ਅਲਬਰਟਾ ਪ੍ਰੀਮੀਅਰ ਗ੍ਰੀਨ ਐਨਰਜੀ ਸਮਰਥਕਾਂ ਖ਼ਿਲਾਫ਼ ਆਪਣੇ ਪ੍ਰਚਾਰ ਤਰੀਕੇ ਨੂੰ ਲੈਕੇ ਸਵਾਲਾਂ ਵਿਚ ਘਿਰੇ

ਐਤਵਾਰ ਰਾਤ ਆਸਕਰ ਸਨਮਾਨ ਸਮਾਰੋਹ ਦੇ 94 ਵੇ ਪ੍ਰੋਗਰਾਮ ਦੌਰਾਨ ਇਕ ਡਾਕੂਮੈਂਟਰੀ ਦੇ ਚੁਣੇ ਜਾਣ ਤੇ ਪ੍ਰੋਗਰਾਮ ਦੇ ਪੇਸ਼ਕਾਰ ਕ੍ਰਿਸ ਰਾਕ ਮਜ਼ਾਹੀਆ ਲਹਿਜੇ ਦੀ ਰਵਾਨਗੀ ਵਿਚ ਜ਼ਿਆਦਾ ਹੀ ਵਹਿ ਗਏ| ਪ੍ਰੋਗਰਾਮ ਦੌਰਾਨ ਬੋਲਦਿਆਂ ਓਹਨਾ ਮੁਸ਼ਹੂਰ ਹਾਲੀਵੁਡ ਅਦਾਕਾਰ ਵਿਲ ਸਮਿਥ ਦੀ ਪਤਨੀ ਦੇ ਗੰਜੇ ਸਿਰ ਬਾਰੇ ਅਸਹਿਜ ਟਿਪਣੀ ਕਰ ਦਿਤੀ|

ਸਮਿਥ ਦੀ ਪਤਨੀ, ਜੇਡਾ ਪਿੰਕਟ ਸਮਿਥ, ਦੇ ਬਿਮਾਰੀ ਕਰਕੇ ਵਾਲ ਝੜਨ ਮਗਰੋਂ ਜੇਡਾ ਨੇ ਆਪਣਾ ਸਿਰ ਪੂਰਾ ਸਫ਼ਾਚਟ ਕਰਵਾ ਲਿਆ ਸੀ|

ਟਿਪਣੀ ਕਰਕੇ ਗੁੱਸੇ ਵਿਚ ਆਏ ਵਿਲ ਸਮਿਥ ਨੇ ਚਲਦੇ ਪ੍ਰੋਗਰਾਮ ਦੌਰਾਨ ਸਟੇਜ ਤੇ ਜਾਕੇ ਕ੍ਰਿਸ ਰਾਕ ਦੇ ਥੱਪੜ ਜੜ ਦਿੱਤਾ| ਇਸ ਘਟਨਾ ਦਾ ਵੀਡੀਓ ਤੇ ਫੋਟੋਆਂ ਇੰਟਰਨੇਟ ਤੇ ਝੱਟ ਫੈਲ ਗਈਆਂ, ਤੇ ਪੂਰੀ ਦੁਨੀਆਂ ਵਿਚ ਇਸ ਘਟਨਾ ਤੇ ਚਰਚਾ ਹੋ ਰਹੀ ਹੈ|

ਓਧਰ ਅਲਬਰਟਾ ਪ੍ਰੀਮੀਅਰ ਜੇਸਨ ਕੈਨੀ ਨੇ ਇਸ ਘਟਨਾ ਦੀ ਫੋਟੋ ਦੀ ਵਰਤੋਂ ਤੇਲ ਅਤੇ ਗੈਸ ਅਧਾਰਤ ਉਰਜਾ ਸਰੋਤਾ ਦਾ ਵਿਰੋਧ ਕਰਨ ਵਾਲਿਆਂ ਖ਼ਿਲਾਫ਼ ਕਰਦਿਆਂ ਇਕ ਮੀਮ ਤਿਆਰ ਕਰਕੇ ਸੋਸ਼ਲ ਮੀਡਿਆ ਤੇ ਪਾ ਦਿੱਤੀ ਹੈ|

