦੇ ਕਾਰਨਾਂ ਦੀ ਜਾਂਚ ਕਰ ਰਹੀ ਹੈ ਅਤੇ ਇਸ ਦੇ ਸਬੰਧ ਵਿਚ ਗਵਾਹਾਂ ਨੂੰ ਅੱਗੇ ਆਉਣ ਅਤੇ ਵੀਡੀਓ ਫੁਟੇਜ ਦੀ ਤਲਾਸ਼ ਕੀਤੀ ਜਾ ਰਹੀ ਹੈ।

ਕੋਕਿਟਲਮ ਆਰ.ਸੀ.ਐਮ.ਪੀ. ਮੁਤਾਬਕ, ਘਟਨਾ 7 ਦਸੰਬਰ ਨੂੰ ਸਵੇਰੇ ਲਗਭਗ 5:00 ਵਜੇ 727 ਨੌਰਥ ਰੋਡ ਵਿਖੇ ਇੱਕ ਸੁੰਨਸਾਨ ਅਪਾਰਟਮੈਂਟ ਬਿਲਡਿੰਗ ਵਿਚ ਵਾਪਰੀ। ਪੁਲਿਸ ਮੁਤਾਬਕ, ਇਹ ਬਿਲਡਿੰਗ ਢਾਹੁਣ ਲਈ ਤਹਿ ਕੀਤੀ ਗਈ ਸੀ। ਇਸ ਵਿਚ ਅੱਗ ਲੱਗਣ ਦੇ ਕਾਰਨਾਂ ਦੀ ਜਾਂਚ ਇਸ ਸਮੇਂ ਕੋਕਿਟਲਮ ਆਰ.ਸੀ.ਐਮ.ਪੀ ਦੇ ਜਨਰਲ ਇਨਵੈਸਟੀਗੇਸ਼ਨ ਸੈਕਸ਼ਨ ਵਲੋਂ ਕੀਤੀ ਜਾ ਰਹੀ ਹੈ।

ਕੋਕਿਟਲਮ ਆਰ.ਸੀ.ਐਮ.ਪੀ. ਦੇ ਮੀਡੀਆ ਰਿਲੇਸ਼ਨਜ਼ ਅਫ਼ਸਰ, ਐਕਟਿੰਗ ਸਾਰਜੈਂਟ ਜਾਰਜ ਹਾਨ ਨੇ ਕਿਹਾ ਕਿ ਅਸੀਂ ਕਿਸੇ ਵੀ ਵਿਅਕਤੀ ਨੂੰ ਜਿਸ ਨੇ ਅੱਗ ਲੱਗਦੇ ਦੇਖੀ ਹੋਵੇ ਜਾਂ ਜਿਸ ਕੋਲ ਇਸ ਦੀ ਵੀਡੀਓ ਫੁਟੇਜ ਹੋਵੇ ਉਸ ਨੂੰ ਆਰ.ਸੀ.ਐਮ.ਪੀ. ਨਾਲ ਸੰਪਰਕ ਕਰਨ ਲਈ ਬੇਨਤੀ ਕਰ ਰਹੇ ਹਾਂ। ਫਿਲਹਾਲ ਪੁਲਿਸ ਨੇ ਇਹ ਜਾਣਕਾਰੀ ਨਹੀਂ ਦਿੱਤੀ ਕਿ ਇਸ ਵਿਚ ਇਮਾਰਤ ਨੂੰ ਕਿੰਨਾ ਨੁਕਸਾਨ ਪੁੱਜਾ ਜਾਂ ਇਸ ਪਿੱਛੇ ਕੀ ਸ਼ੱਕ ਹੋ ਸਕਦਾ ਹੈ।