ਬੀ.ਸੀ. ਵਿੱਚ ਪੁਲਿਸ ਨੇ ਸਪੂਫਿੰਗ ਸਕੈਮ ਨੂੰ ਲੈ ਕੇ ਲੋਕਾਂ ਨੂੰ ਕੀਤਾ ਅਲਰਟ

ਬੀ. ਸੀ. ਵਿਚ ਸਪੂਫਿੰਗ ਸਕੈਮ ਸਾਹਮਣੇ ਆਇਆ ਹੈ, ਜਿੱਥੇ ਧੋਖੇਬਾਜ਼ਾਂ ਵਲੋਂ ਖੁਦ ਨੂੰ ਪੁਲਿਸ ਅਧਿਕਾਰੀ ਦੱਸ ਕੇ ਸੰਭਾਵਿਤ ਪੀੜਤਾਂ ਦੀ ਨਿੱਜੀ ਜਾਣਕਾਰੀ ਜਾਂ ਵਿੱਤੀ ਜਾਣਕਾਰੀ ਜੁਟਾਉਣ ਦੀ ਕੋਸ਼ਿਸ ਕੀਤੀ ਜਾ ਰਹੀ ਹੈ। ਤਾਜ਼ਾ ਮਾਮਲੇ ਵਿਚ ਕੋਕਟਲਮ ਆਰ.ਸੀ.ਐਮ.ਪੀ. ਨੇ ਲੋਕਾਂ ਨੂੰ “ਸਪੂਫਿੰਗ ਸਕੈਮ” ਬਾਰੇ ਅਲਰਟ ਕੀਤਾ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਕਈ ਰਿਪੋਰਟਾਂ ਮਿਲੀਆਂ ਹਨ, ਜਿੱਥੇ ਕੋਕਟਲਮ ਆਰ.ਸੀ.ਐਮ.ਪੀ. ਦੇ ਬੁਰਕਿਟਲਮ ਕਮਿਊਨਿਟੀ ਪੁਲਿਸ ਆਫਿਸ ਦੇ ਫੋਨ ਨੰਬਰ ਦਾ ਇਸਤੇਮਾਲ ਸਪੂਫਿੰਗ ਜ਼ਰੀਏ ਕਈ ਧੋਖਾਧੜੀ ਵਿਚ ਕੀਤਾ ਗਿਆ ਹੈ।

ਇਸ ਸਕੈਮ ਵਿਚ ਧੋਖੇਬਾਜ਼ ਆਪਣੀ ਕਾਲਰ ਆਈ.ਡੀ.ਵਿਚ ਹੇਰਫੇਰ ਕਰਕੇ ਇਸ ਨੂੰ ਕੋਕਟਲਮ ਆਰ.ਸੀ.ਐਮ.ਪੀ. ਜਾਂ ਹੋਰ ਪੁਲਿਸ ਏਜੰਸੀਆਂ ਦੇ ਨੰਬਰ ਨਾਲ ਡਿਸਪਲੇਅ ਕਰਦੇ ਹਨ। ਪੀੜਤਾਂ ਨੂੰ ਉਨ੍ਹਾਂ ਖਿਲਾਫ ਕਿਸੇ ਕ੍ਰਿਮੀਨਲ ਮਾਮਲੇ ਵਿਚ ਚੱਲ ਰਹੀ ਜਾਂਚ ਦਾ ਹਵਾਲਾ ਦੇ ਕੇ ਡਰਾਇਆ ਜਾਂਦਾ ਹੈ ਅਤੇ ਉਨ੍ਹਾਂ ਦੀ ਨਿੱਜੀ ਜਾਣਕਾਰੀ ਮੰਗੀ ਜਾਂਦੀ ਹੈ।

ਸਾਰਜੈਂਟ ਜਾਰਜ ਹੈਨ ਨੇ ਕਿਹਾ ਕਿ ਜੇ ਕਿਸੇ ਨੂੰ ਅਜਿਹਾ ਕਾਲ ਆਵੇ ਜੋ ਠੀਕ ਨਾ ਲੱਗੇ ਅਤੇ ਭਾਵੇਂ ਹੀ ਪੁਲਿਸ ਵਲੋਂ ਆਈ ਹੋਵੇ ਤਾਂ ਫੋਨ ਕੱਟ ਦਿਓ ਅਤੇ ਸਿੱਧੇ ਸਬੰਧਤ ਪੁਲਿਸ ਡਿਪਾਰਟਮੈਂਟ ਨਾਲ ਸੰਪਰਕ ਕਰਨਾ ਚਾਹੀਦਾ ਹੈ।