ਪ੍ਰੀਮੀਅਰ ਕੈਨੀ ਨੇ ਥੱਪੜ ਖਾਣ ਵਾਲੇ ਕ੍ਰਿਸ ਰਾਕ ਦੀ ਫੋਟੋ ਤੇ ਗ੍ਰੀਨ ਐਨਰਜੀ ਪਾਲਿਸੀ (ਭਾਵ ਨਵਿਆਉਣਯੋਗ ਉਰਜਾ ਨੀਤੀ ਸਮਰਥਕ ਅਤੇ ਥੱਪੜ ਮਾਰਨ ਵਾਲੇ (ਵਿਲ ਸਮਿਥ) ਦੀ ਫੋਟੋ ਤੇ ਰਿਐਲਿਟੀ (ਸੱਚਾਈ) ਲਿੱਖ ਦਿੱਤਾ| ਪ੍ਰੀਮੀਅਰ ਕੈਨੀ ਤੇਲ ਅਤੇ ਗੈਸ ਅਧਾਰਤ ਉਰਜਾ ਦੇ ਪੱਕੇ ਸਮਰਥਕ ਦੇ ਤੌਰ ਤੇ ਜਾਂਣੇ ਜਾਂਦੇ ਹਨ|

ਹੁਣ ਇਸ ਪੋਸਟ ਨੂੰ ਲੈਕੇ ਪ੍ਰੀਮੀਅਰ ਤੇ ਸਵਾਲ ਚੁੱਕੇ ਜਾ ਰਹੇ ਹਨ ਕੇ ਉਹ ਓਹਨਾ ਦੀਆਂ ਨੀਤੀਆਂ ਨਾਲ ਅਸਹਿਮਤੀ ਰੱਖਣ ਵਾਲਿਆਂ ਖ਼ਿਲਾਫ਼ ਹਿੰਸਾ ਦੀ ਵਰਤੋਂ ਕਰਨ ਦੇ ਹਿਮਾਇਤੀ ਨਜ਼ਰ ਆ ਰਹੇ ਹਨ, ਤੇ ਇਹੋ ਜਿਹੇ ਢੰਗ ਤਰੀਕੇ ਲੋਕਤੰਤਰੀ ਕਦਰ-ਕੀਮਤਾਂ ਦੇ ਅਨੁਸਾਰੀ ਨਹੀਂ ਹਨ|

ਕਿਸੇ ਹੋਰ ਮਾਮਲੇ ਤੇ ਪੱਤਰਕਾਰਾਂ ਨਾਲ ਹੋ ਰਹੀ ਗੱਲਬਾਤ ਦੌਰਾਨ ਪ੍ਰੀਮੀਅਰ ਨੇ ਮੀਮ ਦੀ ਵਿਆਖਿਆ ਕਰਦਿਆਂ ਕਿਹਾ ਕਿ ਇਹ ਸਿਰਫ ਮਜ਼ਾਹੀਆ ਤਰੀਕੇ ਨਾਲ ਵਿਚਾਰ ਦਾ ਪ੍ਰਗਟਾਵਾ ਕਰਨ ਤੋਂ ਵੱਧ ਕੁਝ ਨਹੀਂ ਹੈ, ਜਿਸ ਵਿਚ ਲੋੜ ਅਨੁਸਾਰ ਬਦਲਾਅ ਕਰਕੇ ਆਪਣੀ ਗੱਲ ਸੋਖੇ ਢੰਗ ਨਾਲ ਬਹੁਤੇ ਲੋਕਾਂ ਤਕ ਪੁੱਜਦੀ ਕੀਤੀ ਜਾਂਦੀ ਹੈ|

ਪ੍ਰੀਮੀਅਰ ਨੇ ਅੱਗੇ ਕਿਹਾ ਕਿ ਉਹ ਖੱਬੇ ਪੱਖੀ ਗ੍ਰੀਨ ਐਨਰਜੀ ਨੀਤੀਆਂ ਦੀ ਅਸਫਲਤਾ ਵੱਲ ਧਿਆਨ ਦਿਵਾਉਣਾ ਚਾਹੁੰਦੇ ਹਨ, ਜਿਸ ਤਹਿਤ ਕਾਰਬਨ ਟੈਕਸ ਲਾਕੇ ਆਮ ਲੋਕਾਂ ਉਪਰ ਆਰਥਿਕ ਬੋਝ ਪਾਇਆ ਜਾ ਰਿਹਾ ਹੈ|